9
Kapagbāk si Samwel maka si Saꞌul
1 Na, aniyaꞌ aꞌa min panubuꞌ Benjamin gaꞌosan asal maka taga-kaniyaꞌ. Ōnna si Kīs ya bay anak si Abiya anak si Seror. Si Seror ya bay anak si Bekorat anak si Apiya, min panubuꞌ si Benjamin du isab. 2 Si Kīs itu taga-anak lꞌlla pinagōnan si Saꞌul. Ahāp lꞌlla iya, arorog maka labi alanjang min kamemon pagkahina. Halam aniyaꞌ sibuꞌna ma bangsa Israꞌil.
3 Manjari dakayuꞌ llaw, alungay saga kuraꞌa ya sukuꞌ si Kīs, angkan iya ahꞌlling ni anakna si Saꞌul, yukna, “Otoꞌ, waꞌi alungay saga kuraꞌta. Amowa ka dakayuꞌ sosohoꞌanta paneheꞌ ma kaꞌa boꞌ pihaꞌunbi pehēꞌ.” 4 Sakali, patulak na si Saꞌul maka sosohoꞌan eꞌ labay min kabūd-būran Epraꞌim maka min lahat Salisa sagōꞌ halam tabāk eꞌ sigā saga kuraꞌ eꞌ. Palanjal na paꞌin sigā ni jadjahan Saꞌalim sagōꞌ halam du mahēꞌ. Palabay isab sigā min lahat Benjamin, sagōꞌ halam du isab mahēꞌ.
5 Taꞌabut paꞌin jadjahan Sūp, ahꞌlling na si Saꞌul ma sosohoꞌan eꞌ, yukna, “Sūng na kita amoleꞌ, ya aniyaꞌ nggaꞌi ka na saga kuraꞌ bay alungay ya pinagsusahan eꞌ si mmaꞌ, sagōꞌ kita na.”
6 Saguwāꞌ ya sambung sosohoꞌan inān ma si Saꞌul, “Tuwan,” yukna, “aniyaꞌ ma kalumaꞌan maitu-itu dakayuꞌ aꞌa sosohoꞌan Tuhan. Pinagmahaltabatan iya eꞌ saga aꞌa kamemon maka atuman lullun pangallamna. Ahāp giꞌ kita pehēꞌ ni iya, kalu-kalu kita katuliꞌanna lān pamihaꞌanta saga kuraꞌ heꞌ.”
7 Ahꞌlling si Saꞌul yukna, “Bang kita pehēꞌ ni sosohoꞌan Tuhan inān, ai tapamuwanta ma iya? Aubus na saga pagkakan bay palutuꞌta. Halam na aniyaꞌ kabowahanta iya.”
8 Anambung pabalik sosohoꞌan inān, “Tuwan,” yukna, “aniyaꞌ giꞌ maitu dakayuꞌ pisita. Ya itu pamuwanta ma iya boꞌ kita katuliꞌan eꞌna bang ya ingga subay palabayanta.”
9 (Ma waktu heꞌ-i, ‘aꞌa talus’ ya pangōn nabi eꞌ bangsa Israꞌil. Sai-na bilahi angaru ni Tuhan, ahꞌlling iya ma seheꞌna yukna, “Sūng, pehēꞌ kita ni aꞌa talus.”) 10 Yuk si Saꞌul ni seheꞌna inān, “Na ahoꞌ. Sūng na kita.” Jari palanjal na sigā ni kalumaꞌan ya paꞌatagan sosohoꞌan Tuhan inān.
11 Hinabu sigām patukad ni būd tudju ni kalumaꞌan eꞌ, talanggal eꞌ sigā saga kabudjangan song anauk boheꞌ, jari tinilaw eꞌ sigā yuk-i, “Saga arūng, itiyaꞌ bahāꞌ maitu in aꞌa talus?”
12 “Ahoꞌ, tuwan,” yuk sambung saga kabudjangan inān. “Waꞌi na iya makarahū min kaꞌam. Pasaꞌut kam. Buwattinaꞌan sadja iya makapiꞌitu ni kalumaꞌan kami, sabab aniyaꞌ pagkulban tinukbalan eꞌ kampung kami mahēꞌ ma tampat. 13 Pagsōdbi ni kalumaꞌan, tabākbi iya mainaꞌan ma mbal giꞌ makatukad ni tampat. Mbal magkakanan saga aꞌa mainaꞌan satꞌggol iya mbal atꞌkka. Subay kaꞌamuꞌanna barakat saga tutukbalan heꞌ boꞌ magpamangan saga aꞌa bay tinaꞌabbit. Na, pehēꞌ na kam boꞌ iya taꞌabutbi.”
