12
Lapal Pagbaꞌiran si Samwel min Bangsa Israꞌil
1 Sakali ahꞌlling si Samwel ni saga bangsa Israꞌil, yukna, “Bay na beyaꞌku kamemon pangamuꞌbi ya mikipatꞌnnaꞌ kam sultan. 2 Na buwattinaꞌan, ilu na aniyaꞌ sultan magnakuraꞌan kaꞌam. In aku itu atoꞌa na, sagōꞌ ilu du saga anakku lꞌlla ma deyomanbi gantiꞌku. Min kabataꞌku sampay ni buwattinaꞌan bay aku magnakuraꞌan kaꞌam. 3 Itiyaꞌ aku paꞌalop ma kaꞌam. Bang aniyaꞌ panunaꞌbi ma aku, saksiꞌinbi ma baihuꞌan PANGHŪꞌ-Yawe maka ma baihuꞌan sultan ya tapeneꞌna itu. Sai bahāꞌ ma kaꞌam bay katangkawanku sapiꞌna atawa kuraꞌna? Sai ma kaꞌam bay kaꞌakkalanku? Sai ma kaꞌam bay pissokoꞌku? Bay bahāꞌ aku katambahan heꞌ sai-na ma kaꞌam boꞌ supaya abengkok hukumanku? Bang bay tahinangku saga kahinangan itu minsan laꞌa hal dakayuꞌ, pabontolku na buwattinaꞌan.”
4 Manjari anambung saga bangsa Israꞌil inān, yuk sigām, “Halam kami bay akkalannu atawa pissokoꞌnu. Halam ka bay anangkawan sai-na ma kami.”
5 Yuk si Samwel ni sigām, “Llaw itu, saksiꞌtam PANGHŪꞌ maka sultan ya tapeneꞌna itu, in aku mbal katōnganbi dusa.”
“Ahoꞌ,” yuk sambung sigām, “PANGHŪꞌ-Yawe ya saksiꞌtam.”
6 Manjari ahꞌlling si Samwel, “Si Yawe ya bay ameneꞌ si Musa maka si Harun, maka Tuhan ya bay amowa saga kaꞌmboꞌ-mboꞌanbi paluwas min lahat Misil. 7 Na, daꞌa kam alaꞌan mꞌnnilu sabab bontolanta kam maitu ma baihuꞌan PANGHŪꞌ-Yawe pasal saga kahāpan bay tahinang heꞌna ma kaꞌam maka saga kaꞌmboꞌanbi.
8 “Ma Misil paꞌin disi Yakub, bay sigām parahing ni si Yawe angamuꞌ tabang, ati pinabeyaꞌan sigām si Musa maka si Harun. Sigā ya bay amowa saga kaꞌmboꞌanbi paluwas min Misil tudju piꞌitu ni lahat ītu. 9 Saguwāꞌ takalipat eꞌ sigām si Yawe ya Tuhan sigām, angkan sigām bay pinasagaran heꞌna boꞌ taraꞌug heꞌ si Sisera ya pagnakuraꞌan saga sundalu si Hasor. Bay isab sigām niꞌndeꞌan ni komkoman saga bangsa Pilistin sampay sultan bangsa Mowab ya bay anguntarahan sigām. 10 Pagka buwattēꞌ, bay angandahing isab saga aꞌa Israꞌil ni PANGHŪꞌ, yuk-i, ‘Ya Tuhan, aheya landuꞌ dusa kami ma kaꞌa. Sabab bay ka taikutan kami pasumba ma saga taꞌu-taꞌu Baꞌal maka Astoret. Lappasun kami min saga banta kami itu ati pabalik kami angisbat kaꞌa sadja.’ 11 Sakali bay pinabeyaꞌ heꞌ PANGHŪꞌ si Jerub-Baꞌal (ya niōnan isab si Gidiyun) boꞌ si Barak, ati boꞌ si Jepta, maka aku ya katapusan. Angkan kam bay kalappasan eꞌna min pangꞌntanan saga kabantahanbi paruruwambilaꞌ boꞌ halam aniyaꞌ makarugpak ni lahatbi.
