10
Si Saꞌul Ginꞌllal Sultan ma Bangsa Israꞌil
1 Puwas paꞌin heꞌ-i, bay angāꞌ si Samwel poga-poga isihan nsꞌllan jaitun boꞌ binusugan eꞌna kōk si Saꞌul. Siniyum isab iya boꞌ yuk si Samwel, “Kaꞌa ya tapeneꞌ eꞌ si Yawe magnakuraꞌ ma saga aꞌa palsukuꞌanna, ya na bangsa Israꞌil. (Kaꞌa ya magmakōkan sigām maka angaliyusan sigām min komkoman saga banta sigām. Aniyaꞌ isab paltandaꞌan pamabꞌnnal in kaꞌa tapeneꞌ na eꞌ si Yawe magsultanan bangsa palsukuꞌanna.) 2 Paglaꞌannu minnitu, makalanggal ka duwa aꞌa ma tongod bay pangubulan si Rakiya, inaꞌan ma lahat Selsa ma tobtoban tanaꞌ Benjamin. Buwattitu pamissala saga aꞌa inān ma kaꞌa, ‘Waꞌi na tabāk saga kuraꞌ ya bay pihanu. Ma buwattinaꞌan, nggaꞌi ka na saga kuraꞌ ya pinagsusahan eꞌ mmaꞌnu saguwāꞌ kaꞌa na. Ya panilawna na paꞌin, “Buwattingga eꞌku amiha anakku?” ’ ”
3 Ahꞌlling lagiꞌ si Samwel ma si Saꞌul, yukna, “Paglanjalnu min saga aꞌa heꞌ, atꞌkka ka ni kayu paruwaꞌahan ma Tabor. Sinampang ka eꞌ tꞌllungan lꞌlla araiꞌ na patukad ni Betel amudji ni Tuhan. Dangan inān amowa tꞌllu anak kambing, dangan isab amowa tꞌllu tinapay maka dangan amowa dapangisihan binu-anggul. 4 Sinagina ka pahāp eꞌ sigām, maka binuwanan ka tinapay duwa hekana. Daꞌa taikutin, taimaꞌun sadja.
5 “Pagubus ilu-i, pehēꞌ ka palanjal ni Gibeya ya pinagbahasa Būd Tuhan, inaꞌan mainaꞌan magpustu saga sundalu Pilistin. Pagsekotnu ni kalumaꞌan, magbāk ka maka tumpukan nabi lūd bay min tampat. Magbissala sigām kaligawan pagka kahōpan eꞌ Rū Yawe. Aniyaꞌ isab min dahuan sigām saga magbibiyula maka magsusuling maka aꞌa magtaroroꞌan tambul-tambul. 6 Ya du kaꞌa, kahōpan toꞌongan ka eꞌ Rū Yawe ati tabowa ka magbeyaꞌ maka saga nabi inān magbissala kaligawan. Tahinang ka saliꞌ aꞌa saddī na. 7 Jari bang paniyaꞌ saga paltandaꞌan itu, hinangun bang ai ya makaꞌamu ma kaꞌa, sabab ilu Tuhan taptap pagapiꞌ ma kaꞌa.
8 “Na, palūd ka parahū min aku ni lahat Gilgal. Paturul du aku ni kaꞌa boꞌ anukbal susumbaliꞌan tinunuꞌ maka magduwaꞌa salamat. Saguwāꞌ kaꞌa ya subay angagad pituꞌ llaw sampay aku makapiꞌilu, boꞌ ka katōꞌanku bang ai subay hinangnu.”
Nihinang Sultan si Saꞌul
9 Manjari, song paꞌin paokat si Saꞌul min si Samwel, pinindahan eꞌ Tuhan pangatayan si Saꞌul eꞌ. Atuman isab ma llaw inaꞌan kamemon saga paltandaꞌan bay binissala eꞌ si Samwel. 10 Pagtꞌkka disi Saꞌul ni Gibeya, bināk sigām eꞌ tumpukan saga nabi heꞌ. Pahōp isab Rū Tuhan ma si Saꞌul ati tabowa iya palamud ma sigām magbissala kaligawan. 11 Taꞌndaꞌ paꞌin iya heꞌ saga aꞌa bay magkilahi maka iya, in iya inaꞌan magbeyaꞌ kahōpan eꞌ Rū Tuhan, magtilaw-tilawan sigām danseheꞌan yuk-i, “Ai bahāꞌ makani-si Saꞌul ya anak si Kīs inān? Angay, nabi bahāꞌ iya?”
12 Jari anambung dakayuꞌ aꞌa maglahat mainaꞌan, yukna, “Hē, daka sai mmaꞌ saga aꞌa ilu.” Angkan pinagsambatan mainaꞌan, yuk-i, “Nabi hatiꞌ si Saꞌul?” 13 Na, makahondong paꞌin si Saꞌul magbissala, patukad iya ni tampat.
