5
Baꞌul Paljanjiꞌan ma Daꞌira Asdod maka Ekron
1 Na, pagga taꞌagaw Baꞌul Tuhan eꞌ bangsa Pilistin, binowa na eꞌ sigām min Ebeneser tudju ni Asdod ya daꞌira sigām. 2 Manjari, ma Asdod paꞌin, binowa Baꞌul itu ni deyom langgal pagsusumbahan si Dagon ya pagtuhanan sigām boꞌ pinapagbihing maka taꞌu-taꞌuna. 3 Pagꞌllaw dakayuꞌ paꞌin, subu-subu lagiꞌ, pasōd saga aꞌa Asdod ni langgal si Dagon inān. Pagsōd itu, taꞌndaꞌ taꞌu-taꞌuna pakutung ma lantay, saliꞌ hantang pasujud ma dahuwan Baꞌul si Yawe! Jari pinatꞌngge taꞌu-taꞌu inān eꞌ sigām ni asal bay pamatꞌnnaꞌan iya. 4 Saguwāꞌ, pagꞌllaw dakayuꞌ na isab, waꞌi na isab taꞌu-taꞌu si Dagon pakutung pabalik. Ya du, saliꞌ pasujud ma dahuwan Baꞌul si Yawe! Magkapōng-pōng kōkna maka tanganna inaꞌan ma bowaꞌ lawang. Hal du baranna ya takapin tibuꞌuk. 5 Ya itu sababanna angkan sampay ni buwattinaꞌan saga imam Pilistin atawa sai-na ma Asdod mbal pagiꞌik ma bowaꞌ lawang bang pasōd ni langgal si Dagon inān.
6 Na, pinatꞌkkahan eꞌ PANGHŪꞌ-Yawe balaꞌ mamarahi bisana ma katilibut Asdod maka saga kauman ma jadjahan inaꞌan. Kapēꞌan sigām saga butig aꞌaslag ma baran sigām. 7 Pagꞌndaꞌ saga aꞌa Asdod ma bay tumaluwaꞌ ni sigām inān, ahꞌlling sigām ni dangan-parangan, yuk-i, “Halam dapat! Mbal manjari patꞌnnaꞌ maitu in Baꞌul Tuhan bangsa Israꞌil, sabab itiyaꞌ kitam binantahan eꞌna. Tantu kitam magmula sampay tuhantam si Dagon.” 8 Manjari pinalinganan kamemon pagnakuraꞌan bangsa Pilistin ati tinilaw sigām, yuk-i, “Ai na hinangtam ma Baꞌul ya sukuꞌ pagtuhanan bangsa Israꞌil itu?”
Ya sambung sigām, “In baꞌul sukuꞌ tuhan bangsa Israꞌil ilu subay pinapinda ni daꞌira Gāt.” Angkan pinapinda Baꞌul inān.
9 Saguwāꞌ, bay paꞌin itu pinapinda ni Gāt, pinatꞌkkahan balaꞌ daꞌira inān eꞌ PANGHŪꞌ-Yawe. Ahiluhalaꞌ katilibut paglahat mainaꞌan sabab bay du isab pinatꞌkkahan butig kamemon saga manusiyaꞌ, min ondeꞌ-ondeꞌ ni mattoꞌana. 10 Angkan bay pinalanjal Baꞌul Tuhan inān min Gāt ni daꞌira Ekron.
Hinabu binowa pasōd Baꞌul inān ni daꞌira Ekron, magpangolang saga aꞌa mainaꞌan, yuk sigām, “Arōy! Itiyaꞌ na baꞌul sin tuhan bangsa Israꞌil binowahan kitam supaya kitam alaglag!” 11 Manjari, pinatimuk kamemon pagnakuraꞌan ma bangsa Pilistin ati ahꞌlling saga aꞌa Ekron ma sigām, yuk-i, “Palaꞌanunbi mꞌnnitu in Baꞌul Tuhan Israꞌil ilu ati pabalikunbi pehēꞌ ni bay asal patꞌnnaꞌanna. Mamarahi na toꞌongan kitam itu, magkamatay kamemon!” Angkan buwattēꞌ pahꞌlling saga aꞌa inān sabab sinōd tāw makapatay. Tuꞌud landuꞌ abisa in balaꞌ pinatꞌkkahan sigām eꞌ Tuhan. 12 Na, sasuku sigām halam amatay eꞌ balaꞌ, bay katꞌkkahan butig aheka. Jari in pagaruhuy saga aꞌa ma daꞌira inān paꞌabut sampay ni langit.