3
Si Bowas maka si Rūt
1 Dakayuꞌ llaw ahꞌlling si Naomi ni si Rūt, “Dayang,” yukna, “pihaꞌanta ka patꞌnnaꞌan atotog boꞌ aniyaꞌ magnapaka ma kaꞌa. 2 Kampungta asal si Bowas, ya tag-dapu huma bay paghinangan saga karꞌndahan bay pameyaꞌannu heꞌ. Sangom itu, pehēꞌ iya ni tongod pagtꞌppahan boꞌ magtahap saga bay niani heꞌ. 3 Amandi ka boꞌ ka amahamut di-nu. Jari sulugun badjuꞌnu ahāp toꞌongan boꞌ ka pehēꞌ ni pagtꞌppahan. Daꞌa iya pataꞌuhun in kaꞌa waꞌi mahēꞌ, subay na iya aubus amangan maka anginum. 4 Bang iya makalege na, gindanin bang ma atag ingga palegehanna. Jari pehēꞌ ka, laisun mantana boꞌ ka abahak ma tapeꞌanna. Nihakaꞌan du ka eꞌna bang ai subay hinangnu.”
5 Anambung si Rūt yukna, “Beyaꞌku kamemon panohoꞌannu ilu, babuꞌ.” 6 Manjari bineyaꞌ heꞌ si Rūt panohoꞌan matoꞌana ati pehēꞌ na iya ni tongod pagtꞌppahan.
7 Aubus paꞌin bay amangan maka anginum si Bowas boꞌ hinabu ahāp palasahanna, pabahak iya ma tongod pagtauꞌan pai. Jari tatuli paꞌin iya, pasekot pinaꞌan si Rūt kamayaꞌ-mayaꞌ boꞌ nilais manta min tapeꞌ si Bowas ati palege iya ma tapeꞌan. 8 Alalom paꞌin bahangi, takuddat si Bowas angkan iya makahimuya, maka aniyaꞌ dꞌnda tasayuna palege ma atag tapeꞌna.
9 “Sai sa kaꞌa ilu?” yukna.
Anambung si Rūt, “Aku itu si Rūt, ya sosohoꞌannu,” yukna. “Pagka kaꞌa ilu kampung kami taga-kapatut, bꞌllatun giꞌ tōng mantanu ma aku.”
10 “Mura-murahan bang paꞌin ka nilidjikiꞌan eꞌ PANGHŪꞌ, dayang,” yuk si Bowas. “Ya kahāpan tahinangnu buwattinaꞌan aheya giꞌ min bay tahinangnu dahū. Halam ka bay sinōd bayaꞌ ma kalꞌllahan abataꞌ, ai na ka miskin atawa dayahan. 11 Angkan buwattinaꞌan, daꞌa na ka asusa sabab beyaꞌku kamemon pangamuꞌnu. Makataꞌu du isab kamemon lūng-kampungnu in kaꞌa ilu dꞌnda abontol. 12 Bꞌnnal ya yuknu ilu, in aku dakayuꞌ kampungnu taga-kapatut anabangan kaꞌa, sagōꞌ aniyaꞌ giꞌ kampungnu labi agaꞌos min aku. 13 Maitu na ka atuli sangom itu. Salung subu, pehēꞌku aꞌa heꞌ, kalu niakuhan eꞌna amahꞌnda kaꞌa. Bang hatiꞌ iya angaku, ahāp. Sagōꞌ bang mbal, na saksiꞌta PANGHŪꞌ ya allum salama-lama in aku itu angakuhan kaꞌa du. Maitu na ka atuli.”
14 Manjari palege na si Rūt mainaꞌan sampay ni kasubuhan. Pagdaiꞌ llaw pabangun na iya ma halam lagiꞌ aniyaꞌ makasayuhan iya. Yuk si Bowas ma saga aꞌana, “Daꞌa kam amataꞌu ni sai-na saga aniyaꞌ dꞌnda bay makapiꞌitu ni pagtꞌppahan.” 15 Ahꞌlling lagiꞌ si Bowas, yukna, “Bowahun piꞌitu seꞌob ma barannu ilu boꞌ bꞌllatun maitu.” Pagbꞌllat paꞌin seꞌob inān, tinꞌppongan iya nnom gantang pai-tirigu bay tinꞌppa boꞌ pinadurung ma iya. Jari amoleꞌ na pabīng si Bowas ni kaumanna.
16 Makapoleꞌ paꞌin si Rūt, tinilaw iya eꞌ matoꞌana, yuk-i, “Buwattingga du, dayang?”
Sinuli-sulihan eꞌ si Rūt matoꞌana bang ai bay tahinang eꞌ si Bowas ma iya. 17 Maka yukna giꞌ isab, “Bay aku binuwanan nnom gantang pai-tirigu eꞌ si Bowas, sabab bang ma iya, sinohoꞌ aku mbal amoleꞌ bang halam aniyaꞌ tabowaku pamuwan ma kaꞌa.”
18 Manjari ahꞌlling si Naomi, “Angagad-ngagad na sadja ka, dayang, sampay tataꞌunu bang ai kataluwaꞌanna. Tantu mbal pahali si Bowas llaw itu bang halam aniyaꞌ kajatuhan palkalaꞌ itu.”