11
Taraꞌug eꞌ si Saꞌul saga Bangsa Ammon
1 Na, palabay paꞌin saga dambulan, tatꞌkka daꞌira Jabes Giliyad eꞌ si Nahas, ya sultan bangsa Ammon, ati kinumbis eꞌna boꞌ mbal makaluwas saga aꞌa ya maglahat mainaꞌan. Manjari ahꞌlling sigām ni si Nahas yuk-i, “Magsulut kitam. Magparaꞌug kami ma kaꞌa bang paꞌin kami mbal papataynu.”
2 Anambung si Nahas, yukna, “Ahoꞌ, magsulut kitam bang paꞌin talugitku dambilaꞌ matatam tampal ni kowan boꞌ supaya aheya kaiyaꞌanbi ma bangsabi Israꞌil.”
3 Angkan ahꞌlling saga pagmattoꞌahan mainaꞌan, yuk sigām, “Patangguhun kami ma deyom pituꞌ llaw boꞌ pinasaplag kahālan itu ma katilingkal Israꞌil. Bang halam sai-na anabang kami, lillaꞌ na kami magpalongkop ma kaꞌa.”
4 Manjari, pehēꞌ saga magbobowa lapal ni Gibeya ya kauman palahatan si Saꞌul. Kahakaꞌan paꞌin saga aꞌa mainaꞌan ma pasalan palkalaꞌ heꞌ, magtūy sigām maglemong kamemon. 5 Saltaꞌ ma waktu inaꞌan, atꞌkka si Saꞌul maka saga sapiꞌna bay min huma. Jari atilaw iya, yukna, “Ai kasusahan saga aꞌa itu? Angay sigām maglemongan?” Ati nihakaꞌan iya pasal bay pamissala saga aꞌa Jabes heꞌ.
6 Pagkale si Saꞌul ma bissala itu, magtūy pahōp ni iya Rū Tuhan, jari akagit atayna, mbal agon kasandalanna. 7 Ningāꞌ eꞌna duwa sapiꞌ boꞌ pinagkehet-kehet, ati pinabowa kehetanna ni katilibut Israꞌil pamowahan bandaꞌna ma saga aꞌa kamemon. Yukna, “Buwattitu tumaluwaꞌ ni saga kahayopan sasuku tag-dapuna mbal maguyun ameyaꞌ ma si Saꞌul maka si Samwel.” Sakali, kasōran tāw kamemon bangsa Israꞌil min kahandak PANGHŪꞌ-Yawe, angkan sigām magdaꞌatay ameyaꞌ ma si Saꞌul. 8 Manjari, pinatipun eꞌ si Saꞌul ma kauman Besek saga kalꞌllahan, aniyaꞌ tꞌllu hatus ngibu heka sigām min Israꞌil maka tꞌllumpūꞌ ngibu min Yuda.
9 Ahꞌlling disi Saꞌul ma saga magbobowa lapal bay min Jabes eꞌ, yuk-i, “Pataꞌuhunbi saga aꞌa Jabes Giliyad, yukbi, ‘Salung, song paꞌin ugtu llaw, alappas na kam.’ ” Kahakaꞌan paꞌin saga aꞌa Jabes inān, landuꞌ aheya kakōgan sigām, 10 ati yuk sigām ni saga aꞌa bangsa Ammon, “Pagsalung, lillaꞌ na kami magpalongkop ma kaꞌam. Tahinangbi na ma kami bang ai kabayaꞌanbi.”
11 Sagōꞌ ma sangom inaꞌan du, bay binahagiꞌ tꞌllu eꞌ si Saꞌul saga sundaluna. Ma halam lagiꞌ pakꞌllat mata llaw, tasōd eꞌ sigām pustu saga bangsa Ammon boꞌ binonoꞌ eꞌ sigām sampay taꞌabut alanga llaw. Sasuku halam tapapatay bay makalahi pakaniya-kaniya.
Pinatuman Kapagsultan si Saꞌul
12 Na pagka buwattēꞌ, ahꞌlling saga aꞌa Israꞌil ma si Samwel, yuk sigām, “Sai sa saga aꞌa bay mbal bilahi pinagsultanan eꞌ si Saꞌul? Pabowahun sigām piꞌitu boꞌ papatay kami.”
13 Saguwāꞌ amissala si Saꞌul yukna, “Mbal aniyaꞌ minsan sai-na pinapatay ma llaw itu. Sabab ya itu llaw kapamuwan daꞌugan eꞌ PANGHŪꞌ-Yawe ma bangsa Israꞌil.”
14 Manjari ahꞌlling si Samwel ma saga aꞌa Israꞌil yukna, “Sūng kitam ni Gilgal ati mahēꞌ kitam amatuman pagsultan si Saꞌul.” 15 Sakali, pehēꞌ ni Gilgal kamemon saga ummat Israꞌil boꞌ pinatuman eꞌ sigām pagsultan si Saꞌul mainaꞌan ma matahan si Yawe. Mainaꞌan isab sigām bay magduwaꞌa salamat ni si Yawe. Pagubus, aheya paglami-lami disi Saꞌul maka kamemon saga bangsa Israꞌil.