2
Si Ester ya Tapeneꞌ Nihinang Dayang-dayang
1 Na, apuwas paꞌin bay kagit atay sultan Serses, taentom eꞌna bay hinang si Basti maka saraꞌ ya bay pinatꞌkka eꞌna ni iya. 2 Jari aniyaꞌ garaꞌ pamuwan ma sultan eꞌ saga tendogna, yuk-i, “Bang makasulut ma kaꞌa, tuwan, amapiha ka saga budjang alingkat binowahan kaꞌa. 3 Amatꞌnnaꞌ ka isab saga wakil ma kamemon saga paglahat ma katilingkal pagsultanannu. Sohoꞌun binowa saga budjang alingkat inān ni libunan karayang-dayangan maitu ma kutaꞌ Susa itu. Patuntulun sigām ma si Hegay, ya yunuk sultan angupiksaꞌ ma karꞌndahan, maka sohoꞌun pinalꞌssin. 4 Manjari sai budjang makasulut atay sultan, ya heꞌ nihinang dayang-dayang panganggantiꞌ si Basti.” Kaꞌamuhan sultan ma garaꞌ itu ati bineyaꞌ eꞌna.
5 Ma waktu inān aniyaꞌ Yahudi niōnan si Murdikay bay ma kutaꞌ Susa. Si Murdikay itu dakayuꞌ panubuꞌ si Benjamin, mmaꞌna si Jair, mboꞌna si Simay ya anak si Kīs lꞌlla. 6 Si Murdikay itu bay tasaggaw eꞌ sultan Nebukadnesar boꞌ binowa alaꞌan min Awrusalam tudju ni Babilon. Dambeyaꞌan iya maka si Jehoyakina ya bay sultan lahat Yuda, maka saga aꞌa kaseheꞌ isab. 7 Aniyaꞌ kaki si Murdikay budjang taipat eꞌna pagka amatay na inaꞌ-mmaꞌna. Ōn budjang itu si Hadasa, ya isab niōnan si Ester. Alingkat dꞌnda iya maka ahāp pamarananna. Niniyat iya eꞌ si Murdikay buwat anakna lissi.
8 Manjari, abeyaꞌ paꞌin bay panohoꞌan sultan, aheka saga kabudjangan bay binowa ni daꞌira Susa boꞌ pinatuntul ma si Hegay ya magnakuraꞌ ma libunan saga karayang-dayangan ma deyom astanaꞌ. Lamud na mahēꞌ si Ester, pinatuntul isab ma si Hegay 9 Na si Ester ya makasulut atay si Hegay ati kinahāpan eꞌna. Angkan magtūy bay niꞌndeꞌan ni iya eꞌ si Hegay kamemon saga pagpalꞌssin maka pagkakan ahāp. Aniyaꞌ isab pamatꞌnnaꞌ ma si Ester pituꞌ sosohoꞌan dꞌnda ya bay tapeneꞌ min astanaꞌ, ati binowa iya maka saga sosohoꞌan heꞌ papinda ni lugal ya katapusan ahāp ma deyom libunan karayang-dayangan.
10 Halam bay nihaka eꞌ si Ester in bangsana maka pagkaꞌaꞌana, sabab ya heꞌ bay pangalāngan iya eꞌ si Murdikay. 11 Sakahabaꞌ llaw si Murdikay itu maglabay-labay na paꞌin ma halaman ya ma luwasan libunan karayang-dayangan supaya anaꞌu bang ai kahālan si Ester.
12 Manjari, saga budjang itu halam magtūy pinaharap ni sultan Serses. Ya untulan pamatꞌnnaꞌ ma sigām subay nilibun ma deyom dantahun maka pinalꞌssin pahāp boꞌ yampa aniyaꞌ waktuna paharap ni sultan eꞌ. Nilipaꞌ sigām nnom bulan maka nsꞌllan mira, nnom bulan isab pinahamut-hamutan maka niari-ari. 13 Buwattitu kalꞌngnganan budjang bang taꞌabut na pinaharap ni sultan. Ai-ai niamuꞌ eꞌ budjang inān min libunan karꞌndahan pamarūl ma iya, boꞌ tapakay eꞌna pehēꞌ ni astanaꞌ. 14 Sangom ya waktu kapaharapna ni sultan, ati pagkꞌllat llaw pabalik iya ni libunan karayang-dayangan, sagōꞌ saddī bilikna. Pinaupiksaꞌ iya ma si Sasgas, yunuk sultan ya makapagbayaꞌ ma saga kahꞌnda-hꞌndaꞌan sultan. Mbal ya manjari paharap ni sultan pabīng, luwal bang kasulutan sultan ma iya boꞌ palingananna ma ōnna.
15 Na, taꞌabut na waktu kapaharap si Ester ni sultan. (Si Ester itu bay anak si Abihaꞌil, ya siꞌit si Murdikay. Taipat isab iya eꞌ si Murdikay.) Halam aniyaꞌ niamuꞌ eꞌ si Ester saddī min bay pamatꞌnnaꞌ ma iya eꞌ si Hegay, yunuk sultan ya nakuraꞌ ma libunan kabudjangan. Manjari kaꞌamuhan ma iya saga aꞌa kamemon ya bay makaꞌndaꞌ iya. 16 Bulan Tebet ya waktu kapamowa si Ester ni sultan Serses ma deyom astanaꞌna. Ya na bulan kasangpūꞌna maka pituntahun kapagsultan si Serses.
17 Na, sinōd bayaꞌ sultan itu ma si Ester labi lagiꞌ min saga dꞌnda kaseheꞌan. Angkanna kinoronahan eꞌna kōk si Ester nihinang dayang-dayang panganggantiꞌna si Basti. 18 Pagubus paꞌin, amaniyaꞌ iya paglami-lami pangamahaltabat ma si Ester, ati lamud kamemon saga aꞌana bangsahan maka saga pagnakuraꞌan ya wakilna. Ma waktu inān aniyaꞌ panohoꞌan isab bay pinatanyag eꞌ sultan ni saga paglahat ma katilingkal pagsultananna, magpanohoꞌan subay halam aniyaꞌ hinang ma sai-sai ma deyom dangꞌllaw. Bay isab pagmura eꞌna saga pangaltaꞌ, ya na addat sultan.
Si Murdikay maka Panumbungna
19 Waktu paꞌin pamatimuk pabalik saga kabudjangan, kawakilan si Murdikay aningkōꞌ ma lawang kutaꞌ sultan. 20 Masi na paꞌin nilimbungan eꞌ si Ester ya bangsana maka pagkaꞌaꞌana buwat bay pamanduꞌ si Murdikay ma iya. Buwattēꞌ asal kabiyaksahan si Ester sangay min katagnaꞌ kapangipat si Murdikay ma iya.
21 Na, ma waktu kapaningkōꞌ si Murdikay ma lawang kutaꞌ, kinapꞌddiꞌan atay sultan Serses eꞌ si Bigtana maka si Teres, yunuk pangandolan sultan ya jaga ma lawang eꞌ. Magisun sigā amapatay sultan. 22 Sagōꞌ tataꞌu paꞌin eꞌ si Murdikay pagisun itu, sinumbung eꞌna ni dayang-dayang Ester, maka si Ester ya bay amalatun sumbung ni sultan, samantalaꞌ si Murdikay ya pinagsarang-sukulan. 23 Manjari, tapariksaꞌ paꞌin bay panumbung eꞌ, katōngan dusa duwangan wakil inān ati sinohoꞌ ginantung pinapatay. Na, tasulat saga kahālan itu kamemon ma Kitab Pagsusulatan Sultan, mainaꞌan ma matahan sultan.