ESTER
1
JŪD ESTER
Palbahagiꞌan Kitab Jabul
Dayang-dayang Basti Pinalessad
1 Buwattitu bay kahālan ma waktu sultan Serses ya bay angꞌntanan pagparinta ma saga paglahat dahatus maka duwampūꞌ maka pituꞌ hekana, tinagnaꞌan min lahat Indiya sampay ni lahat Eteyopa. 2 Ma waktu heꞌ, sultan Serses patꞌnnaꞌ ma kutaꞌna ma daꞌira Susa boꞌ amarinta ma pagsultananna. 3 Taꞌabut tahun katꞌlluna ma kapamarinta si Serses itu, bay iya amaniyaꞌ paglami-lami ma kamemon saga aꞌa bangsahan ya beyaꞌ ma iya maka saga pagnakuraꞌan. Inaꞌan isab saga nakuraꞌ sundalu bangsa Persiya maka Midiya, maka saga anak sultan maka saga aꞌa bangsahan min baꞌanan paglahat eꞌ.
4 Ma deyom dahatus maka walumpūꞌ llaw pinaꞌndaꞌan na paꞌin pangaltaꞌ landuꞌ aheka ya beyaꞌ ma pagsultananna, pinaꞌndaꞌan isab kabantugan maka kasanglitan sin kapagsultanna. 5 Palabay paꞌin waktu inān, in sultan itu bay amaniyaꞌ paglami-lami dapituꞌ tꞌggolna ma halaman astanaꞌna. Ya tinaꞌabbit inān kamemon saga aꞌa alanga-areyoꞌ ya patꞌnnaꞌ ma kutaꞌ Susa. 6 In halaman inān bay niari-arihan, pinagantungan kakanaꞌ poteꞌ maka bilu bay niengkotan ni gallang pilak ya pinikit ni saga hāg batu marbol. Lanay poteꞌ maka kakanaꞌ taluk ya pangengkot. Aniyaꞌ isab saga paningkōꞌan bulawan maka pilak patꞌnnaꞌ ma lantay batu niari-ari isab maka batu gaddung, marbol poteꞌ, kuwit mussaꞌ, maka kaginisan batu ahalgaꞌ. 7 Saga inuman ya pangalabot ma saga luruk bay niꞌisi ni saga sawan bulawan magginisan, maka aheka isab binu-anggul landuꞌ ahāp, ya makatōp karaya sultan. 8 Aniyaꞌ panohoꞌan sultan ma pasal inuman, hatina in luruk inān manjari anginum ma buwat kabayaꞌanna dangan maka dangan. Aniyaꞌ asal bay panohoꞌanna ma kamemon saga magbubuhat inuman, sinōꞌ amainum saga luruk inān ma buwat kabayaꞌan sigām pakaniya-pakaniya.
9 Aniyaꞌ isab paglami-lami bay pinaniyaꞌ eꞌ dayang-dayang Basti, ya hꞌnda sultan, ma saga karꞌndahan ya patꞌnnaꞌ ma astanaꞌ sultan Serses.
10 Ma llaw kapituꞌ, nilango-lango paꞌin sultan Serses eꞌ binu-anggul, magpanohoꞌan iya ma saga sosohoꞌanna yunuka pituꞌ hekana, ya niōnan si Mehuman, si Bista, si Harbona, si Bigta, si Abagta, si Setor maka si Karkas. 11 Sinohoꞌ sigām angāꞌ dayang-dayang Basti binowa pinaharap ni iya magkinorona, boꞌ supaya taꞌndaꞌ kalingkatna eꞌ saga luruk maka saga aꞌa bangsahan, ma sabab amanis iya niꞌndaꞌ. 12 Sagōꞌ tataꞌu paꞌin eꞌ si Basti bang ai panohoꞌan sultan ya pinasampay ni iya eꞌ saga sosohoꞌan eꞌ, magtūy iya maginꞌmbal. Angkan akagit toꞌongan atay sultan.
13 Na, ya kabiyaksahan sultan inān subay angaru ma saga aꞌana taga-pangitaꞌu ma baꞌanan addat maka saraꞌ, angkan bay bowana magsuli-suli saga aꞌa ya alalom pangitaꞌuna ma pasal waktu palabay maka waktu sinōng. 14 Ya pangaruhanna saga aꞌa pasunuꞌ ni iya, ya na disi Karsena, Setar, Admata, Tarsis, Meres, Marsena maka si Memokan, aꞌa bangsahan min bangsa Persiya maka bangsa Midiya. Sigām pituꞌ puhuꞌ itu aꞌa bangsahan, aꞌa asekot ni sultan maka alanga isab ma pagparintahanna.
15 Atilaw sultan Serses ma saga aꞌa itu, yukna, “Bang ma bowahan saraꞌtam, hukuman ai subay pinatꞌkka ni dayang-dayang Basti? Sabab halam bay bineyaꞌ eꞌna panohoꞌanku ya bay pinasampay ni iya eꞌ saga yunuk.”
16 Ati sinambungan eꞌ si Memokan panilaw sultan itu mainaꞌan ma matahan sultan maka saga aꞌana bangsahan, “Mbal taluwaꞌ bay hinang dayang-dayang Basti. Nggaꞌi ka sadja sultan ya nirusahan, sagōꞌ kamemon saga aꞌa bangsahan maka kamemon saga aꞌa ya maglahat ma pagsultanan sultan Serses. 17 Tantu patanyag ni kamemon karꞌndahan in bay hinang dayang-dayang Basti itu, ati amabiyal sigām ma kahꞌllaꞌan sigām. Ya yuk sigām, ‘Si sultan Serses bay magpanohoꞌan ma dayang-dayang Basti, sinohoꞌ paharap ni iya, sagōꞌ halam iya bay bineyaꞌ.’ 18 Ma llaw itu du, in saga dꞌnda alanga ma bangsa Persiya maka ma bangsa Midiya, sasuku bay makakale ma pasal palkalaꞌ itu, ameyaꞌ-meyaꞌ isab amabiyal ma saga kahꞌllaꞌan sigām, aꞌa kawakilan eꞌ sultan. Jari halam aniyaꞌ katobtoban ma pagsasaw maka paghalipulu ma sakalibut lahat.
19 “Na, tuwan sultan, bang makasulut ma kaꞌa, angahinang ka panohoꞌan saraꞌ pinasulat ma saga saraꞌ bangsa Persiya maka Midiya, ya mbal manjari pinindahan. In si Basti mbal na manjari makasekot ni matahan sultan Serses. Bang makasulut isab ma kaꞌa, tuwan sultan, in kapagdayang-dayang si Basti subay pinagantiꞌ ni dꞌnda saddī labi ahāp addatna min iya. 20 Jari bang tapatanyag na saraꞌ panohoꞌan sultan ma kamemon lahat ya beyaꞌ ma iya, kamemon saga karꞌndahan magaddat ma saga kahꞌllaꞌan sigām, ai na ka areyoꞌ atawa alanga.”
21 Kasulutan toꞌongan sultan maka saga aꞌana bangsahan ma garaꞌ itu, angkan bay bineyaꞌ eꞌna garaꞌ si Memokan. 22 Bay iya amabeyaꞌ sulat pasal panohoꞌan saraꞌ itu ni sakalibut pagparintahanna, ni kamemon paglahatna maka kamemon bangsana, pamataꞌu sigām in lꞌlla kamemon subay magnakuraꞌ ma anak-hꞌnda sigām. Sinulat isab ma bahasa maka sulatan sigām pakaniya-kaniya.