16
Si Daꞌud Pineneꞌ Magsultan
1 Manjari dakayuꞌ llaw, magkallam si Yawe ma si Samwel, yukna, “Sarang na pagdukkanu ma si Saꞌul pagka kataikutan eꞌku pagsultanna ma bangsa Israꞌil. Isihun nsꞌllan jaitun ni tanduk ya bowanu ilu boꞌ ka pehēꞌ ni Betlehem ni aꞌa pinagōnan si Jesse. Sabab aniyaꞌ anakna lꞌlla tapeneꞌku magsultan.”
2 Sagōꞌ atilaw si Samwel, yukna, “Buwattingga kapehēꞌku? Bang tasayu eꞌ si Saꞌul, tantu aku pinapatay eꞌna.”
Ya sambung PANGHŪꞌ-Yawe, “Amowa ka dakayuꞌ anak sapiꞌ dꞌnda boꞌ hakaꞌin saga aꞌa mahēꞌ in kaꞌa pehēꞌ amowa tutukbalan pagkulbannu ni Tuhan. 3 Taꞌabbitun si Jesse ni pagkulbanan ati pataꞌuku ni kaꞌa bang ai subay hinangnu. Busugin nsꞌllan ya aꞌa tōꞌku ma kaꞌa.”
4 Bineyaꞌ eꞌ si Samwel panohoꞌan PANGHŪꞌ ati pehēꞌ iya ni Betlehem. Pagtꞌkkana, bināk iya eꞌ saga pagmattoꞌahan mainaꞌan maka heꞌ sigām amidpid. Atilaw sigām ma iya, yuk-i, “Tuwan, kahāpan bahāꞌ ya pagpiꞌitunu ilu?”
5 “Ahoꞌ,” yuk sambung si Samwel. “Piꞌitu aku anukbal tutukbalan kulban ni si Yawe. Sussihunbi pamarananbi boꞌ kam piꞌitu ameyaꞌ ma aku.” Sinussi isab eꞌ si Samwel si Jesse maka saga anakna lꞌlla boꞌ taꞌabbitna sigām ni pagkulban.
6 Pagtꞌkka sigām, taꞌndaꞌ eꞌ si Samwel si Eliyab ya anak si Jesse kasiyakahan, angkan pangannalna, “Tantu ya na itu bay tapeneꞌ eꞌ PANGHŪꞌ-Yawe.”
7 Saguwāꞌ angallam PANGHŪꞌ ma si Samwel, yukna, “Daꞌa ndaꞌun luwana atawa lanjangna sabab nggaꞌi ka iya bay tapeneꞌku. Magbiddaꞌ asal eꞌku angꞌndaꞌ min pangꞌndaꞌ manusiyaꞌ. Sabab in manusiyaꞌ magꞌndaꞌ sadja ma pangluwahan saguwāꞌ aku si Yawe angꞌndaꞌ ma pangatayan.”
8 Sakali pinalinganan eꞌ si Jesse si Abinadab ya anakna pasunuꞌ boꞌ binowa palabay min matahan si Samwel. Saguwāꞌ yuk si Samwel, “Nggaꞌi ka iya bay tapeneꞌ eꞌ PANGHŪꞌ.” 9 Jari si Samma, ya anak si Jesse katꞌllu na, pinalabay min si Samwel, sagōꞌ yuk si Samwel, “Nggaꞌi ka du isab iya bay tapeneꞌ eꞌ PANGHŪꞌ.” 10 Tapalabay eꞌ si Jesse kapituꞌ anakna lꞌlla min matahan si Samwel sagōꞌ buwattēꞌ na paꞌin pahꞌlling si Samwel, yukna, “Halam sai-na ma sigām bay tapeneꞌ eꞌ PANGHŪꞌ.” 11 Angkan atilaw si Samwel ma si Jesse yukna, “Halam na aniyaꞌ saddī anaknu min sigām itu?”
“Aniyaꞌ giꞌ kasiyalihan,” yuk sambung si Jesse, “saguwāꞌ waꞌi magipat saga bili-bili.”
Ahꞌlling si Samwel, “Sohoꞌun iya pinabowa piꞌitu. Mbal kitam makatagnaꞌ satꞌggolna mbal atꞌkka.”
12 Angkan pinaꞌāꞌ eꞌ si Jesse anakna kasiyalihan. Ondeꞌ arorog iya, amanis, maka ahāp isab nindaꞌ matana.
Jari yuk PANGHŪꞌ ma si Samwel, “Ya na ilu tapeneꞌku. Pēꞌun na, busugin iya nsꞌllan tandaꞌ kapagsultanna.”
13 Manjari ningāꞌ eꞌ si Samwel tanduk isihan nsꞌllan eꞌ boꞌ busuganna si Daꞌud ma matahan saga danakanna. Tinagnaꞌan min llaw inān pataptap Rū si Yawe ma si Daꞌud. Sakali amoleꞌ na pabalik si Samwel ni Rama.
Si Daꞌud ma Deyoman Sultan Saꞌul
14 Sakali alaꞌan na Rū si Yawe min si Saꞌul ati aniyaꞌ saitan pinapehēꞌ eꞌ si Yawe aminsanaꞌ iya. 15 Ahꞌlling saga tendogna, yuk-i, “Tuwan sultan, tantu ka bininsanaꞌ eꞌ saitan bay min Tuhan. 16 Angkan tuwan, sohoꞌun kami saga sosohoꞌannu itu amiha dakayuꞌ aꞌa ataꞌu magbiyula. Ati sakahabaꞌ ka tinꞌkka eꞌ saitan, magbiyula iya supaya pahāp palasahannu.”
17 Angkan magpanohoꞌan si Saꞌul ma saga tendogna inān, yukna, “Na ahoꞌ, pihaꞌinbi aku aꞌa apanday magbiyula boꞌ bowahunbi piꞌitu.”
18 Jari ahꞌlling dakayuꞌ sosohoꞌan inān yukna, “Tuwan, aniyaꞌ kataꞌuwanku apanday magbiyula. Anak iya si Jesse aꞌa min Betlehem. Aesog iya maka bobonoꞌun. Ahantap isab himumūnganna maka arorog pamarananna. Inaꞌan isab PANGHŪꞌ-Yawe patꞌttog ma iya.”
19 Manjari amabeyaꞌ lapal si Saꞌul ni si Jesse, yuk-i, “Papiꞌituhun anaknu si Daꞌud ya magiꞌipat bili-bili ilu.” 20 Pagkale si Jesse, magtūy iya anganduwaꞌ ni kuraꞌ baꞌanan tinapay maka dapangisihan binu-anggul maka dakayuꞌ anak kambing. Aubus paꞌin niruwaꞌ eꞌna, pinatulak eꞌna si Daꞌud pehēꞌ ni si Saꞌul.
21 Sakali anagnaꞌ na maghinang si Daꞌud ma deyoman sultan Saꞌul. Kasulutan sidda si Saꞌul ma iya angkan iya nihinang dakayuꞌ magbobowa pakokosna. 22 Amabeyaꞌ lapal isab si Saꞌul pehēꞌ ni si Jesse, yuk-i, “Pamaituhun na si Daꞌud ma deyomanku sabab kasulutan aku ma iya.”
23 Na, sakahabaꞌ si Saꞌul bininsanaꞌ eꞌ saitan bay min Tuhan, magbiyula magtūy si Daꞌud. Bay paꞌin iya makabiyula, pahāp palasahan si Saꞌul maka alaꞌan isab saitan min iya.