6
Pinabalik Baꞌul Paljanjiꞌan
1 Taꞌabut paꞌin pitumbulan tꞌggol Baꞌul si Yawe ma lahat Pilistin, 2 pinalinganan pinaꞌan saga kaimaman maka saga magpuputikaꞌ eꞌ saga aꞌa Pilistin boꞌ supaya pangaruhan eꞌ sigām. Yuk panilaw sigām, “Ai subay hinang kami ma Baꞌul si Yawe itu? Hakaꞌinbi kami bang buwattingga eꞌ kami amabalik iya ni bay patꞌnnaꞌanna tagnaꞌ?”
3 Anambung saga aꞌa pangaruhan itu, yuk-i, “Ebot-ebot, bang kam anganggaraꞌ amabalik baꞌul ya sukuꞌ tuhan bangsa Israꞌil, daꞌa pabalikunbi ma halam aniyaꞌ ai-aina pinabeyaꞌ. Pabeyaꞌunbi isab tutukbalan pagtaubatan dusabi boꞌ kam kauliꞌan, ati minnēꞌ kataꞌuwanbi bang angay kam pinatꞌkkahan balaꞌ eꞌ Tuhan.”
4 Sakali anilaw saga aꞌa Pilistin, yuk sigām, “Tutukbalan taubat ai ya patut pamuwan kami ma tuhan itu?”
Anambung saga imam maka saga magpuputikaꞌ inān, yuk-i, “Angahinang kam bulawan pinakaluwa butig maka ambaw. Subay lima-lima hekana buwat du isab heka saga pagnakuraꞌan bangsa Pilistin. Sabab magsaliꞌ du balaꞌ ya makataluwaꞌ ni kaꞌam maka ni saga pagnakuraꞌanbi. 5 Angahinang kam bulawan pinaꞌanggil ni butig maka ni ambaw ya angamula kaluhaꞌan paglahattam itu, ati tukbalinbi ni Tuhan bangsa Israꞌil tandaꞌ sin pamaheyabi ma iya. Kalu iya mura-murahan maꞌaseꞌ ma kaꞌam ati laꞌananna balaꞌ ya pamatꞌkkana ni kaꞌam maka ni saga tuhanbi sampay lahatbi. 6 Daꞌa kam magmatuwas. Daꞌa kam pasaliꞌ ni bay kahinangan Piraꞌun maka saga bangsa Misil ma waktu tagnaꞌ heꞌ. Subay sadja bay makalanduꞌ kabinsanaꞌan pinatꞌkkahan sigām eꞌ Tuhan boꞌ yampa sigām anugutan saga bangsa Israꞌil alaꞌan minnēꞌ.”
7 Na, magpanohoꞌan saga imam bangsa Pilistin maka saga magpuputikaꞌ inān. Yuk sigām, “Pasakapunbi karitun bahaꞌu, maka angāꞌ kam duwa sapiꞌ duruꞌan halam giꞌ bay kapangangguyuran karitun. Pahengkotunbi sapiꞌ ilu ni karitun, sagōꞌ pasaddīhun saga anak-anakna ma deyom kamalig. 8 Jari duwaꞌunbi Baꞌul si Yawe pehēꞌ ni karitun. Ati patꞌnnaꞌunbi isab ma bihing baꞌul ilu dakayuꞌ tuꞌung pangisihan saga tataubatan bulawan ya tukbalanbi ni iya. Taruwaꞌ paꞌin, palꞌngnganunbi saga sapiꞌ angangguyud karitun ilu piꞌingga-piꞌingga patudjuhanna. 9 Sagōꞌ ndaꞌunbi na paꞌin. Bang patudjuhanna ilu Bet-Semes ya ma lahat bangsa Israꞌil, minnēꞌ kataꞌuwantam si Yawe ya bay amatꞌkkahan kitam balaꞌ itu. Sagōꞌ bang saddī patudjuhan, na nggaꞌi ka iya ya bay angamulahan kitam. Tuꞌud magsaltaꞌ sadja.”
