Rūt 4

Ningāꞌ Hꞌnda si Rūt eꞌ si Bowas

¹ Manjari itu, hinabu magsuli-suli si Naomi maka si Rūt, pehēꞌ si Bowas aningkōꞌ ma atag lawang ya pagsōran kauman Betlehem eꞌ. Sakali palabay minnaꞌan dakayuꞌ kampung si Naomi ya bay pinagpaꞌin eꞌ si Bowas. Magtūy lingananna boꞌ binowa magsuli-suli. Yuk si Bowas, “O tuwan, piꞌitu giꞌ ka aningkōꞌ.” Na pasekot aꞌa inān aningkōꞌ.

² Sakali pinalinganan eꞌ si Bowas sangpūꞌ pagmattoꞌahan ma kauman inān. Yukna ni sigām, “Aningkōꞌ kam maitu saga tuwan.” Jari aningkōꞌ isab sigām. ³ Makatingkōꞌ paꞌin sigām kamemon, ahꞌlling si Bowas ni kampung heꞌ, yukna, “Tuwan, in si Naomi, ya balu si Elemelek, bay na pabīng piꞌitu min lahat Mowab maka aniyaꞌ niyatna angandagangan tanaꞌ si Elemelek ya bay kampungta. ⁴ Wajib ka pahatiku, kalu ka bilahi angalꞌkkat. Bang ka bilahi, atiyaꞌ saga pagmattoꞌahanta anaksiꞌ, beyaꞌ isab saga aꞌa kaseheꞌan ya magtingkōꞌan maitu. Damikiyanna isab bang ka mbal, hakaꞌin aku boꞌ kataꞌuwanku. Sabab halam aniyaꞌ saddī taga-kapatut angalꞌkkat tanaꞌ inān bang nggaꞌi ka kaꞌa boꞌ yampa aku.”

“Ahoꞌ, lꞌkkatku na,” yuk kampung si Bowas inān.

⁵ Jari ahꞌlling si Bowas, “Pagka bꞌllinu na tanaꞌ min si Naomi maka ayuwanna si Rūt ya dꞌnda Mowab, akuhannu du isab ningāꞌ hꞌnda si Rūt. Jari mbal alungay ōn si Mahalon minsan amatay, sabab kaniyaꞌan iya anak min bay hꞌndana, maka aniyaꞌ na paꞌin tubuꞌ pamusakaꞌan tanaꞌna.”

⁶ Anambung kampung inān, yukna, “Bang buwattilu hatulanna, mbal aku makaꞌaku angalꞌkkat tanaꞌ ilu sabab mbal du tahinangku pusakaꞌ. Na, kaꞌa na ya angalꞌkkat sabab mbal tagagaku.”

⁷ (Na ya addat ma masa heꞌ-i ma lahat Israꞌil, bang aniyaꞌ aꞌa magpalꞌkkat atawa magdagang ai-ai pangaltaꞌna, subay niurusan taumpaꞌna boꞌ niꞌndeꞌan ni aꞌa angalꞌkkat inān. Ya itu hatulan saraꞌ ma bangsa Israꞌil ma takdil lꞌngngan kataddangan.) ⁸ Angkan yuk kampung inān ni si Bowas, “Kaꞌa na amꞌlli tanaꞌ ilu.” Magtūy niurusan taumpaꞌna.

⁹ Buwattēꞌ paꞌin, amissala si Bowas ni saga pagmattoꞌahan maka saga aꞌa mainaꞌan, yukna, “Kasaksiꞌanbi ma llaw itu aku ya makabꞌlli min si Naomi kamemon palsukuꞌan si Elemelek, si Kiliyon maka si Mahalon. ¹⁰ Damikiyanna si Rūt ya dꞌnda bangsa Mowab, ya bay balu si Mahalon, taꞌāꞌku na hꞌnda boꞌ supaya aniyaꞌ tubuꞌ pinusakaꞌan kamemon bay palsukuꞌan aꞌa mamatay itu. Mbal isab takalipat ōnna min pangentom saga kaukampunganna atawa min lahatna. Saksiꞌ kam llaw itu.”

¹¹ Anambung saga pagmattoꞌahan maka saga aꞌa mainaꞌan ma tongod lawang kauman eꞌ. Yuk-i, “Ahoꞌ, saksiꞌ kami. Mura-murahan bang paꞌin dꞌnda ya song tahꞌndanu ilu binuwanan kahāpan heꞌ PANGHŪꞌ, pinasaliꞌ ni kahāpan bay tapamuwanna ma si Leya maka si Rakiya ya paginaꞌan bangsa Israꞌil.” Yuk sigām giꞌ isab, “Bang paꞌin pasōng kahaldayanu ma tumpuk Eprat maka patanyag ōnnu ma Betlehem. ¹² Bang paꞌin aniyaꞌ tubuꞌ pamuwan kaꞌa heꞌ PANGHŪꞌ min dꞌnda itu, boꞌ pasaliꞌ kaꞌanakannu ni anak si Peres, ya anak si Yuda min si Tamar.”

Pasal Kapangkatan si Daꞌud

¹³ Manjari ningāꞌ na hꞌnda si Rūt heꞌ si Bowas. Makapagdakayuꞌ paꞌin sigā, abꞌttong si Rūt min kahandak PANGHŪꞌ ati anganak lꞌlla. ¹⁴ Yuk saga karꞌndahan mainaꞌan ni si Naomi, “Pudjitam PANGHŪꞌ sabab mbal ka kasiya-siyahan. Ma llaw itu du aniyaꞌ mpunu lꞌlla taga-kapatut amaruli kaꞌa. Bang paꞌin atanyag ondeꞌ ilu ma katilingkal Israꞌil. ¹⁵ Iya ya amalasig kaꞌa maka angipat kaꞌa bang ka taꞌabut na atoꞌa. Sabab inaꞌ ondeꞌ ilu, ya na ayuwannu. Alasa iya ma kaꞌa, maka aheya halgaꞌna ma kaꞌa min anak lꞌlla pituꞌ hekana.”

¹⁶ Ati giniba heꞌ si Naomi ondeꞌ inān ati niꞌipat heꞌna. ¹⁷ Yuk saga karꞌndahan ma jadjahan inaꞌan, “Ahā, aniyaꞌ na anak si Naomi!” Jari Obed ya pangōn sigām ma iya. Na, si Obed itu ya na mmaꞌ si Jesse, si Jesse ya na mmaꞌ si Daꞌud.

¹⁸ Ya itu panubuꞌ si Peres:

Si Peres ya na mmaꞌ si Hesdon, ¹⁹ si Hesdon ya na mmaꞌ si Rām.

Si Rām ya na mmaꞌ si Aminadab, ²⁰ si Aminadab ya na mmaꞌ si Nason.

Si Nason ya na mmaꞌ si Salmon, ²¹ si Salmon ya na mmaꞌ si Bowas.

Si Bowas ya na mmaꞌ si Obed, ²² si Obed itu ya na mmaꞌ si Jesse,

Si Jesse itu ya na mmaꞌ si Daꞌud.