14 Sakali tinilaw si Saꞌul maka tendogna eꞌ dakayuꞌ siꞌitna, yuk-i, “Bay kam maingga?”
Ya sambung si Saꞌul, “Bay kami amiha saga kuraꞌ si Mmaꞌ, Bapaꞌ. Saguwāꞌ pagka halam tabāk kami minsan piꞌingga pamihaꞌan, bay kami pehēꞌ ni si Samwel.”
15 Ahꞌlling siꞌitna inān, “Otoꞌ”, yukna, “hakaꞌin aku bang ai bay pamissala ma kaꞌa eꞌ si Samwel.”
16 Anambung si Saꞌul yukna, “Ya pamissalana ma kami in kuraꞌ si Mmaꞌ bay konoꞌ tabāk.” Saguwāꞌ halam nihaka eꞌ si Saꞌul ma siꞌitna pasalan kapagsultanna ma sinosōng.
17 Manjari, pinalinganan eꞌ si Samwel kamemon aꞌa Israꞌil sinohoꞌ pehēꞌ ni lahat Mispa boꞌ magtimuk ma matahan PANGHŪꞌ-Yawe. 18 Mainaꞌan paꞌin sigām, yukna ma sigām, “Buwattitu in pagkallam si Yawe ya Tuhantam bangsa Israꞌil, yukna, ‘Aku ya bay amowa kaꞌam paluwas min lahat Misil maka min pangꞌntanan saga aꞌa tag-lahat eꞌ maka min saga bangsa kaseheꞌ ya bay amissokoꞌ kaꞌam.’ 19 Sagōꞌ minsan na, tinaikutan eꞌbi Tuhanbi ya bay angalappas kaꞌam min kabinsanaꞌan maka kasiksaꞌan. Angangut kam gom paꞌin mikipatꞌnnaꞌ sultan. Na buwattinaꞌan, pabaihuꞌ kam ma matahan PANGHŪꞌ-Yawe, kamemon kam ma baꞌanan kapanubuꞌanbi magtumpuk-manumpuk.”
20 Tapatipun paꞌin heꞌ si Samwel kamemon bangsa Israꞌil magsunuꞌ-sunuꞌ, bangsa Benjamin ya tapeneꞌ. 21 Jari in panubuꞌ si Benjamin magtumpuk-tumpuk binowa eꞌ si Samwel ni matahan Tuhan, ati tumpukan si Matri ya tapeneꞌ. Ma kahinapusanna, si Saꞌul anak si Kīs ya tapeneꞌ. Sagōꞌ pagpiha sigām, halam iya tabāk. 22 Jari angaru sigām pabīng ni PANGHŪꞌ, yuk-i, “Makapiꞌitu na bahāꞌ ya aꞌa tapeneꞌ inān?”
Anambung PANGHŪꞌ, yukna, “Ahoꞌ, inaꞌan iya patapuk ma saga duwaꞌan.”
23 Sakali, magdaiꞌ-daiꞌ sigām pehēꞌ angāꞌ si Saꞌul boꞌ yampa binowa paluwas ni pagtipunan aꞌa inān. Na alanjang asal iya min kamemon. 24 Manjari, ahꞌlling si Samwel ni saga aꞌa, yukna, “Ndaꞌunbi na aꞌa ya bay tapeneꞌ eꞌ si Yawe. Halam aniyaꞌ sibuꞌna min kitam itu kamemon.”
Magtūy magdakayuꞌ kamemon saga aꞌa inān angolang, yuk-i, “Mura-murahan pinatahaꞌ umul sultan ilu!”
25 Pinahati eꞌ si Samwel saga aꞌa mahadjanaꞌ inān pasal hatulan pagsultan. Tasulat eꞌna kamemon itu ma deyom kitab boꞌ pinatꞌnnaꞌ ma matahan si Yawe. Pagubus, pinapoleꞌ eꞌ si Samwel saga aꞌa inān pakaniya-pakaniya ni lumaꞌ sigām.
26 Ya du si Saꞌul, bay du isab amoleꞌ ni lumaꞌna ma Gibeya, magbeyaꞌ maka saga aꞌa esogan magbonoꞌ ya kabuwanan bayaꞌ eꞌ Tuhan. 27 Sagōꞌ aniyaꞌ mainaꞌan saga aꞌa asabul magpahꞌlling, yuk-i, “Buwattingga heꞌ aꞌa itu angalappas kitam min saga bantatam?” Ati pinareyoꞌ-deyoꞌ eꞌ sigām si Saꞌul. Halam aniyaꞌ huhulmatan binowa eꞌ sigām pagmahaltabat ma iya. Sagōꞌ halam du ahꞌlling minsan ai si Saꞌul.