4
1 Manjari itu, pasaplag na lapal si Samwel ma kaluhaꞌan bangsa Israꞌil.
Taꞌagaw Baꞌul Paljanjiꞌan eꞌ Bangsa Pilistin
Na paluwas saga sundalu Israꞌil min pustu sigām boꞌ magbonoꞌ maka bangsa Pilistin. Inaꞌan bangsa Israꞌil magpustu ma atag Ebenesera ati ma Apek ya pagpustuhan bangsa Pilistin. 2 Manjari magsakap saga sundalu Pilistin angandugpak bangsa Israꞌil. Aheya landuꞌ bonoꞌ ma llaw inān, jari taraꞌug bangsa Israꞌil, aniyaꞌ saga mpat ngibu heka sigām amatay mainaꞌan ma pagbonoꞌan. 3 Makapoleꞌ paꞌin ni pustu saga sundalu Israꞌil ya takapin allum, tinilaw sigām heꞌ pagmattoꞌahan bangsa Israꞌil, yuk-i, “Angay angkan kitam pinasagaran eꞌ PANGHŪꞌ-Yawe boꞌ taraꞌug eꞌ baꞌanan bangsa Pilistin? Ahāp lagiꞌ kitam pehēꞌ ni Silo angāꞌ Baꞌul Paljanjiꞌan si Yawe boꞌ pagapiꞌ ma kitam amuwasan kitam min gaꞌosan saga bantatam.”
4 Manjari, magpanohoꞌan sigām saga aꞌa pehēꞌ ni Silo angāꞌ Baꞌul Paljanjiꞌan si Yawe Sangat Kawasa, ya aningkōꞌ asal min llot duwa malaꞌikat pikpikan, ya ma saꞌob baꞌul inān. Inaꞌan isab karuwangan anak si Eli, ya si Opni maka si Pinehas, bay ameyaꞌ ma Baꞌul Paljanjiꞌan eꞌ.
5 Pagtꞌkka paꞌin Baꞌul Paljanjiꞌan si Yawe ni pustu bangsa Israꞌil, magtūy sigām magolang pakosog toꞌongan angkan ajogjog sampay tanaꞌ. 6 Pagkale saga bangsa Pilistin ma pagolang bangsa Israꞌil itu, magtilawan sigām di-sigām, yuk-i, “Ai bahāꞌ kahiyulan saga Hibrani heꞌ?” Makataꞌu paꞌin saga bangsa Pilistin, inaꞌan Baꞌul si Yawe bay binowa ni pustu bangsa Israꞌil, 7 magtūy sigām sinōd tāw. “Arōy!” yuk sigām. “Aniyaꞌ tuhan mainaꞌan ma pustu. Mamarahi na kitam itu! Yampa aniyaꞌ buwattitu! 8 Magmula na kitam! Halam aniyaꞌ angalappas kitam min kawasa saga tuhan gaꞌosan itu! Ya na koꞌ inaꞌan saga tuhan bay amatꞌkka balaꞌ kaginisan ma bangsa Misil ma lahat paslangan heꞌ. 9 Oy! Kaꞌam saga bangsa Pilistin, pakuyas kam amonoꞌ. Paesog kam angatu, sabab bang mbal, tabanyagaꞌ kitam eꞌ saga Hibrani itu, buwat bay pamanyagaꞌtam ma sigām!”
10 Angkan amonoꞌ pakosog toꞌongan saga aꞌa Pilistin ati taraꞌug eꞌ sigām bangsa Israꞌil. Makalanduꞌ aheka abugtang, tꞌllumpūꞌ ngibu heka sundalu Israꞌil amatay. Jari sasuku bay takapin waꞌi maglahian amoleꞌ ni pustu sigām. 11 Taꞌagaw eꞌ bangsa Pilistin Baꞌul Tuhan min saga bangsa Israꞌil maka amatay isab si Hopni maka si Pinehas, karuwangan anak si Eli.
Kamatay si Eli
12 Na, ma llaw du inaꞌan, aniyaꞌ dakayuꞌ lꞌlla min panubuꞌ Benjamin bay makalahi min pagbonoꞌan tudju ni Silo. Gineret eꞌna badjuꞌna maka kapēꞌan bagunbun kōkna, tandaꞌ pagdukkana. 13 Pagtꞌkkana na ni Silo, inaꞌan asal si Eli ma tingkōꞌanna ma bihing lān amantaw, sabab asusa pangatayanna ma pasalan Baꞌul Tuhan. Manjari paghaka lꞌlla inān ma bay paniyaꞌ ma pagbonoꞌan, magtūy maglemongan kamemon aꞌa ma kauman inān. 14-15 Ma waktu inān, siyampūꞌ na maka waluntahun umul si Eli, mbal na makaꞌndaꞌ, hal amantaw sadja. Jari takale paꞌin eꞌ si Eli pagalud inān, atilaw iya, “Angay angkan magpangalud saga aꞌa itu?”
Sinekot iya magtūy eꞌ aꞌa bay makalahi inān. 16 “Tuwan,” yukna, “yampa aku alahi piꞌitu min pagbonoꞌan.”
Atilaw pabalik si Eli, “Otoꞌ,” yukna, “ai bay tumꞌkka ni kaꞌam?”
17 Ya sambung aꞌa inān, “Tuwan,” yukna, “maglahian saga sundalu Israꞌil sabab taraꞌug eꞌ bangsa Pilistin. Kamatayan aheka aꞌatam ati talapay anaknu si Hopni maka si Pinehas. Taꞌagaw isab Baꞌul Tuhan.”
18 Pagkale si Eli ma pasalan baꞌul eꞌ, magtūy iya pahantak min paningkōꞌan mainaꞌan ma atag pagsosōran ni kauman. Pahantak iya ni buliꞌan ati apōng buliꞌ-kꞌllongna. Jari amatay na iya sabab atoꞌa na iya maka landuꞌ alꞌmmok. Mpatpūꞌ tahun bay kapagmakōkna ma bangsa Israꞌil.
19 Na, ma waktu inān, bulanan na ayuwan si Eli, ya hꞌnda si Pinehas. Pagkale dꞌnda itu ma habal pasal Baꞌul Tuhan bay taꞌagaw eꞌ bangsa Pilistin, maka waꞌi amatay hꞌllana maka matoꞌana, kapꞌddiꞌan iya sampay anganak. Sagōꞌ kahunitan sidda iya ma paganakna. 20 Magkamamatay paꞌin iya, amūng saga panday, yuk-i, “Ndūꞌ nneng, daꞌa ka tināw. Ndaꞌun ba, lꞌlla koꞌ anaknu itu.” Sagōꞌ halam iya makasambung minsan ai.
21-22 Ma halam lagiꞌ iya amatay, Ikabod ya pangōnna ma ondeꞌ inān. “Sabab,” yukna, “waꞌi paokat in sahaya Tuhan min bangsa Israꞌil.” Angkan iya makapahꞌlling buwattēꞌ sabab waꞌi na bay taꞌagaw Baꞌul Tuhan eꞌ bangsa Pilistin, maka in hꞌllana maka matoꞌana waꞌi na amatay.