1 SAMWEL
1
JŪD SAMWEL KAISSANA
Palbahagiꞌan Kitab Jabul
Kapaganak ma si Samwel
1 Na, aniyaꞌ dakayuꞌ lꞌlla niōnan si Elkana maglahat ma kauman Rama ma kabūd-būran Epraꞌim. Panubuꞌ Epraꞌim si Elkana itu, min tumpuk si Sūp. Mmaꞌna si Jeroham anak si Elihu, mpu si Tohu ya anak si Sūp. 2 Aniyaꞌ duwa hꞌnda si Elkana, ya si Hanna maka si Pennina. In si Pennina taga-anak boꞌ si Hanna halam.
3 Kahabaꞌ tahun atulak si Elkana min kaumanna patukad ni Silo supaya pasumba maka anukbal lalabotan ni si Yawe ya Tuhan Sangat Kawasa. Ya magimam ma Silo inān si Opni maka si Pinehas, karuwangan anak imam Eli. 4 Sakahabaꞌ waktu magkulban si Elkana, binahagiꞌan eꞌna si Pennina maka saga kaꞌanakanna. 5 Sagōꞌ labi ahāp bahagiꞌ ya pamuwanna ma si Hanna sabab kaheya lasana ma iya, minsan iya halam kabuwanan anak min kahandak PANGHŪꞌ-Yawe. 6 Na pagka halam kabuwanan anak si Hanna, sidda iya nijingki maka pinareyoꞌ-deyoꞌ eꞌ kaluꞌana si Pennina. 7 Tahun ni tahun buwattinaꞌan na paꞌin in kahālan. Sakahabaꞌ waktu katukad sigām ni lumaꞌ pagtataꞌatan ni si Yawe, nijural na paꞌin si Hanna eꞌ kaluꞌana sampay iya magtangis maka mbal na amangan. 8 Angkan ahꞌlling hꞌllana ni iya, yuk-i, “Oy rāng, angay ka anangis na paꞌin ilu? Angay ka mbal minsan amangan? Ai karukkaꞌannu? Kulang giꞌ bahāꞌ halgaꞌku ma kaꞌa min sangpūꞌ anak?”
9 Na dakayuꞌ waktu ma Silo, pagubus sigām amangan maka anginum, pabuhat si Hanna. Inaꞌan asal imam Eli aningkōꞌ ma bangkuꞌ ma atag bowaꞌ lawang lumaꞌ PANGHŪꞌ. 10 Na, landuꞌ aheya kasukkalan si Hanna angkan iya anangis toꞌongan maka eꞌna angamuꞌ-ngamuꞌ ni si Yawe. 11 Anganajal iya, yukna, “O Yawe Sangat Kawasa, ummatnu aku. Bang paꞌin ndaꞌnu kasukkalanku boꞌ aku palulinu pahāp. Bang aku dūlannu ati buwanannu anak lꞌlla, tukbalanku iya ni kaꞌa pabalik boꞌ maghinang ni kaꞌa satꞌggolna allum. Anganajal isab aku in kōkna mbal binagongan.”
12 Ma pangamuꞌ-ngamuꞌ si Hanna ni PANGHŪꞌ-Yawe, taꞌndaꞌ bowaꞌna eꞌ si Eli. 13 Magkimut-kimut sadja bowaꞌna, halam magsuwala. Pangannal si Eli in iya nilango, 14 angkan yukna ma iya, “Arung, angay ka maglango sadja ilu? Timanin binunu!”
15 “Halam aku nilango, tuwan,” yuk sambung si Hanna. “Tuꞌud aheya karukkaꞌanku. Halam aku maginum binu atawa ai-ai makalango, paluwasku sadja kasukkalanku ni si Yawe. 16 Daꞌa aku bistahun dꞌnda alaꞌat. Angamuꞌ-ngamuꞌ sadja aku sabab mbal kasandalan karukkaꞌanku itu.”
17 Ahꞌlling si Eli ni iya, “Pehēꞌ na ka amoleꞌ,” yukna, “bang paꞌin ka mura-murahan asalamat maka kinale pangamuꞌ-ngamuꞌnu eꞌ Tuhan bangsatam Israꞌil.”
18 Ya panambung si Hanna, “Magsukul. Bang paꞌin ka kasulutan ma aku, dakayuꞌ sosohoꞌannu itu.” Jari alaꞌan na si Hanna minnēꞌ. Aniyaꞌ isab takakanna ati ahāp na pamaihuꞌanna.
19 Pagꞌllaw dakayuꞌ paꞌin, subu-subu lagiꞌ, pabangun disi Elkana maka saga anak-hꞌndana boꞌ anumba ni PANGHŪꞌ-Yawe. Pagubus, amoleꞌ na sigām pabīng ni Rama ya lahat sigām. Pahulid si Elkana ni hꞌndana si Hanna ati nirūlan eꞌ si Yawe bay pangamuꞌna. 20 Jari abꞌttong iya ati taꞌabut paꞌin bulananna anganak iya lꞌlla. Niōnan eꞌna Samwel,a sabab, yukna, “bay iya amuꞌku min si Yawe.”
Pamasukuꞌ si Samwel ma Tuhan eꞌ si Hanna
21 Na, pagga taꞌabut na bulanan Paghinang Taubat, patukad disi Elkana magtaiꞌanak ni lahat Silo maghinang ni PANGHŪꞌ-Yawe, ati tatuman isab eꞌ si Elkana bay najalna ma iya. 22 Sagōꞌ halam ameyaꞌ patukad si Hanna. Yukna ni hꞌllana, “Subay na alutasb ondeꞌ itu boꞌ bowaku pehēꞌ, ati pamasukuꞌku iya ni PANGHŪꞌ. Jari mahēꞌ iya patꞌnnaꞌ satꞌggolna allum.”
23 “Hinangun bang ai ya makasulut kaꞌa,” yuk si Elkana. “Maitu sadja ka sampay talutasnu ondeꞌ ilu, bang paꞌin tatuman bay janjiꞌ PANGHŪꞌ ma kaꞌa.” Jari paꞌbba si Hanna ma lumaꞌ amaruruꞌ ondeꞌ inān sampay talutas eꞌna.
24 Manjari talutas paꞌin ondeꞌ inān, boꞌ arikiꞌ-dikiꞌ lagiꞌ, binowa na iya eꞌ inaꞌna ni lumaꞌ si Yawe ma Silo. Bay isab bowana dakayuꞌ sapiꞌ tꞌlluntahun umulna maka dakarut tirigu maka dapangisihan binu-anggul. 25 Tasumbaliꞌ paꞌin sapiꞌ heꞌ, niꞌndeꞌan na si Samwel ni si Eli eꞌ mattoꞌana. 26 Manjari anibahat si Hanna ma si Eli, yukna, “Sapahanku, tuwan, aku na dꞌnda ya bay anꞌngge maitu ma bihingnu angamuꞌ-ngamuꞌ ni PANGHŪꞌ. 27 Bay aku angamuꞌ anak ati nirūlan eꞌna pangamuꞌ-ngamuꞌku. 28 Angkan na buwattinaꞌan, pamasukuꞌku na ni iya ondeꞌ itu satꞌggolna allum.” Puwas paꞌin heꞌ-i, sinumba na si Yawe ma atag inaꞌan.