12 “Saguwāꞌ,” yuk si Samwel, “pagꞌndaꞌbi paꞌin song parugpak ni kaꞌam si Nahas ya sultan bangsa Ammon, subay kam angangut mikipatꞌnnaꞌ sultan magnakuraꞌan kaꞌam. Buwattēꞌ pangamuꞌbi ma aku minsan du Tuhan Yawe ya sultanbi. 13 Na”, yuk si Samwel, “itiyaꞌ na in sultan bay peneꞌbi, ya bay amuꞌbi. Ndaꞌunbi pahāp, aniyaꞌ na sultan pinatꞌnnaꞌan kaꞌam heꞌ PANGHŪꞌ. 14 Jari ahāp kahālanbi bang paꞌin kam magmatāw ma PANGHŪꞌ, bang kam angisbat iya, bang mbal saggaꞌbi saga panohoꞌanna, bang kaꞌam maka sultan ya magnakuraꞌan kaꞌam atukid ameyaꞌ ma si Yawe ya Tuhanbi. 15 Saguwāꞌ, bang kam mbal ameyaꞌ ma si Yawe ati saggaꞌbi gom paꞌin saga panohoꞌanna, taptap kam pinatꞌkkahan balaꞌ, buwat bay pamatꞌkkana ma saga kaꞌmboꞌanbi.
16 “Na, daꞌa kam alaꞌan min panꞌnggehanbi ilu boꞌ kam makaꞌndaꞌ in hinang makainu-inu ya song nihinang eꞌ PANGHŪꞌ-Yawe ma matahanbi. 17 Taꞌabut na musim pagani tirigu, musim mbal pangulan. Sagōꞌ angamuꞌ-ngamuꞌ aku ni PANGHŪꞌ bang paꞌin pinalꞌggon maka pinaulan. Ati minnēꞌ tasayubi bang buwattingga heya kalaꞌatan bay tahinangbi ma matahan PANGHŪꞌ pagka kam angangut subay mikipatꞌnnaꞌ sultan.”
18 Manjari angamuꞌ-ngamuꞌ si Samwel ati aniyaꞌ lꞌggon maka ulan pinaniyaꞌ eꞌ PANGHŪꞌ ma llaw inaꞌan du. Angkan kamemon saga aꞌa mainaꞌan sinōd tāw ma PANGHŪꞌ maka ma si Samwel.
19 Ahꞌlling sigām ni si Samwel, yuk-i, “Amuꞌ-amuꞌin kami ni si Yawe ya Tuhannu boꞌ supaya kami mbal pinapatay. Bay ganapan kami saga dusa kami ma sabab kapangangut kami subay mikipatꞌnnaꞌ sultan.”
20 Anambung si Samwel yukna, “Daꞌa kam tināw. Bꞌnnal aheka paldusahan bay tahinangbi, sagōꞌ minsan na, daꞌa taikutinbi si Yawe. Wajib iya subay niꞌisbat min deyom ataybi. 21 Daꞌa kam pasihaꞌ min iya boꞌ maghinang ni saga tuhan-tuhan halam kapūsanna, sabab halam du aniyaꞌ kahāpan tahinang sigām ma kaꞌam. Mbal sigām makalappasan kaꞌam. 22 Kasulutan si Yawe angahinang kaꞌam bangsa palsukuꞌanna, angkan kam mbal siniya-siya heꞌna supaya mbal tasallaꞌ ōnna babantugun. 23 In aku isab,” yuk si Samwel, “mbal bilahi amakay dusa ni PANGHŪꞌ-Yawe, angkan aku mbal pahali angamuꞌ-ngamuꞌan kaꞌam tabang. Panduꞌanta kam isab addat-tabiꞌat ahāp maka abontol. 24 Amay-amay, pagmatāwinbi si Yawe maka isbatunbi iya min deyom ataybi. Entomunbi toꞌongan saga kahāpan makainu-inu ya bay tahinang eꞌna ma kaꞌam. 25 Sagōꞌ bang kam pasangdan na paꞌin angahinang kalaꞌatan, tantu kaꞌam maka sultanbi ilu aligis.”