3
Garaꞌ si Haman Binonoꞌ saga Bangsa Yahudi
1 Pagubus paꞌin saga palkalaꞌ itu, minahaldikaꞌ eꞌ sultan Serses si Haman anak si Hammedata lꞌlla, ya bangsa Agag. Pinalanga giꞌ kapatutna min saga aꞌa bangsahan kaseheꞌan. 2 Manjari, kamemon saga wakil sultan ya ma lawang kutaꞌna angōk-tuꞌut pagmahaltabat sigām ma iya buwat bay panohoꞌan sultan. Sagōꞌ mbal angōk-tuꞌut si Murdikay maka mbal magaddat ma si Haman eꞌ. 3 Ati atilaw ni si Murdikay saga wakil sultan ya ma lawang kutaꞌna, yuk-i, “Angay pabiyalnu panohoꞌan sultan?” 4 Sakahabaꞌ llaw pinamūngan na paꞌin si Murdikay eꞌ saga wakil eꞌ, sagōꞌ in iya mbal toꞌongan ameyaꞌ ma pamogos sigām. “Sabab,” yukna, “In aku itu bangsa Yahudi koꞌ.” Sakali anumbung saga wakil inān pehēꞌ ni si Haman boꞌ kinataꞌuwan eꞌ sigām bang kasandalan palangay si Murdikay inān.
5 Pagka taꞌndaꞌ eꞌ si Haman in si Murdikay mbal angōk-tuꞌut atawa magaddat ma iya, akagit toꞌongan atayna. 6 Tataꞌu paꞌin eꞌna in si Murdikay bangsa Yahudi, magniyat iya nggaꞌi ka hal si Murdikay ya pinapatay. Angkan amikil-mikil na paꞌin si Haman bang buwattingga kapangalaglag kamemon saga bangsa Yahudi ya maglahat ma katilingkal pagsultanan si Serses.
7 Ma kasangpūꞌ karuwantahun kapagsultan sultan Serses, ma bulan Nisan ya bulan panagnaꞌan ma tahun inaꞌan-i, magkoꞌot-koꞌota saga aꞌa ma matahan si Haman boꞌ tapeneꞌ llaw maka bulan ya patut pamalanjal pagniyat itu. Jari ya takoꞌot eꞌ saga aꞌa inān bulan Adar ya bulan kasangpūꞌ karuwa.
8 Na, ahꞌlling si Haman ni sultan Serses yukna, “Aniyaꞌ dakayuꞌ bangsa akaukanat ma kamemon paglahat ma pagsultanannu, maglamud-lamugay maka saga bangsa kaseheꞌan. Saddī saga pangaddatan sigām min saga bangsa kaseheꞌan, maka mbal tabeyaꞌ eꞌ sigām saga saraꞌ ya panohoꞌannu. Jari bang sigām pasagarannu na paꞌin, mbal makahāp ma pagsultanannu. 9 Angkan Tuwan sultan, bang makasulut ma kaꞌa, amaniyaꞌ ka saraꞌ pamakaꞌat ma bangsa Yahudi inān.” Ahꞌlling giꞌ si Haman yukna, “Amuwan aku sangpūꞌ ngibu heka pilak tibuꞌuk ninnaꞌ ma pagtatauꞌan pangaltaꞌ sultan panamba saga aꞌa ya makahinang itu-i.”
10 Manjari nihurusan eꞌ sultan singsingna ya taga-gindan pagsultanna, boꞌ sinōngan eꞌna ni si Haman. Na si Haman itu anak si Hammedata bangsa Agag, ya banta saga Yahudi. 11 Yuk sultan ni si Haman, “Mailuhun na sīn ilu. Hinangun bang ai kabayaꞌannu nihinang ma sigām.”
12 Taꞌabut paꞌin kasangpūꞌ ka tꞌllungꞌllaw ma bulan panagnaꞌan, pinalinganan eꞌ sultan saga sosohoꞌanna magsusulat. Sinohoꞌ sigām anulat kamemon panohoꞌan si Haman boꞌ pinabeyaꞌ ni saga gubnul katapusan alangab, maka ni saga gubnul ya magmakōk ma baꞌanan paglahat, maka ni saga aꞌa bangsahan min bangsa kaginisan. In sulat itu bay sinulat ma bahasa maka sulatan saga bangsa inān kaniya-kaniya. Bay sinulat isab ma deyoꞌan ōn sultan Serses boꞌ sināpan maka singsingna. 13 Tasulat paꞌin saga sulat itu, pinabowa na ma saga magbobowa sulat boꞌ pinasampay ni kamemon paglahat ya beyaꞌ ma pagsultanan si Serses. Yuk panohoꞌan itu in bangsa Yahudi subay pinakaꞌat maka nilaglag boꞌ halam aniyaꞌ takapin. Ondeꞌ-mattoꞌa, karꞌndahan maka kaondeꞌ-ondeꞌan, subay pinapatay ma deyom dangꞌllaw, ma pitsa sangpūꞌ maka tꞌllu ma kasangpūꞌ karuwa bulan, ya na bulan Adar. Saga pangaltaꞌ sigām isab subay pinagtaban. 14 Manjari, ai-ai bay panohoꞌan eꞌ si Haman inān bay tahinang saraꞌ sultan, ati sinohoꞌ pinasampay ni kamemon saga paglahat pamataꞌu saga aꞌa kamemon, minsan ai bangsa, supaya sigām sakap amonoꞌ bang taꞌabut na waktu inaꞌan.
15 Pinaraiꞌ-daiꞌ eꞌ sultan saga aꞌa magbobowa sulat ati pauntas na sigām. Pinasaplag isab panohoꞌan si Haman ma deyom daꞌira Susa. Sultan Serses maka si Haman inaꞌan aningkōꞌ maginum sagōꞌ magkalengogan saga aꞌa mainaꞌan.