15
Tinaikutan eꞌ si Yawe Pagsultan si Saꞌul
1 Ahꞌlling si Samwel ma si Saꞌul yukna, “Aku ya bay pinabeyaꞌ eꞌ PANGHŪꞌ amusugan kaꞌa nsꞌllan boꞌ ka pinatꞌnnaꞌ magsultan ma bangsa Israꞌil, ya bangsa sukuꞌna. Na, kalehun pahāp kallam PANGHŪꞌ Sangat Kawasa, 2 ya yuk-i, ‘Tungbasanku bangsa Amalek ma sabab bay kapangahapaꞌ sigām bangsa Israꞌil waktu kaluwas sigām min lahat Misil. 3 Na, buwattinaꞌan, pehēꞌ na ka, dugpakun bangsa inān. Laglagun sigām kamemon maka pakaꞌatun ai-ai palsukuꞌan sigām. Daꞌa kapinin minsan dangan. Papatayun sigām kamemon dꞌnda-lꞌlla sampay ni ondeꞌ-ondeꞌ maka anak-duruꞌan. Papatayun isab saga kahayopan sigām, ai naka sapiꞌ, ai naka bili-bili, ai naka untaꞌ sampay kuraꞌ. Papatayun kamemon.’ ”
4 Sakali pinalinganan eꞌ si Saꞌul saga aꞌana magbobonoꞌ, sinōꞌ patipun ma daꞌira Telaꞌim. Jari duwahatus ngibu sundalu magtinapeꞌ ya bay patipun pinaꞌan, maka sangpūꞌ ngibu isab min bangsa Yuda. 5 Na, pehēꞌ disi Saꞌul tudju ni daꞌira bangsa Amalek ati patapuk ma kalꞌbbakan boꞌ anipihan sigām. 6 Jari magbandaꞌ si Saꞌul ma bangsa Kēn, yukna, “Alaꞌan kam min deyoman saga bangsa Amalek ilu boꞌ kam mbal talapay pinapatay, sabab aheya kahāpan bay hinangbi ma bangsa Israꞌil waktu kaluwas sigām min lahat Misil.” Angkan paokat minnaꞌan saga bangsa Kēn.
7 Sakali itu, parugpak disi Saꞌul ni bangsa Amalek, tinagnaꞌan min Habila sampay taꞌabut Sūr, ya lahat ma bihing Misil tampal ni sobangan. 8 Tapapatay eꞌ sigām kamemon saga sundalu Amalek inān sagōꞌ si Agag ya sultan sigām hal bay sinaggaw. 9 In si Agag maka saga hayop ya katapusan ahāp, maka saga anak hayop ya asambu, halam bay niꞌinay eꞌ disi Saꞌul maka saga aꞌana. Ahuskaw sigām amakaꞌat ai-ai ahāp angkan aniyaꞌ lagiꞌ allum maka takapin. Sagōꞌ sasuku halam kapūsanna bay nilaglag katūyan eꞌ sigām.
10 Manjari angallam PANGHŪꞌ ma si Samwel, yukna, 11 “Magsusun aku ameneꞌ si Saꞌul magsultan sabab kataikutan aku eꞌna, maka halam bay beyaꞌna saga panohoꞌanku.” Pagkale itu-i heꞌ si Samwel, landuꞌ iya asusa angkan iya angamuꞌ-ngamuꞌ ni si Yawe animpus dasangom inān.
12 Pagꞌllaw dakayuꞌ hinabu subu-subu lagiꞌ, pabungkal na si Samwel arak amowa magꞌndaꞌ maka si Saꞌul, saguwāꞌ aniyaꞌ angahakaꞌan iya, yukna, “Si Saꞌul bay ma kauman Karmel insiniꞌ amatꞌnggehan taꞌu-taꞌu pamaheyana ma kabantuganna. Waꞌi na iya palūd ni Gilgal.”
13 Makatꞌkka paꞌin si Samwel ni Gilgal, ahꞌlling si Saꞌul ni iya, yuk-i, “Mura-murahan bang paꞌin ka binarakatan eꞌ si Yawe! Bay na beyaꞌku saga panohoꞌanna.”
14 Anambung magtūy si Samwel, yukna, “Na bang buwattēꞌ, ai bahāꞌ lling bili-bili maka sapiꞌ ya takaleku itu?”
15 Anambung si Saꞌul, yukna, “Ya ilu bay taꞌagaw eꞌ saga sundaluku min bangsa Amalek. Bay kinapinan eꞌ sigām saga bili-bili maka saga sapiꞌ ya katapusan ahāp supaya aniyaꞌ panukbal ni si Yawe ya Tuhannu. Saddī mꞌnnilu bay papatay kami kamemon.”
16 “Ē! Sarang na!” yuk si Samwel. “Kalehun giꞌ bay pangallam PANGHŪꞌ ma aku dibuhiꞌ.”
“Na, hakaꞌin aku,” yuk si Saꞌul.
17 Ahꞌlling si Samwel yukna, “Areyoꞌ kabantugannu araiꞌ bang ma bistahannu, malaingkan in kaꞌa pagmakōkan ma saga kapanubuꞌan bangsa Israꞌil. Tapeneꞌ ka eꞌ si Yawe magsultan ma sigām. 18 Ya panohoꞌanna ma kaꞌa, yuk-i, ‘Laglagun kamemon saga aꞌa Amalek, ya bangsa patilaꞌatun inān. Bonoꞌun sigām sampay sigām amatay kamemon.’ ” 19 Atilaw lagiꞌ si Samwel yukna, “Angay halam beyaꞌnu panohoꞌan PANGHŪꞌ-Yawe heꞌ? Angay magtūy agawnu saga tatabanan ya ka makahinang kalaꞌatan makasāk atay PANGHŪꞌ?”
