1 SAMWEL
Pahati pasal Jūd itu
Tasulat ma deyom Jūd 1 Samwel itu pasal saga pakaradjaꞌan bay paniyaꞌ min waktu saga maghuhukum ma Israꞌil sampay ni katagnaꞌ waktu saga magsusultan. Aniyaꞌ tꞌllungan aꞌa abantug tasabbut ma jūd itu: si Samwel ya maghuhukum katapusan, si Saꞌul ya sultan tagnaꞌ ma bangsa Israꞌil, maka si Daꞌud ya sultan pasunuꞌ ni Saꞌul. Tasalsila pasal bay kalabayan si Daꞌud dahū giꞌ min waktu kapagsultanna.
Ya pinagmuna-muna ma jūd itu panduꞌ pasal kahālan saga aꞌa sukuꞌ Tuhan bang angisbat iya maka mbal. Bang sigām amogbog ma saga panohoꞌanna, tantu kaniyaꞌan kahāpan. Malaingkan bang magtumagal tantu tꞌkkahan balaꞌ. Buwat pangallam Tuhan ni imam Eli, ya yuk-i, “Palangaku na paꞌin sasuku magmahaltabatan aku, sagōꞌ pareyoꞌku sasuku mbal magaddatan aku.” (1 Samwel 2:30)
Tasulat ma jūd itu pasal kaligotoꞌan ma takdil sin pagsultan. Tuhan ya asal bay niꞌitung sultan bangsa Israꞌil. Malaingkan, angangut sigām subay mikipatꞌnnaꞌ sultan buwat bangsa kaseheꞌ ya patꞌnnaꞌ ma katilibut sigām. Ya kaluwasanna nirūlan sigām eꞌ Tuhan maka aniyaꞌ sultan pameneꞌna ma sigām. Tasulat isab ma jūd itu in bangsa Israꞌil maka sultan sigām asal ma deyoꞌan kawasa maka hukuman Tuhan. In kamemon manusiyaꞌ, ai na ka miskin atawa dayahan, subay pinapagsibuꞌ buwat tasulat ma saraꞌ-panohoꞌan Tuhan ma bangsa Israꞌil. Ya itu patut subay tinukiran.