14
Daꞌugan si Jonatan ma Mikmas
1 Dakayuꞌ llaw ahꞌlling si Jonatan anak si Saꞌul ni ondeꞌ bahaꞌu ya magbobowa pakokosna, yukna, “Sūng kita pehēꞌ ni pustu saga sundalu bangsa Pilistin ya ma dambilaꞌ inān.” Sagōꞌ halam pinataꞌu mmaꞌna.
2 Pasaltaꞌ, inaꞌan si Saꞌul maka nnom hatus sundaluna magpustu ma deyoꞌan kayu dalimaꞌa ma Meglon, ya ma tobtoban lahat Gibeya. 3 Beyaꞌ isab mainaꞌan si imam Ahidja ya tag-bowahan epod. Si Ahidja itu anak si Ahitub ya danakan si Ikabod. Mmaꞌ sigā si Pinehas anak si Eli ya bay maghinang ni si Yawe ma Silo. Sagōꞌ halam sai-na makasayuhan kalikut si Jonatan eꞌ.
4 Na, aniyaꞌ pampang min karuwambilaꞌ lān ya palabayan si Jonatan tudju ni pagpustuhan saga sundalu Pilistin. Boses ya pangōn ma pampang dambilaꞌ, Sene ya pangōn ma dambilaꞌ. 5 Paꞌanggop ni Mikmas ya pampang tampal ni uttalaꞌ, paꞌanggop ni Geba ya pampang tampal ni tunggaraꞌ. 6 Sakali, ahꞌlling si Jonatan ni magbobowa pakokosna inān yukna, “Sūng kita pehēꞌ ni pustu bangsa kapil inān. Kalu mura-murahan kita tinabangan eꞌ PANGHŪꞌ-Yawe. Tuman halam aniyaꞌ makapaggat bang iya ya amuwan daꞌugan, ai naka aheka kitam atawa akulang.”
7 Anambung magbobowa pakokos inān, yukna, “Pēꞌun tuwan, palanjalun bang ai maksudnu. Itiyaꞌ du aku ameyaꞌ ma kaꞌa minsan ai tumaluwaꞌ.”
8 Ya pahꞌlling si Jonatan, “Sūng! Pehēꞌ kita magpaꞌndaꞌ ma sigām. 9 Bang sigām ahꞌlling ni kita, yuk-i, ‘Angagad giꞌ kam mailu ati piꞌilu kami,’ na maitu sadja kita, mbal kita palanjal. 10 Sagōꞌ bang yuk sigām, ‘Patukad kam piꞌitu’, na patukad kita sabab ya inaꞌan paltandaꞌan in daꞌugan pamuwan ma kita eꞌ si Yawe.”
11 Sakali, magpaꞌndaꞌ paꞌin sigā karuwangan ni pustu saga Pilistin heꞌ, magtūy sigām ahꞌlling, yuk-i, “Allā! Ndaꞌunbi ba saga Hibrani ilu, ilu na sikaluwasan min saga lowang bay patapukan sigām!” 12 Jari angolang saga aꞌa ma pustu inān ni si Jonatan maka ni magbobowa pakokosna heꞌ, “Pasōng kam piꞌitu boꞌ kam lꞌggahan!”
Angkan ahꞌlling si Jonatan ni seheꞌna inān yukna, “Paturul ka ma aku. Tuman pamuwan in daꞌugan eꞌ si Yawe ma bangsa Israꞌil.”
13 Parāg si Jonatan min pampang ati paturul min buliꞌanna magbobowa pakokosna inān. Tapapatay heꞌ si Jonatan saga sundalu Pilistin, maka inaꞌan isab seheꞌna amapatay min buliꞌanna. 14 Jari duwampūꞌ heka Pilistin bay tapapatay ma kapangandugpak sigā kamintꞌdda inān. Akiput asal lugal bay pagbonoꞌan eꞌ.
