2
Sambahayang si Hanna
1 Manjari anambahayang si Hanna, yukna,
“Akōg-koyag pangatayanku ma pasal si Yawe,
Pinajatu kosogku ma sabab si Yawe,
angkan pagtittowahanku saga bantaku,
magkalasigan aku ma sabab daꞌugan
ya pamuwannu ma aku, O Tuhan.
2 Halam aniyaꞌ manusiyaꞌ asussi buwat kasussi si Yawe.
Sapantun iya Batu Lakit pasindungan,
halam aniyaꞌ makasibuꞌan iya.
3 Sasuku kam magmalangkahi subay pahali.
Sasuku kam magabbu-abbu subay pabba,
sabab si Yawe ya makataꞌu kamemon.
Iya ya angahukum kamemon kahinangan manusiyaꞌ.
4 Taraꞌug saga sundalu magpapanaꞌ ya tamakaesog,
saguwāꞌ sasuku bay lumukbuꞌ
binuwanan kosog labi-labihan.
5 Sasuku bay asso tagnaꞌ magpatiata na
boꞌ aniyaꞌ balanjaꞌ sigām,
sagōꞌ saga aꞌa bay patay otas mbal na lingantu.
Sasuku bay mbal makaꞌanak,
makaꞌanak na pituꞌ hekana,
sagōꞌ in bay aheka anakna asiya-siya du.
6 Taga-kapatut si Yawe amakallum maka amapatay,
amowa saga manusiyaꞌ ni ahirat
maka amangun sigām.
7 Makaparaya iya baꞌanan aꞌa miskin
ati makapamiskin baꞌanan aꞌa dayahan,
makapamareyoꞌ iya maka makapamalanga.
8 Tahaun eꞌna saga miskin min kasigpitan sigām,
tapaluwas sigām min kaiyaꞌan.
Pinatingkōꞌ sigām magbeyaꞌ maka baꞌanan kasultanan
boꞌ supaya sigām pinagmahaldikaꞌ.
Si Yawe asal tag-sukuꞌan alam maka poꞌonanna,
ya pamapanjarihanna dunya maka kapanyapanna.
9 Jagahanna sasuku sigām amꞌnnal ma iya,
sagōꞌ in aꞌa jahulakaꞌ amatay ma deyom kalendoman.
Halam aniyaꞌ makapangandaꞌug bang hal min kosogna.
10 Magmula isab sai-sai anaggaꞌ si Yawe.
Pinalꞌggonan sigām eꞌna min langit.
Si Yawe ya angahukum katilingkal dunya.
Aheya kosog pamuwanna ma aꞌa ya tahinangna sultan,
aheya daꞌugan ya pamuwanna ma aꞌa bay tapeneꞌna.”
11 Manjari, amoleꞌ na pabalik si Elkana maka si Hanna ni Rama. Sagōꞌ ya si Samwel taꞌbba ma Silo maghinang ni PANGHŪꞌ-Yawe ma deyoꞌan si Imam Eli.
Paldusahan saga Anak si Eli Lꞌlla
12 Na saga anak si Eli itu alaꞌat kahinangan sigām, mbal magaddatan PANGHŪꞌ. 13 Mbal isab sigām ameyaꞌ ma kauntulan ya bineyaꞌ eꞌ saga kaimaman bang aniyaꞌ susumbaliꞌan binowa panukbal ni Tuhan. Ma pamꞌllahan paꞌin isi susumbaliꞌan inān, pinapehēꞌ dakayuꞌ sosohoꞌan imam amowa tugsukna aheya. 14 Jari ai-ai tatugsuk eꞌ sosohoꞌan inān, ai na ka ma kahaꞌ atawa ma kaldero, ya na sukuꞌ imam. Buwattēꞌ na paꞌin addat kaimaman ma saga bangsa Israꞌil waktu kapehēꞌ sigām ni Silo. 15 Sagōꞌ buwattinaꞌan, ma halam lagiꞌ tatunuꞌ lanab sumbaliꞌan, aniyaꞌ sosohoꞌan imam pinapehēꞌ ahꞌlling ni aꞌa magtukbal. Yukna, “Pamuwanun ma imam susumbaliꞌan amataꞌ ilu boꞌ tinapa eꞌna. Mbal tinaimaꞌ eꞌna bang talagaꞌ na, luwal subay amataꞌ.”
16 Bang anambung aꞌa magtukbal inān, yukna, “Subay atunuꞌ lanabna boꞌ ka angāꞌ ya ingga kabilahiannu,” na, pinahꞌllingan iya eꞌ sosohoꞌan imam eꞌ. Yukna, “Hē! Mbal makajari! Sōngin na magtūy sabab bang ka mbal bilahi, agawku sadja min kaꞌa.”
17 Na, landuꞌ asammal ma pangꞌndaꞌ PANGHŪꞌ bay kahinangan saga anak si Eli itu sabab talumuꞌ heꞌ sigām lalabotan ya tinukbal ma iya.
Si Samwel ma Silo
18 Malaingkan, inaꞌan si Samwel maghinang na ni si Yawe minsan iya abataꞌ giꞌ. Magbinadjuꞌ iya epod pangalampik jubana. 19 Tahun ni tahun, nihinangan si Samwel juba heꞌ inaꞌna, binowahan iya ma waktu katukad si Hanna maka hꞌllana pehēꞌ boꞌ maghinang Pagtaubat. 20 Jari, niamuꞌan barakat disi Elkana maglakibini eꞌ si Eli. Yukna, “Mura-murahan bang paꞌin kam kabuwanan anak eꞌ PANGHŪꞌ min hꞌndanu itu pagantiꞌ min ondeꞌ bay amuꞌna ma iya ati bay du tukbalanna pabalik ni iya.” Pagubus, amoleꞌ na sigā. 21 Manjari, pinagkaꞌinagonan si Hanna eꞌ PANGHŪꞌ-Yawe ati kabuwanan giꞌ iya tꞌllu anak lꞌlla maka duwa anak dꞌnda. Jari pasulig na paꞌin si Samwel hinabuna maghinang ni si Yawe.
