7
1 Manjari, in Baꞌul si Yawe bay ningāꞌ pehēꞌ ni Bet-Semes eꞌ saga aꞌa min Kiriyat-Jarim, ati binowa ni lumaꞌ si Aminadab mainaꞌan ma būd-būd. Si Eleyasar anak si Aminadab ya bay pinatꞌnnaꞌ anganjagahan Baꞌul si Yawe.
Kapagmakōk si Samwel ma Israꞌil
2 Atꞌggol kamainaꞌan Baꞌul Paljanjiꞌan ma Kiriyat-Jarim, aniyaꞌ saga duwampūꞌ tahun tꞌggolna. Ma waktu inān, magdohon sidda kamemon saga bangsa Israꞌil maka angamuꞌ-ngamuꞌ na paꞌin ni PANGHŪꞌ-Yawe. 3 Manjari ahꞌlling si Samwel ma mahadjanaꞌa Israꞌil kamemon, yukna, “Bang sabꞌnnal-bꞌnnal kam magtaubat min deyom ataybi boꞌ kam pabalik toꞌongan ni si Yawe, timaninbi na saga tuhan-tuhan maka taꞌu-taꞌu si Astoret ya pagtuhanan bangsa liyu. Pabontolunbi itikadbi ni si Yawe ya Tuhanbi. Ammalunbi iya sadja, ati tantu kam lappasanna min komkoman saga Pilistin itu.” 4 Angkan tinaikutan eꞌ bangsa Israꞌil kamemon saga Baꞌal maka Astoret ya bay pagtuhan-tuhanan sigām boꞌ angisbat ni si Yawe ma halam aniyaꞌ tuhan saddī.
5 Sakali ahꞌlling si Samwel ni saga aꞌa Israꞌil, yukna, “Patimuk kam kamemon ma kauman Mispa boꞌ kam amuꞌ-amuꞌanku ni PANGHŪꞌ-Yawe.” 6 Ma Mispa paꞌin, bay sigām angāꞌ boheꞌ boꞌ binuꞌusan ma matahan si Yawe pangahulmat sigām ma iya. Ma llaw du isab inān magpuwasa sigām kamemon, maka mainaꞌan isab sigām bay magsabꞌnnal ma PANGHŪꞌ-Yawe, yuk-i, “Bꞌnnal taga-dusa kami ma PANGHŪꞌ.” Manjari mainaꞌan ma Mispa si Samwel ya magmakōk ma bangsa Israꞌil.
7 Pagtaꞌu paꞌin bangsa Pilistin inaꞌan saga aꞌa Israꞌil magtipun ma Mispa, magtūy magsakap saga nakuraꞌ sigām boꞌ palanjal pinaꞌan bahasa angandugpak. Na, takale paꞌin habal itu eꞌ saga aꞌa Israꞌil, magtūy sigām magtāwan ma saga aꞌa Pilistin. 8 Sakali anganjunjung sigām ni si Samwel, yuk-i, “Palanjalun pangamuꞌ-ngamuꞌnu ni si Yawe ya Tuhantam boꞌ supaya kitam lappasanna min saga Pilistin itu.” 9 Sakali, aniyaꞌ bili-bili halam giꞌ talutasb bay ningāꞌ eꞌ si Samwel. Sinumbaliꞌ eꞌna boꞌ tinunuꞌ pagtukbalna pagtaubatan ni si Yawe. Angamuꞌ-ngamuꞌ na paꞌin si Samwel ni PANGHŪꞌ ma pasalan saga ummat Israꞌil, jari kinale pangamuꞌ-ngamuꞌna.
Taraꞌug Bangsa Pilistin eꞌ Bangsa Israꞌil
10 Na, hinabu si Samwel magtukbal tataubatan ni Tuhan, inaꞌan na pasekot baꞌanan aꞌa Pilistin amowa magbonoꞌ ma saga aꞌa Israꞌil. Saguwāꞌ ma llaw du isab inān, aniyaꞌ lꞌggon makalanduꞌ kosogna pinaniyaꞌ eꞌ si Yawe ma saga sundalu Pilistin angkan landuꞌ asasaw pikilan sigām. Tabowa sigām sikalahian ati taraꞌug sigām eꞌ bangsa Israꞌil. 11 Magluwasan magtūy saga magbobonoꞌ Israꞌil anurul saga Pilistin eꞌ. Jari pinagpapatay sigām eꞌ saga aꞌa Israꞌil ma palabayan sampay makaliyu min kauman Bet-Kār.
12 Manjari itu, angāꞌ batu aheya si Samwel boꞌ pinatꞌnnaꞌ eꞌna ma llot Mispa maka Sēn. Ebeneser ya pangōnna ma batu inān sabab, yukna, “Si Yawe ya bay anabangan kami sampay piꞌitu.” 13 Jari taraꞌug saga bangsa Pilistin ati halam na magbalik-balik parugpak ni kalahatan bangsa Israꞌil. Satꞌggol si Samwel allum giꞌ, niatuhan na paꞌin eꞌ si Yawe saga bangsa Pilistin. 14 Taꞌāꞌ pabalik eꞌ bangsa Israꞌil saga kalumaꞌan min Ekron sampay ni Gāt, kalahatan bay kalongkopan eꞌ bangsa Pilistin ma waktu palabay. Talappas isab min komkoman bangsa Pilistin saga paglahat kaseheꞌ ya ma jadjahan inaꞌan-i, maka magsulut isab bangsa Israꞌil maka bangsa Amor, mbal na magbonoꞌ.
15 Pasangdan na paꞌin si Samwel magmakōk ma bangsa Israꞌil satꞌggolna allum. 16 Tahun ni tahun, maglibutan iya saga paglahat min jadjahan Betel sampay ni Gilgal maka ni Mispa supaya auntul kapagmakōkna ma saga jamaꞌa Israꞌil. 17 Saguwāꞌ amoleꞌ na paꞌin iya ni kauman Rama, ya lahatna porol. Mainaꞌan isab iya amalꞌngngan kapagmakōkna ma saga aꞌa Israꞌil. Aniyaꞌ isab pagtutukbalan bay nihinang eꞌ si Samwel ma Rama inān pangahulmat ma si Yawe.