Taraꞌug Bangsa Pilistin
15 Manjari, ahiluhalaꞌ kamemon saga sundalu Pilistin kabowa tāw sigām. Ahiluhalaꞌ sigām ma deyom pustu, ahiluhalaꞌ sigām ma deya, ahiluhalaꞌ isab saga tumpukan magdurugpak. Magbeyaꞌ isab ajogjog tanaꞌ sabab in tāw inān bay pinaniyaꞌ eꞌ Tuhan.
16 Aniyaꞌ saga sundalu si Saꞌul ma Gibeya-Benjamin bay amantawan lahat ma sakalibut sigām, ati taꞌndaꞌ eꞌ sigām saga sundalu Pilistin magkaukanat pehēꞌ-piꞌitu. 17 Magtūy ahꞌlling si Saꞌul ni saga aꞌa ya seheꞌna, yukna, “Patipununbi saga sundalutam kamemon boꞌ ndaꞌunbi bang sai halam maitu.” Pagꞌndaꞌ sigām, luwal si Jonatan maka magbobowa pakokosna ya halam mainaꞌan. 18 Ati ahꞌlling si Saꞌul ni imam Ahidja, yukna, “Bowahun piꞌitu Baꞌul Paljanjiꞌan Tuhan ilu.” (Ma waktu itu-i in Baꞌul Tuhan inaꞌan asal ma bangsa Israꞌil.) 19 Na, hinabu si Saꞌul amissala ni imam eꞌ, paruhun na paꞌin kalengogan ma pustu saga bangsa Pilistin. Angkan yuk si Saꞌul ma imam eꞌ, “Pasagarin na.”
20 Sakali, magsakaum si Saꞌul maka kamemon saga sundaluna boꞌ pakuyas ni pagbonoꞌan. Anā, landuꞌ aheya in kalengogan ma saga sundalu bangsa Pilistin sabab inaꞌan sigām magpatay danseheꞌan. 21 Aniyaꞌ saga Hibrani bay asal palamud ma bangsa Pilistin boꞌ dambeyaꞌan maka sigām ma deyom pustu, sagōꞌ papinda na sigām ni saga sundalu Israꞌil ya bay ma disi Saꞌul maka si Jonatan. 22 Sampay saga bangsa Israꞌil ya bay sikatapukan ma kabūd-būran lahat Epraꞌim ameyaꞌ na isab angapas pagkale sigām in saga sundalu Pilistin waꞌi na maglahian. 23 Jari talappas bangsa Israꞌil eꞌ si PANGHŪꞌ-Yawe ma llaw inaꞌan du, ati palanjal na paꞌin pagbonoꞌ inān sampay ni dambilaꞌ Bet-Aben.
Panubali si Saꞌul
24 Na, ma llaw inaꞌan-i, landuꞌ abinsanaꞌ saga sundalu bangsa Israꞌil sabab bay makasubali si Saꞌul, yukna, “Bang paꞌin pinagmulkaꞌan sai-sai anginam takakan ma mbal giꞌ sꞌddop llaw. Subay aku makabalosan saga bantaku dahū!” Angkan halam sai-na anawakkal amangan sampay ni kakohapan.
25 Sakali itu, makatꞌkka paꞌin kamemon sundalu inān ni dakayuꞌ gulangan, aniyaꞌ gulaꞌ buwani mainaꞌan ma kuwit tanaꞌ. 26 Pagsōd sigām pehēꞌ, taꞌndaꞌ eꞌ sigām gulaꞌ buwani inān magdayas-dayas, saguwāꞌ halam aniyaꞌ minsan dakayuꞌ min sigām makatawakkal anꞌnnoꞌan tōng tanganna pinaꞌan sabab kabowa tāw sigām ma bay panubali sultan Saꞌul eꞌ. 27 Saguwāꞌ, pagka halam bay takale eꞌ si Jonatan panubali mmaꞌna, bay pinaꞌabut tōng tungkudna ni gulaꞌ inān boꞌ kininaman eꞌna. Pagkakanna paꞌin, pasawa magtūy pamaihuꞌanna pagka ahāp na palasahanna. 28 Nihakaꞌan iya magtūy eꞌ dakayuꞌ sundalu bay mainaꞌan. “Tuwan,” yukna, “kami saga sundalu bay pinagsapahan eꞌ mmaꞌnu, sinōꞌ mbal amangan ai-ai llaw itu. Pinagmulkaꞌan konoꞌ kami. Angkan koꞌ kami itu pinunung na eꞌ lingantu.”