22 Na, minsan atoꞌa na si Eli, takale eꞌna pasal kamemon kalumuꞌan ya nihinang eꞌ saga anakna lꞌlla ma saga bangsa Israꞌil. Maka takale du isab eꞌna pasal paghulid sigām maka saga karꞌndahan ya maghinang ma Lumaꞌ Tolda Pagsasabuhan inān. 23 Angkan ahꞌlling si Eli ni saga anakna, yukna, “Takaleku min saga aꞌa in kahinanganbi asammal! Angay kam magkahinangan buwattilu? 24 Saga anak, halliꞌinbi na saga kahinanganbi ilu sabab alaꞌat kinale suli-suli ya pasaplag inān ma baꞌanan jamaꞌa PANGHŪꞌ.” 25 Ahꞌlling giꞌ si Eli, yukna, “Bang aꞌa makarusa ma pagkahina manusiyaꞌ, makapatiꞌllot Tuhan ma sigām. Sagōꞌ bang aꞌa makarusa ma PANGHŪꞌ, na sai na giꞌ magpatiꞌllot ma iya?” Saguwāꞌ mbal ameyaꞌ saga anak si Eli ma pamiꞌatna, sabab asal kahandak PANGHŪꞌ pinapatay sigām.
26 Na, pasōng na paꞌin paheya si Samwel maka pasōng taꞌuna. Pasōng isab iya makasulut atay PANGHŪꞌ sampay manusiyaꞌ.
Hukuman Pamatꞌkka ni Mataꞌan si Eli
27 Dakayuꞌ llaw, aniyaꞌ aꞌa sosohoꞌan Tuhan pinapehēꞌ ni si Eli amasampayan iya lling, yukna, “Buwattitu ya pangallam si Yawe ma kaꞌa, ‘Bay aku magpanyataꞌ ma kaꞌmboꞌ-mboꞌannu si Harun waktu sigām ma lahat Misil ma deyoꞌan pagparinta Piraꞌun. 28 Bay tapeneꞌku si Harun min kamemon kapanubuꞌan bangsa Israꞌil boꞌ supaya iya pinatꞌnnaꞌ imam maghinang ma lugal pagtutukbalan ni aku, maka anunuꞌ kamanyan, maka amowa epod ma waktu kasōdna ni matahanku. Bay isab buwananku bahagiꞌ ma saga imam min baꞌanan lalabotan ya tinunuꞌan aku heꞌ bangsa Israꞌil. 29 Jari angay halipulubi saga kukulbanan maka lalabotan ya bay sohoꞌku tinukbalan ma Lumaꞌku? Angay paheyanu saga anaknu labi giꞌ min aku? Sabab ilu pagnapsuhanbi isi sumbaliꞌan ahāp toꞌongan ya ngāꞌbi min saga kukulbanan kamemon bay panukbal ma aku eꞌ saga aꞌaku bangsa Israꞌil!’ ”
30 Amissala giꞌ sosohoꞌan Tuhan inān, yukna, “Angkan buwattitu pangallam si Yawe ya Tuhanbi bangsa Israꞌil, yuk-i, ‘Tagnaꞌ, aniyaꞌ bay panganjanjiꞌku ma kaꞌam panubuꞌ si Libi, lubaꞌna kaꞌam ma tumpukan mmaꞌnu, subay magimam ni aku ni kasaumulan. Sagōꞌ mbal na. Palangaku na paꞌin sasuku magmahaltabatan aku, sagōꞌ pareyoꞌku sasuku mbal magaddatan aku. 31 Kalehun pahāp, atꞌkka du waktu papuꞌutku umulnu maka umul saga anak-mpunu, jari halam aniyaꞌ ma panubuꞌnu magkatoꞌa. 32 Angkan magkarukkaꞌan kam ati mbal na takinambi kahāpan ya pamuwanku ma bangsa Israꞌil. Halam na aniyaꞌ min panubuꞌnu makaꞌabut katoꞌa sigām. 33 Bꞌnnal aniyaꞌ tubuꞌnu pasagaranku magimam ma matahanku, sagōꞌ binuta iya sampay makananam karukkaꞌan landuꞌ bisana. Jari in kahekaꞌan panubuꞌnu pinatay bonoꞌ ma sinosōng.
34 “ ‘Ya paltandaꞌan, magdoraꞌ amatay karuwangan anaknu, si Hopni maka si Pinehas, ma dangꞌllaw. 35 Ati paniyaꞌku imam dakayuꞌ, aꞌa kapangandolanku, lillaꞌ angahinang kamemon maksudku maka kabayaꞌanku. Patumanku saga panubuꞌna boꞌ aniyaꞌ min sigām maghinang ma matahan sultan ya peneꞌku sampay ni kasaumulan. 36 Manjari, in kamemon takapin ma panubuꞌnu magpatireyoꞌ ma iya angamuꞌ takakan maka pilak. Angamuꞌ sigām junjung bang paꞌin sigām binuwanan hinang minsan ai na ma saga imam, supaya aniyaꞌ takakan sigām.’ ”