20 Anambung si Saꞌul, “Oy! Bay du aku magkahagad ma kabayaꞌan PANGHŪꞌ. Bay hinangku panohoꞌanna ma aku. Bay papatayku kamemon bangsa Amalek maka bay saggawku si Agag ya sultan sigām. 21 Sukuꞌ ma Tuhan asal saga bili-bili maka sapiꞌ ya tataban inān, malaingkan kinapinan eꞌ saga sundaluku saga hayop katapusan ahāp. Itiyaꞌ na ma Gilgal boꞌ aniyaꞌ susumbaliꞌan tinukbalan ni si Yawe ya Tuhannu.”
22 Yuk sambung si Samwel ma si Saꞌul,
“Kasulutan bahāꞌ si Yawe ma saga susumbaliꞌan tinunuꞌ
maka tutukbalan pagtaubat
labi lagiꞌ min pameyaꞌta ma saga panohoꞌanna?
Ahāp lagiꞌ magkahagad ma panohoꞌan Tuhan
min amowa tutukbalan.
Ahāp lagiꞌ ameyaꞌ ma kabayaꞌanna
min anukbal lanab min saga bili-bili lꞌlla.
23 Pinasaliꞌ ni dusa magpuputikaꞌ
ya dusa aꞌa anaggaꞌ ma PANGHŪꞌ,
maka bang aꞌa magmalangkahi,
pasaliꞌ laꞌatna ni pagsumba ni saga taꞌu-taꞌu.
Ma pasalan kataikutnu min panohoꞌan PANGHŪꞌ-Yawe,
tinaikutan isab heꞌna kapagsultannu.”
24 Manjari ahꞌlling si Saꞌul ma si Samwel, yukna, “Bꞌnnal, bay aku makalanggal panohoꞌan PANGHŪꞌ maka panohoꞌannu. Tuꞌud aku tināw ma saga aꞌaku, angkan bay beyaꞌku pamogos sigām. 25 Ndūꞌ tuwan,” yukna, “amuꞌku junjung ni kaꞌa, ampunun aku. Seheꞌin aku boꞌ kita pabalik pehēꞌ anumba ni PANGHŪꞌ-Yawe.”
26 Saguwāꞌ anambung si Samwel, yukna, “Hē! Mbal aku ameyaꞌ ma kaꞌa sabab bay taikutannu panohoꞌan PANGHŪꞌ, maka ilu na ka tinaikutan heꞌna. Mbal na ka makapagsultan ma bangsa Israꞌil!”
27 Jari itu, song paꞌin alaꞌan si Samwel, niragtuꞌ tōng jubana eꞌ si Saꞌul ati magtūy ageseꞌ. 28 Yuk si Samwel ma iya, “Ndaꞌun na, in kapagsultannu sapantun juba itu. Taragtuꞌ eꞌ PANGHŪꞌ min kaꞌa llaw itu, ati pamuwanna ma dakayuꞌ pagkahinu, aꞌa labi ahāp min kaꞌa. 29 In Tuhan Kasahayaꞌan bangsa Israꞌil, mbal magputing atawa amindahan pikilanna sabab nggaꞌi ka iya manusiyaꞌ magpinda-pinda pikilan.”
30 Anganjunjung pabalik si Saꞌul. “Ahoꞌ, bay aku makarusa,” yukna, “sagōꞌ amuꞌku ma kaꞌa, pagaddatin aku ma baihuꞌan saga pagmattoꞌahan ma bangsaku Israꞌil sampay ma bangsa Israꞌil kamemon. Seheꞌin aku boꞌ kita pabalik amudji ni si Yawe ya pagtuhanannu.” 31 Sakali pabunyug na si Samwel ma si Saꞌul ati makapudji iya ni PANGHŪꞌ.
Pinapatay si Agag
32 Pagubus, ahꞌlling si Samwel, yukna, “Bowahunbi piꞌitu si Agag ya sultan bangsa Amalek.”
Na, pasekot si Agag pinaꞌan ni si Samwel ma halam aniyaꞌ kahanggawanna, sabab ma pikilanna, “Tantu palabay kapiligduhan, mbal na koꞌ aku itu pinapatay.”
33 Saguwāꞌ yuk si Samwel,
“Ma pasalan aheka inaꞌ kalungayan anak sabab bay papataynu,
damikiyanna amatay du ka isab ati kalungayan anak inaꞌnu.”
Jari pinaglagut-lagut si Agag eꞌ si Samwel ma matahan si Yawe, mainaꞌan ma Gilgal.
34 Puwas paꞌin eꞌ-i, amoleꞌ na sigā karuwangan, si Samwel ni Rama boꞌ si Saꞌul ni Gibeya. 35 Min waktu inān sampay ni llaw kamatay si Samwel halam na iya amowa magꞌndaꞌ ma si Saꞌul. Sagōꞌ magdukka na paꞌin si Samwel ma kahālan si Saꞌul. Magsusun isab si Yawe sabab kapameneꞌna ma si Saꞌul magsultan ma bangsa Israꞌil.