5
Maksud si Ester ni Sultan
1 Na, taꞌabut paꞌin katꞌllung llaw pagpuwasa disi Ester, sinulug eꞌna sꞌmmekna pagdayang-dayang boꞌ anꞌngge pehēꞌ ni halaman ma deyom astanaꞌ, ma anggopan bilik paningkōꞌan sultan. Inaꞌan isab sultan aningkōꞌ ma paningkōꞌan sultan, paharap ni lawang. 2 Taꞌndaꞌ paꞌin eꞌna dayang-dayang Ester anꞌngge ma halaman inān, kasulutan iya. Magtūy pinabantang eꞌ sultan tudju ni si Ester in bastun bulawan ya ma tanganna. Manjari pasekot isab si Ester angꞌntanan tōng bastun heꞌ.
3 Tinilaw iya eꞌ sultan yukna, “O dayang-dayang, ai maksudnu? Minsan lagiꞌ santongaꞌ pagsultananku pamuwanku du ni kaꞌa.”
4 Yuk sambung si Ester, “Bang makasulut ma kaꞌa, tuwan sultan, pahadil paꞌin ka llaw itu ni pagjamu ya sakapku. Magbeyaꞌ ka maka si Haman.”
5 Ahꞌlling sultan ni sosohoꞌanna, yukna, “Sohoꞌun si Haman pasaꞌut piꞌitu, boꞌ abeyaꞌ eꞌta bay pangamuꞌ si Ester.”
Ati pahadil na sultan maka si Haman ni pagjamu ya bay sinakap eꞌ si Ester. 6 Hinabu sigām anginum binu-anggul, tinilaw pabalik eꞌ sultan si Ester. “Na, ai toꞌongan maksudnu? Tantu ka dūlanku. Maka ai pangamuꞌnu? Minsan giꞌ santongaꞌ pagsultananku, pamuwanku du.”
7 Anambung si Ester, “Ya itu panganjunjungku: 8 Bang aku makasulut ma kaꞌa, tuwan Sultan, maka bang aku dūlannu, amuꞌku ni kaꞌa bang paꞌin ka magbeyaꞌ maka si Haman pahadil salung ni pagjamu ya song paniyaꞌku. Jari sambunganku panilawnu salung, tuwan Sultan.”
Akagit Atay si Haman ma si Murdikay
9 Ma waktu inān, pagluwas si Haman min pagjamuhan, kinōgan iya maka alampung baranna. Sagōꞌ pagꞌndaꞌ si Haman itu ma si Murdikay ma lawang kutaꞌ, boꞌ kamatahan eꞌna halam bay anꞌngge atawa magmatāw ma iya, magtūy akagit atayna. 10 Saguwāꞌ minsan buwattingga kagit atayna bay katahanan eꞌna ati palanjal iya amoleꞌ.
Manjari pinalinganan eꞌ si Haman saga bagayna maka hꞌndana si Seresa, sinōꞌ patimuk ma iya. 11 Pagbantug eꞌ si Haman ni sigām pangaltaꞌna landuꞌ aheka, maka heka saga anakna lꞌlla, maka kaginisan pangamahaltabat ma iya eꞌ sultan. Pagbantugna isab in iya pinalanga labi lagiꞌ min kaseheꞌan aꞌa bangsahan, maka min kamemon saga wakil. 12 “Nggaꞌi ka hal itu,” yuk si Haman. “Hal aku dangan-danganku ya bay tinaꞌabbit eꞌ dayang-dayang Ester aneheꞌan sultan ni paglami-lami ya bay pinaniyaꞌ eꞌna. Maka bay lagiꞌ kami isab sinohoꞌ pabalik maka sultan ma waktu salung. 13 Sagōꞌ mbal du ahalgaꞌ ma aku saga kahāpan itu satꞌggol masi taꞌndaꞌku si Murdikay ya bangsa Yahudi aningkōꞌ na paꞌin ma lawang kutaꞌ.”
14 Jari ahꞌlling ni iya hꞌndana si Seresa maka saga bagayna, yuk-i. “Amahinang ka panganggantungan saga sangpūꞌ maka dda dꞌppa langkawna. Pagsubu, angamuꞌ ka ni sultan bang paꞌin sohoꞌna ginantung si Murdikay mainaꞌan. Pagubus, magbeyaꞌ ka maka sultan paluruk ni pagjamu boꞌ magkalasigan.” Palampung pangatayan si Haman ma sabab garaꞌ itu ati amahinang iya panganggantungan.