29 Anambung si Jonatan, yukna, “Allā, aheya kasasawan pamatꞌkka eꞌ mmaꞌku ma kitam kamemon! Ndaꞌunbi ba kahāp palasahanku pagkakanku gulaꞌ buwani itu minsan laꞌa hal dangkuriꞌ.” 30 Yukna lagiꞌ, “Lubaꞌna na bahāꞌ bang kam bay makakakan ai-ai ya tatabanbi min saga bantatam. Maraiꞌ aheka lagiꞌ bangsa Pilistin bay tapapatay.”
31 Ma llaw inaꞌan, tapapatay eꞌ bangsa Israꞌil saga bangsa Pilistin tinagnaꞌan min Mikmas sampay ni jadjahan Ayjalon. Pagubus, landuꞌ apaya saga aꞌa Israꞌil sabab lingantu. 32 Angkan pinagagawan eꞌ sigām saga bili-bili maka hayop bay tataban eꞌ sigām boꞌ sinumbaliꞌ saruꞌun-duꞌun. Agsai pinagkakan eꞌ sigām minsan masi lahaꞌan, kabowa lingantu sigām. 33 Ati aniyaꞌ makasumbung ma si Saꞌul, yukna, “Tuwan, makapakay dusa ni PANGHŪꞌ saga aꞌanu sabab waꞌi sigām amangan sumbaliꞌan masi taga-lahaꞌ.”
Yuk si Saꞌul, “Saga panipu! Pagulungunbi saruꞌun-duꞌun piꞌitu batu aheya.” 34 Magpanohoꞌan giꞌ iya, yukna, “Pehēꞌunbi saga aꞌa heꞌ boꞌ sohoꞌunbi amowa piꞌitu saga sapiꞌ maka bili-bili sigām dangan maka dangan. Sohoꞌunbi sigām anumbaliꞌ maka amangan maitu. Subay sigām mbal amakay dusa ni PANGHŪꞌ pagka sigām amangan sumbaliꞌan masi taga-lahaꞌ.”
Angkan ma sangom inaꞌan du, amowa sigām pakaniya-pakaniya saga sapiꞌ maka bili-bili sigām boꞌ sinumbaliꞌ mainaꞌan. 35 Anambak isab batu si Saꞌul pagkulbanan ni PANGHŪꞌ-Yawe. Yampa aniyaꞌ pagkulbanan tahinang eꞌna.
36 Manjari ahꞌlling si Saꞌul, “Sangom itu,” yukna, “parugpak kitam ni saga bangsa Pilistin. Goraꞌtam ai-ai sigām kamemon ati papatayta sigām kamemon sampay ni kasubuhan.”
Anambung saga sundalu inān, “Hinangun tuwan bang ai taluwaꞌ ma pikilannu.”
Sagōꞌ ya panambung imam, “Subay kitam angaru dahū ni Tuhan.”
37 Angkan angaru si Saꞌul ni Tuhan yukna, “Ya Tuhan, parugpak na bahāꞌ kami ni bangsa Pilistin? Pamuwannu bahāꞌ in daꞌugan ma bangsa Israꞌil?” Saguwāꞌ halam aniyaꞌ sambung Tuhan ma llaw inaꞌan. 38 Pagka buwattēꞌ, ahꞌlling si Saꞌul ni saga nakuraꞌ ma tumpukan sundalu. “Pasōng kam piꞌitu,” yukna, “boꞌ tataꞌu bang ai dusa bay tahinangtam ma llaw itu. 39 Sapahanku ma ōn si Yawe ya Manglalappas ma bangsa Israꞌil, sai-sai katōngan dusa itu minsan anakku si Jonatan, subay pinapatay.” Sagōꞌ halam makapamūng saga aꞌa inān minsan dangan.
