Ester 4

Si Murdikay Mikitabang ma si Ester

¹ Tataꞌu paꞌin eꞌ si Murdikay kamemon bay tahinang eꞌ, gineseꞌ eꞌna sꞌmmekna ati abadjuꞌ iya karut maka amehēꞌan di-na abu, paltandaꞌan kasusahanna. Paluwas iya ni saga kalumaꞌan maka eꞌna maglemong pakosog. ² Saguwāꞌ halam iya bay palabay min lawang kutaꞌ, sabab halam aniyaꞌ minsan sai tinugutan pasōd ni deyom kutaꞌ bang magbinadjuꞌ karut. ³ Aheya toꞌongan karukkaꞌan ma sasuku bangsa Yahudi mainaꞌan ma kamemon saga paglahat ya bay kapabeyaꞌan panohoꞌan maka saraꞌ sultan inān. Maglemong sigām maka amuwasa. Aheka isab sigām magbinadjuꞌ karut maka palesseg ma abu.

⁴ Manjari itu, bay paꞌin kahakaꞌan si Ester eꞌ saga sosohoꞌanna dꞌnda maka saga yunuk pasal kahālan si Murdikay, sidda aheya kasukkalanna. Bay iya amabeyaꞌ sꞌmmek ni si Murdikay pamasalinan badjuꞌna karut, sagōꞌ halam tinaimaꞌ eꞌna. ⁵ Pagubus, pinalinganan eꞌ si Ester si Hatak, dakayuꞌ yunuk pangandolan sultan ya sinohoꞌ angupiksaꞌ ma iya. Jari sinohoꞌ tinaꞌu ma si Hatak itu eꞌ si Ester bang ai makalengog ma si Murdikay, maka bang ai sababna.

⁶ Sakali itu, paluwas si Hatak ni si Murdikay, ya inaꞌan ma mairan ma anggopan lawang kutaꞌ si Serses. ⁷ Nihakaꞌan si Hatak eꞌ si Murdikay pasal kamemon bay patꞌkka ni iya. Kahakaꞌan isab pasal halgaꞌ pilak bay panganjanjiꞌ si Haman pamatꞌnnaꞌna ma pagtatauꞌan pangaltaꞌ sultan bang paꞌin nilaglag bangsa Yahudi. ⁸ Bay isab niꞌndeꞌan eꞌ si Murdikay ni si Hatak dakayuꞌ sulat panulatan saraꞌ ya bay pinasaplag ma lahat Susa ma pasal pangalaglag bangsa Yahudi. Sinōꞌ pinaꞌndaꞌan sulat itu ma si Ester, maka sinohoꞌ iya pinataꞌu pasal kahālan itu. Aniyaꞌ isab panohoꞌan si Murdikay panganjunjungna ma si Ester yuk-i, “Bang paꞌin ka pabaihuꞌ ni sultan magpatiaseꞌ ma pasal saga pagkahitam Yahudi.”

⁹ Pagubus paꞌin, pabalik na si Hatak ni si Ester angahakaꞌan iya pasal bay pahꞌlling si Murdikay. ¹⁰ Jari aniyaꞌ lapal bay pinabowa eꞌ si Ester ma si Hatak, sinōꞌ pinasampay ni si Murdikay. ¹¹ Yuk lapal eꞌ, “Bapaꞌ, kinataꞌuwan asal eꞌ kamemon saga wakil sultan maka kamemon saga aꞌa ma sakalingkal lahat pagsultananna, sasuku lꞌlla atawa dꞌnda pasōd ni halaman deyom boꞌ pasekot ni sultan ma halam bay pinalinganan, subay pinapatay. Halam na aniyaꞌ saraꞌ saddī liyu minnēꞌ, luwal laꞌa bang pinabantang bastun bulawan eꞌ sultan pamapuwas aꞌa inān min hukuman kamatay. Saguwāꞌ,” yuk si Ester, “ya kagawahanku aniyaꞌ na tꞌllumpūꞌ llaw halam aku bay nilingangan pehēꞌ ni sultan.” Minnēꞌ aubus lapal si Ester.

¹² Kahakaꞌan paꞌin si Murdikay pasal lling si Ester itu, ¹³ anambung iya buwattitu, labay isab min si Hatak. Yukna, “Halam bahāꞌ tapikilnu saukat na ka patꞌnnaꞌ ma astanaꞌ sultan, mbal na ka talapay pinapatay ma saga pagkahinu bangsa Yahudi? ¹⁴ Bang mbal tawakkalannu ahꞌlling, tantu aniyaꞌ saddī amuwasan bangsata Yahudi min kasusahan sigām. Boꞌ paꞌin kaꞌa maka saga kakampungannu alaglag. Mbal kataꞌuwanta,” yuk lagiꞌ panambung si Murdikay, “kalu kaꞌa iya bay tapeneꞌ pinatꞌnnaꞌ dayang-dayang supaya ka makatabang ma waktu buwattitu.”

¹⁵ Buwattitu isab lapal ya pinabeyaꞌ eꞌ si Ester panambungna ma si Murdikay. ¹⁶ Yukna, “Na, bapaꞌ, timukun kamemon saga Yahudi ya ma lahat Susa boꞌ aku puwasahinbi. Daꞌa kam amangan maka anginum ma deyom tꞌllungꞌllaw maka tꞌllumbahangi. Ya du isab aku maka saga sosohoꞌanku dꞌnda, amuwasa du isab buwat kaꞌam. Ati bang jukup na tꞌllungꞌllaw pagpuwasatam, pabaihuꞌ aku ni sultan minsan langgal saraꞌ. Bang aku pinapatay lillaꞌ du aku.” ¹⁷ Manjari, palanjal na si Murdikay boꞌ bineyaꞌ eꞌna kamemon bay panohoꞌan si Ester.