13
Pinabukagan si Saꞌul eꞌ si Samwel
1 Tꞌllumpūꞌ tahun umul si Saꞌul waktu iya tahinang sultana ati mpatpūꞌ maka duwantahun ya tꞌggol kapagsultanna ma bangsa Israꞌil.
2 Na, si Saꞌul itu bay ameneꞌ sundalu tꞌllungibu hekana min bangsa Israꞌil. Duwangibu sigām bay ma si Saꞌul ma kauman Mikmas maka ma kabūd-būran Betel, dangibu takapin bay ma si Jonatan ma Gibeya, ya ma paglahat bangsa Benjamin. Maka sasuku halam tapeneꞌ eꞌ si Saꞌul bay pinapoleꞌ ni kalumaꞌan sigām.
3 Na, tarugpak eꞌ si Jonatan pustu bangsa Pilistin ma lahat Geba angkan tasayu eꞌ saga Pilistin in bangsa Hibranib angatu na. Manjari amahꞌlling si Saꞌul tiyup-tiyup ma katilingkal bangsa Israꞌil supaya sigām magsakap amonoꞌ. 4 Minnēꞌ takale eꞌ kamemon bangsa Israꞌil in habal itu, ya yukna, “Tarugpak pustu Pilistin eꞌ si Saꞌul, ati aheya na kabꞌnsi sigām ma kitam bangsa Israꞌil.” Angkan magpanohoꞌan si Saꞌul ma saga aꞌa Israꞌil, sinōꞌ patipun ma lahat Gilgal.
5 Manjari, magtimukan na saga bangsa Pilistin boꞌ magsakap amonoꞌ bangsa Israꞌil. Landuꞌ aheka saga Pilistin eꞌ, tꞌllungibu heka kalesa sigām pagbobonoꞌ, nnom ngibu saga sundalu magkakalesa. Ya sundalu sigām magtinapeꞌ saliꞌ heka solagan gusung ma tampe. Patukad sigām magpustu ma Mikmas, tampal ni sobangan min Bet-Aben. 6 Pagꞌndaꞌ saga sundalu bangsa Israꞌil in sigām kapilahan ma sabab kapaslod pagdugpak bangsa Pilistin, magtūy sigām sikatapukan ma saga songab batu, ma deyom kasagmotan, ma lugal kabatuhan, maka ma saga lowang bay kinalian. 7 Aniyaꞌ isab saga Hibrani kaseheꞌan bay pauntas ni dambilaꞌ sapaꞌ Jordan tudju ni lahat Gād maka Giliyad.
Saguwāꞌ si Saꞌul bay magpaꞌbba ma Gilgal ati magpamidpid kamemon saga kasundaluhan bay ameyaꞌ ma iya kabowa tāw sigām. 8 Dapituꞌ ya pangagad si Saꞌul mainaꞌan buwat bay panugun eꞌ si Samwel ma iya. Na, halam paꞌin atꞌkka si Samwel, magkanat-kanat na saga sundalu bay mainaꞌan ma si Saꞌul. 9 Angkan ahꞌlling si Saꞌul, yukna, “Bowahinbi aku hayop pagtaubat maka tutukbalan pagduwaꞌaku salamat.” Manjari bay tinukbalan eꞌ si Saꞌul hayop tinunuꞌ. 10 Pagubus, atꞌkka si Samwel ati paluwas si Saꞌul min kalumaꞌan anampang iya maka anagina.
11 Yuk si Samwel ma iya, “Ai bay hinangnu itu?”
Anambung si Saꞌul, yukna, “Taꞌndaꞌku magkaukanat saga aꞌaku maka halam ka makatꞌkka ma waktu bay panugunnu. Inaꞌan isab saga sundalu Pilistin magtimuk ma Mikmas. 12 Tapikilku in bangsa Pilistin araiꞌ parugpak piꞌitu ni Gilgal ma halam aku minsan makapangaru ni PANGHŪꞌ-Yawe. Angkan aku bay magniyat magtukbal saga tutukbalan tinunuꞌ itu.”
13 Ya sambung si Samwel ma si Saꞌul, yukna, “Dupang pahāp ka magkahinangan buwattilu! Halam bay bogbogannu panohoꞌan PANGHŪꞌ ma kaꞌa. Bang ka bay magkahagad, tuman kaꞌa maka saga panubuꞌnu pinapagsultan ma bangsa Israꞌil ni kasaumulan. 14 Saguwāꞌ, pagka ka halam bay ameyaꞌ ma panohoꞌan PANGHŪꞌ ma kaꞌa, mbal anatas kapagsultannu. Aniyaꞌ tapihana aꞌa makasulut pangatayanna, ati tapatꞌnnaꞌ na eꞌna magmakōk ma saga ummat ya palsukuꞌanna.”
15 Pabuhat magtūy si Samwel boꞌ palanjal min Gilgal ni Gibeya ya ma paglahat Benjamin. Malaingkan si Saꞌul bay angitung saga sundalu ya beyaꞌ ma iya, nnom hatus heka sigām.
Bangsa Israꞌil Halam Magpakokos
16 Na, inaꞌan disi Saꞌul maka anakna si Jonatan pahantiꞌ ma Gibeya, beyaꞌ isab saga sundalu sigām, samantalaꞌ waꞌi masi ma Mikmas magpustu saga sundalu Pilistin. 17 Magbahagiꞌ tꞌllu saga sundalu Pilistin itu boꞌ angandugpak bangsa Israꞌil. Datumpuk inān bay patudju ni kauman Opra ya ma jadjahan lahat Suwal, 18 datumpuk bay pehēꞌ tudju ni Bet-Horon, jari in tumpuk katꞌlluna bay pehēꞌ ni kareyahan min diyataꞌan karatagan Seboyim, ya paharap ni paslangan.
19 Ma waktu inaꞌan-i, halam aniyaꞌ minsan dakayuꞌ magsasasal ma katilingkal Israꞌil sabab mbal nirūlan eꞌ bangsa Pilistin. Tināw asal sigām in saga bangsa Israꞌil angahinang pakokos di-sigām. 20 Angkan saga bangsa Israꞌil subay pehēꞌ ni saga bangsa Pilistin magpaꞌasaꞌ kapanyapan sigām taga-solab, buwat saga pagaꞌararu, saga sangkul, saga kapa maka sanggot. 21 Duwa sīn tibuꞌuk ya halgaꞌ pagpaꞌasaꞌ solab pagaꞌararu maka sangkul, dakayuꞌ sīn tibuꞌuk ya halgaꞌ isab pagpaꞌasaꞌ tugsuk aꞌaslag maka kapa maka tōng tungkud. 22 Jari halam aniyaꞌ minsan dakayuꞌ min sundalu Israꞌil magtakos kalis atawa budjak ma llaw pagbonoꞌ inān, luwal si Saꞌul maka anakna si Jonatan.
Tarugpak Bangsa Pilistin eꞌ si Jonatan
23 Na, aniyaꞌ tumpukan sundalu Pilistin bay sinōꞌ anungguꞌan lān ya palabayan ma kapampangan Mikmas.