40 Ahꞌlling lagiꞌ si Saꞌul ni kamemon saga aꞌa Israꞌil, yukna, “Mailu kam ma dambilaꞌ, ati aku maka anakku si Jonatan maitu isab ma dambilaꞌ itu.”
Jari anambung saga aꞌa mainaꞌan, “Kaꞌa ya magkabayaꞌan, tuwan.”
41 Sakali angamuꞌ-ngamuꞌ si Saꞌul ni si Yawe ya pagtuhanan bangsa Israꞌil, yuk-i. “Ya PANGHŪꞌ, pataꞌuhun ni kami bang sai bay makarusa.” Magkoꞌot-koꞌot paꞌin, tasayu nggaꞌi ka saga sundalu ya bay tag-dusahan, sabab si Jonatan maka si Saꞌul ya takoꞌot. 42 Magtūy ahꞌlling si Saꞌul, yukna, “Pagkoꞌot-koꞌotinbi bang sai ma kami maka si Jonatan ya bay makarusa.” Jari si Jonatan ya takoꞌot.
43 Na, ahꞌlling si Saꞌul ni si Jonatan, yukna, “ Hakaꞌin aku bang ai bay tahinangnu?”
Anambung si Jonatan, “Bay tꞌnnoꞌanku tōng tungkudku ni gulaꞌ buwani boꞌ bay kinamanku dangkuriꞌ. Na, patut bahāꞌ aku subay pinapatay?”
44 “Ahoꞌ Jonatan” yuk si Saꞌul. “Bang paꞌin aku pinatꞌkkahan mulkaꞌ eꞌ Tuhan bang ka mbal papatayku.”
45 Saguwāꞌ yuk saga sundalu ni si Saꞌul, “Si Jonatan ya bay angaliyusan bangsatam Israꞌil min kamulahan! Angay iya subay pinapatay? Mbal patut! Anapa kami ma ōn si Yawe ya Tuhan kakkal, in si Jonatan subay mbal niꞌinay, sabab Tuhan ya bay anabangan iya ma bay tahinangna llaw itu.” Angkan kaliyusan si Jonatan eꞌ saga aꞌa inān ati halam bay pinapatay.
46 Manjari itu, pahondong na si Saꞌul angapas saga bangsa Pilistin angkan sigām magsuhutan na ni kalahatan sigām.
47 Min waktu tagnaꞌ kapagsultan si Saꞌul ma Israꞌil, niatuhan eꞌna saga banta sigām min paruruwambilaꞌ. Ya na bangsa Mowab, bangsa Ammon, bangsa Edom, saga sultan bangsa Soba, maka bangsa Pilistin. Minsan piꞌingga parugpakan si Saꞌul maka saga sundaluna, angandaꞌug sadja sigām. 48 Aesog eꞌna amonoꞌ ati taraꞌug bangsa Amalek. Talappas eꞌ si Saꞌul bangsa Israꞌil min komkoman saga aꞌa bay makalangpasan ai-ai sigām.
Si Saꞌul Magtautaiꞌanak
49 Ya itu saga anak si Saꞌul lꞌlla: si Jonatan boꞌ si Isboset maka si Malki-Suwa. Anakna dꞌnda kasiyakahan ya na si Merab, maka si Mikal ya kasiyalihan. 50 Ōn hꞌnda si Saꞌul ya na si Ahinowam anak si Ahimaꞌas. Ōn aꞌa ya nakuraꞌ katapusan alanga ma saga sundaluna ya na si Abner. Magkaki si Saꞌul maka si Abner itu pagka 51 magdanakan mmaꞌ sigām. Si Kīs ya mmaꞌ si Saꞌul, maka si Nēr ya mmaꞌ si Abner. Si Abiyel ya bay mmaꞌ sigā.
52 Magbonoꞌ na paꞌin bangsa Pilistin maka bangsa Israꞌil sampay ni waktu kamatay si Saꞌul, halam aniyaꞌ halianna. Bang aniyaꞌ aꞌa akosog atawa aesog taꞌndaꞌ eꞌ si Saꞌul ma bangsa Israꞌil, ningāꞌ magtūy eꞌna magsundalu.