8
Angamuꞌ Sultan in Bangsa Israꞌil
1 Atoꞌa paꞌin si Samwel, pinatꞌnnaꞌ eꞌna saga anakna lꞌlla maghuhukum ma bangsa Israꞌil. 2 Si Jowel ya ōn anakna kasiyakahan, jari si Abija ya pasunuꞌ. Lahat Beꞌersebaa ya paghuhukuman sigā. 3 Sagōꞌ karuwangan anak si Samwel itu halam anꞌppu iya ma addat-tabiꞌat, sabab napsuhan sigā ma pilak. Pagkatambahan sigā, mbal isab abontol pangahukum sigā.
4 Angkan magtimuk kamemon pagmattoꞌahan bangsa Israꞌil boꞌ pehēꞌ ni si Samwel ma Rama. 5 Ahꞌlling sigām ni iya, yuk-i, “Atoꞌa na ka, tuwan, maka saga anaknu itu mbal ameyaꞌ ma kalꞌngnganannu. Na,” yuk sigām, “ahāp lagiꞌ patꞌnnaꞌin kami sultan magnakuraꞌan kami buwat bangsa kaseheꞌ.”
6 Sagōꞌ abꞌnsi si Samwel ma pangamuꞌ sigām, ya mikipatꞌnnaꞌ sultan pagnakuraꞌan sigām, angkan iya angaru ni PANGHŪꞌ-Yawe. 7 Anambung PANGHŪꞌ ma si Samwel, yukna, “Dūlin bang ai ya pinahinang eꞌ saga ummat ilu ma kaꞌa. Asal du nggaꞌi ka kaꞌa ya sinulak eꞌ sigām sagōꞌ aku maka kapagsultanku. 8 Min waktu giꞌ bay kapamowaku sigām paluwas min lahat Misil sampay ni kabuwattituhan, sinulak na paꞌin aku eꞌ sigām pagka sigām pasumba ni saga tuhan-tuhan saddī. Jari ya du isab ilu ya nihinang eꞌ sigām ma kaꞌa. 9 Na beyaꞌun bang ai kabilahian sigām, sagōꞌ bandaꞌin sigām toꞌongan. Pahatiꞌun sigām pahāp bang buwattingga palantara sultan ya song magnakuraꞌan sigām.”
10 Manjari, binissala eꞌ si Samwel kamemon bay pangallam ma iya eꞌ PANGHŪꞌ. Yukna ni saga aꞌa ya angamuꞌ pinatꞌnnaꞌan sultan, 11 “Buwattitu kahinangan sultan ya song magsultanan kaꞌam. Ningāꞌ eꞌna saga kaꞌanakanbi lꞌlla nihinang sundalu magbeyaꞌ maka saga kalesana pagbobonoꞌ maka saga aꞌana magpanguraꞌ. Kaseheꞌan anakbi nihinang eꞌna magpaparagan min dahuan saga kalesana. 12 Kaseheꞌan nihinang eꞌna pagnakuraꞌan ma saga tumpukan sundalu, ai na ka ma dangibu, ai na ka ma limampūꞌ. In kaseheꞌan isab nihinang eꞌna magaꞌararu maka magaꞌani ma humana, maka kaseheꞌan sinōꞌ maghinang saga pakokos pagbobonoꞌ maka saga kapanyapan kalesa. 13 Ningāꞌ eꞌna saga kaꞌanakanbi dꞌnda boꞌ maghinang saga nsꞌllan pahamut, maka magbabꞌlla, maka magaꞌaddun saga tinapay. 14 Ningāꞌ eꞌna saga pagtatanomanbi pai maka tirigu, maka pagtatanomanbi anggul maka jaitun, ingga-ingga ya landuꞌ ahāp, ati pamuwanna ma saga tendogna. 15 Ningāꞌ eꞌna bahagiꞌ sangpūꞌ min saga tirigu maka buwaꞌ anggulbi boꞌ pamuwanna ma saga tendogna maka ma saga aꞌa kawakilanna. 16 Saga ipatanbi dꞌnda-lꞌlla ningāꞌ eꞌna tahinang sosohoꞌanna. Saga sapiꞌbi isab maka kuraꞌbi ya katapusan asambu tapagguna heꞌna. 17 Ningāꞌ isab eꞌna bahagiꞌ sangpūꞌ min saga kahayopanbi, maka sampay kaꞌam baranbi binanyagaꞌ eꞌna. 18 Atꞌkka paꞌin waktu inān, parahing du kam ni PANGHŪꞌ-Yawe ma sabab kabinsanaꞌan ya pinaniyaꞌan kaꞌam eꞌ sultan bay peneꞌbi inān, sagōꞌ mbal kam kinale eꞌ PANGHŪꞌ ma waktu inaꞌan.”
19 Sagōꞌ halam kinale si Samwel eꞌ saga aꞌa inān. “Ē! Mbal!” yuk sigām. “Ya kabilahian kami subay aniyaꞌ sultan pagmakōkan kami. 20 Bilahi kami pasaliꞌ ni saga bangsa kaseheꞌan boꞌ aniyaꞌ sultan magnakuraꞌan kami maka magmundaꞌan kami bang ni pagbonoꞌan.”
21 Pagkale paꞌin si Samwel ma kamemon bay pinahꞌlling eꞌ saga aꞌa inān, parahing iya pabalik ni PANGHŪꞌ-Yawe. 22 Angallam PANGHŪꞌ pabīng ma si Samwel, yukna, “Beyaꞌun bang ai kabilahian sigām. Patꞌnnaꞌin sigām aꞌa magsultanan sigām.”
Manjari, ahꞌlling si Samwel ma bangsa Israꞌil, “Pehēꞌ na kam,” yukna, “magpoleꞌan pabalik ni kalumaꞌanbi.”