14 Manjari, hinabu si Saꞌul maka sosohoꞌan inān pasōd ni kalumaꞌan eꞌ, ilu na si Samwel paluwas song patukad ni tampat. 15 Aniyaꞌ asal bay pamukis eꞌ si Yawe ma si Samwel, dangꞌllaw dahū lagiꞌ min bay kapinaꞌan si Saꞌul. Yuk pamukis eꞌ, 16 “Salung ma waktu buwattitu du, papiꞌiluku ni kaꞌa dakayuꞌ aꞌa min panubuꞌ Benjamin. Busugin iya nsꞌllan paltandaꞌan in iya bay tapeneꞌku magnakuraꞌ ma saga aꞌaku bangsa Israꞌil. Niliyusan eꞌna saga aꞌa sukuꞌku min komkoman bangsa Pilistin. Taꞌndaꞌku asal katiksaꞌan sigām, maka takaleku pangandahing sigām.”
17 Pagꞌndaꞌ si Samwel ma si Saꞌul, magtūy angallam PANGHŪꞌ ma iya, yukna, “Ya na itu aꞌa bay pangahakaku ma kaꞌa. Iya ya magparinta ma saga aꞌa sukuꞌku.”
18 Jari pasekot si Saꞌul ni si Samwel ma atag lawang ya pagsōd-luwasan ma kalumaꞌan inān. Atilaw iya ma si Samwel, yukna, “Tuwan, daꞌa busung. Makajari bahāꞌ aku pataꞌunu bang maingga maitu lumaꞌ aꞌa talus eꞌ?”
19 Anambung si Samwel, yukna, “Aku na koꞌ ya patilawannu. Pehēꞌ na kam parahū min aku ni tampat sabab magbeyaꞌ kam maka aku amangan llaw itu. Palanjalku kam salung ati hakaku ni kaꞌa kamemon ya ma deyom pamikilnu ilu. 20 Ma pasalan isab saga kuraꞌ ya bay alungay saga tꞌllungꞌllaw palabay, daꞌa na kasusahun sabab waꞌi na tabāk. Sai lagiꞌ niholatan eꞌ bangsa Israꞌil, bang nggaꞌi ka kaꞌa maka saga aꞌa kamemon ya pagtaiꞌanak mmaꞌnu?”
21 Ya sambung si Saꞌul, “Tuwan,” yukna, “aku itu tubuꞌ min panubuꞌ Benjamin koꞌ, ya tubuꞌ arikiꞌ asal ma bangsa Israꞌil, maka pangkat kami itu areyoꞌ min kamemon kapanubuꞌan Benjamin. Angay angkan ka makapahꞌlling buwattilu?”
22 Manjari binowa patukad eꞌ si Samwel si Saꞌul maka sosohoꞌan eꞌ ni lumaꞌ pagkakanan boꞌ pinatingkōꞌ min kōkan saga aꞌa bay tinaꞌabbit heꞌ. Kulang-labi tꞌllumpūꞌ heka sigām. 23 Jari, ahꞌlling si Samwel ni magbꞌbꞌlla, yukna, “Bowahun piꞌitu ya isi sumbaliꞌan bay sohoꞌku pinasaddī ma kaꞌa.”
24 Na, binowa pinaꞌan eꞌ magbꞌbꞌlla ya paꞌa susumbaliꞌan bay pinasaddī boꞌ pinatꞌnnaꞌ ma mundaꞌan si Saꞌul. Yuk si Samwel ma si Saꞌul, “Ya ilu bay tinauꞌan kaꞌa. Amangan ka sabab bay koꞌ itu asal pinasaddīhan kaꞌa ma palkalaꞌ itu, dahū giꞌ min waktu bay kapanaꞌabbitku saga aꞌa kaseheꞌan itu.” Sakali magbeyaꞌ amangan si Saꞌul maka si Samwel ma llaw inān.
25 Paglūd sigām ni kalumaꞌan min tampat eꞌ, aniyaꞌ patulihan sinakapan si Saꞌul ma atop karatagan ya pangatop lumaꞌ si Samwel. 26 Pagdaiꞌ llaw paꞌin, hinabu si Saꞌul masi ma diyataꞌ atop eꞌ, nilinganan iya eꞌ si Samwel, yukna, “Pabangun ka. Patuntulta ka ni palꞌngnganannu.” Jari asakap paꞌin si Saꞌul, magbeyaꞌ sigā paluwas min lumaꞌ. 27 Makatꞌkka paꞌin sigā ni tōng kalumaꞌan inān, ahꞌlling si Samwel ni si Saꞌul yukna, “Sohoꞌun na parahū sosohoꞌannu ilu.” Makarahū paꞌin, ahꞌlling si Samwel ni si Saꞌul yukna, “Maitu giꞌ ka boꞌ ka pataꞌuku pasal lapal bay min Tuhan.”