3
Nilinganan si Samwel eꞌ Tuhan
1 Anubul-nubul paꞌin si Samwel, maghinang iya ni PANGHŪꞌ-Yawe ma deyoꞌan si imam Eli. Ma waktu inaꞌan, alahang si Yawe amissala ni manusiyaꞌ maka alahang aniyaꞌ manusiyaꞌ pinakalehan suwalana.
2 Dakayuꞌ sangom, inaꞌan si Eli atuli ma bilikna. Ahawhaw na pangꞌndaꞌna, mbal na agon makapatong pahāp. 3 Si Samwel isab inaꞌan abahak ma luwasan bilik pagpatꞌnnaꞌan Baꞌul Tuhana ya ma deyom Lumaꞌ Pagtataꞌatan ni PANGHŪꞌ-Yawe. Ma halam lagiꞌ apꞌdda palitaꞌan, 4 nilinganan si Samwel eꞌ si Yawe. Anambung iya, yukna, “ Owaꞌ, itiyaꞌ!” 5 Magtūy iya paraiꞌ-daiꞌ pehēꞌ ni si Eli. “Itiyaꞌ aku,” yukna. “Bay aku linganannu.”
Sagōꞌ anambung si Eli, yukna, “Halam ka bay lingananku, pehēꞌ ka atuli pabalik.” Angkan pabalik si Samwel ni pabahakanna.
6 Manjari, angalingan pabalik si Yawe, yukna, “Samwel!”
Magtūy pabungkal si Samwel boꞌ pehēꞌ ni si Eli, “Itiyaꞌ aku,” yukna. “Bay aku linganannu.”
Ahꞌlling si Eli ni iya, “Otoꞌ,” yukna, “halam aku bay angalingan. Pehēꞌ na ka pabalik ni patulihannu.” 7 Ma waktu inaꞌan, akulang giꞌ panaꞌu si Samwel pasal PANGHŪꞌ-Yawe, maka halam giꞌ aniyaꞌ palman PANGHŪꞌ bay pamukis ma iya.
8 Jari, angalingan na isab si Yawe ma si Samwel, katꞌlluna na. Magtūy iya magdaiꞌ-daiꞌ pehēꞌ ni si Eli maka heꞌna ahꞌlling, “Itiyaꞌ aku,” yukna. “Bay du aku linganannu.”
Na tasayu eꞌ si Eli, si Yawe ya angalinganan ondeꞌ inān. 9 Angkan iya ahꞌlling ma si Samwel, yukna, “Otoꞌ, pabahak ka pehēꞌ. Bang ka nilinganan pabīng, anambung ka buwattitu yuknu, ‘Ya PANGHŪꞌ, amissala na ka sabab akale du sosohoꞌannu itu.’ ” Manjari, pabīng na si Samwel ni pabahakanna.
10 Na, magpanyataꞌ na si Yawe ma si Samwel maka eꞌna angalingan buwat bay dahū. Yukna, “Samwel! O Samwel!”
Anambung si Samwel, yukna, “Amissala ka konoꞌ, sabab akale du sosohoꞌannu itu.”
11 Ahꞌlling si Yawe ma si Samwel, “Kalehun lapal itu!” yukna. “Aniyaꞌ hinang makatāw-tāw song hinangku ma deyom bangsa Israꞌil, ati takꞌbbal atay sasuku makakale. 12 Ma waktu inaꞌan, hinangku du kamemon bay pangallamku ma pasal saga panubuꞌ si Eli. 13 Bay na iya asal hakaꞌanku pasalan hukuman ya pamatꞌkkaku ma panubuꞌna. Sabab halam nilāng eꞌna kalumuꞌan ya bay nihinang eꞌ saga anakna, minsan du bay kataꞌuwanna. 14 Angkan aku bay anapa pasal saga panubuꞌ si Eli, yukku, ‘Mbal taꞌampun paldusahan sigām minsan ai tataubatan atawa lalabotan.’ ”
15 Manjari, tatuli na pabalik si Samwel sampay subu. Pagbatiꞌna paꞌin, niukab heꞌna lawang Lumaꞌ Pagtataꞌatan ni PANGHŪꞌ-Yawe heꞌ. Tināw iya amissalahan si Eli pasal bay takalena min Tuhan, 16 sagōꞌ nilinganan iya eꞌ si Eli. “Samwel! Otōꞌ!” yukna.
Jari anambung si Samwel yukna, “Oy itiyaꞌ aku.”
17 Atilaw si Eli yukna,“Ai bay pamissala Tuhan ma kaꞌa? Daꞌa limbungin min aku. Patut ka pinatꞌkkahan mulkaꞌ kaginisan eꞌ Tuhan bang ka gantaꞌ maglimbung ai-ai bay llingna ma kaꞌa.” 18 Angkan nihaka kamemon eꞌ si Samwel, halam iya maglimbung. Jari ahꞌlling si Eli, “In iya Tuhan-asal-Tuhan taga-kapatut angahinang bang ai kabayaꞌanna.”
19 Manjari, pataptap PANGHŪꞌ-Yawe ma si Samwel sampay iya paheya, angkan atuman kamemon pahꞌllingna. 20 Takilā iya eꞌ kamemon bangsa Israꞌil min lahat Dān sampay ni Beꞌerseba, in iya nabi si Yawe. 21 Tinagnaꞌan minnēꞌ, magpaꞌndaꞌ na paꞌin PANGHŪꞌ ma si Samwel ma Silo ati mainaꞌan iya amakilā di-na labay min lapalna.