10 Jari bineyaꞌ eꞌ saga aꞌa Pilistin panohoꞌan inān. Ningāꞌ eꞌ sigām duwa sapiꞌ dꞌnda boꞌ pinaengkot ma karitun. Saga anak-anakna bay pinagal ma kamalig. 11 Sakali, pinaruwaꞌ na Baꞌul si Yawe inān ni karitun pinapagbeyaꞌ maka tuꞌung ya pangisihan saga bulawan bay pinaꞌanggil ni ambaw maka butig eꞌ. 12 Manjari itu, lumꞌngngan na saga sapiꞌ inān maginꞌngngong.a Amontolan sigām tudju ni Bet-Semes ma halam pagbekloꞌ-bekloꞌna, ai na ka ni kowan atawa ni gibang. Inaꞌan paurul ma buliꞌan saga pagnakuraꞌan bangsa Pilistin sampay ni bihing kauman Bet-Semes.
13 Inaꞌan isab saga aꞌa Bet-Semes magani pai-tirigu ma kapantayan. Jari pagtongas sigām, taꞌndaꞌ eꞌ sigām Baꞌul Tuhan angkan landuꞌ sigām kinōgan. 14 Makatꞌkka paꞌin karitun inān ni huma si Yussaꞌ aꞌa Bet-Semes, pahoggaꞌ na ma bihing dakayuꞌ batu aheya. Paghoggaꞌ paꞌin itu, ningāꞌ eꞌ saga aꞌa mainaꞌan kayu bay pangahinang karitun eꞌ boꞌ tinꞌttaꞌ pangayu. Sinumbaliꞌ isab saga sapiꞌ heꞌ boꞌ tinunuꞌ tutukbalan pagtaubat ni PANGHŪꞌ-Yawe. 15 Nihawas baꞌul eꞌ saga kalꞌllahan panubuꞌ si Libib, beyaꞌ isab maka tuꞌung ya isihan pamulawan bay pinaꞌanggil ni butig maka ambaw. Tahawas paꞌin, bay pinabangkat eꞌ sigām ni diyataꞌ batu aheya. Jari ma llaw inaꞌan du, saga aꞌa kamemon ya patꞌnnaꞌ ma Bet-Semes bay anukbal ni PANGHŪꞌ-Yawe saga susumbaliꞌan pinagtunuꞌ maka lalabotan pagtaubat. 16 Taꞌndaꞌ paꞌin kahinangan itu eꞌ saga lima pagnakuraꞌan bangsa Pilistin ya bay paurul eꞌ, magtūy sigām amoleꞌ pabalik ni Ekron, ma llaw inaꞌan du.
17 Na, in butig bulawan ya pinabeyaꞌ eꞌ bangsa Pilistin pagtaubat ni si Yawe, bay lima hekana boꞌ pinapagkaniya-kaniya ma saga pagnakuraꞌan sigām lima hekana isab. Hatina dakayuꞌ ma Asdod, dakayuꞌ ma Gasa, dakayuꞌ ma Askelon, dakayuꞌ ma Gāt maka dakayuꞌ isab ma Ekron. 18 Damikiyanna isab saga ambaw bulawan, pinapagkaniya-kaniya ma saga kutaꞌ maka kauman ya sukuꞌ pagnakuraꞌan bangsa Pilistin lima hekana heꞌ. Ya batu aheya isab bay pamatꞌnnaꞌan Baꞌul si Yawe, inaꞌan masi ma huma si Yussaꞌ aꞌa Bet-Semes, pamandogahan ma bay paniyaꞌ mahēꞌ. 19 Sagōꞌ aniyaꞌ aꞌa pitumpūꞌ hekana bay pinapatay eꞌ Tuhan ma sabab kapangꞌndaꞌ sigām ni deyom Baꞌul eꞌ. Sakali magdukka saga lūng-kampung sigām ma pasalan hukuman bay pamatꞌnnaꞌ PANGHŪꞌ ma sigām. 20 Angkan sigām magpangaruhuy, yuk-i, “Sai bahāꞌ taga-kapatut paꞌalop ni si Yawe, ya Tuhan sussi itu? Sai pamabeyaꞌantam Baꞌul itu boꞌ supaya makalaꞌan min deyomantam?”
21 Angkan sigām bay amapehēꞌ saga sosohoꞌan patukad ni Kiriyat-Jarim angahakaꞌan saga aꞌa mainaꞌan pasal palkalaꞌ itu, yuk-i, “Itiyaꞌ pinabalik eꞌ saga bangsa Pilistin in Baꞌul si Yawe. Bang paꞌin kam piꞌitu boꞌ bowahunbi piꞌilu ni lahatbi.”