Rūt 2

Kapagbāk si Rūt maka si Bowas

¹ Manjari, aniyaꞌ lꞌlla pinagōnan si Bowas, aꞌa taga-kaniyaꞌ maka gaꞌosan. Min tumpuk si Elemelek iya, pamikitan si Naomi min hꞌllana.

² Dakayuꞌ llaw, ahꞌlling si Rūt ni si Naomi, yukna, “Babuꞌ, papehēꞌun giꞌ aku ni huma amuwaꞌ kapin bay paganihan ma sai-sai ya bilahi pameyaꞌanku.”

Anambung si Naomi, yukna, “Ahoꞌ, pehēꞌ ka, dayang.” ³ Jari lumꞌngngan na si Rūt ni huma paturul min buliꞌan saga aꞌa magaꞌani inān amuwaꞌ kapin bay paganihan heꞌ. In tag-dapu huma inān ya na si Bowas kampung si Elemelek.

⁴ Ma waktu inaꞌan-i, atꞌkka si Bowas bay min Betlehem ati sinagina eꞌna saga aꞌa magaꞌani heꞌ, yukna, “Owaꞌ! Bang paꞌin PANGHŪꞌ pabeyaꞌ ma kaꞌam!”

Yuk isab sambung saga aꞌa inān, “Bang paꞌin ka binarakatan eꞌ PANGHŪꞌ!”

⁵ Jari atilaw si Bowas ni kapatas saga magaꞌani yukna, “Sai sa dꞌnda inān?”

⁶ Anambung kapatas itu, yukna, “Dꞌnda ilu aꞌa bangsa Mowab bay ameyaꞌ piꞌitu ma si Naomi min lahat Mowab. ⁷ Bay iya amaꞌid min aku bang konoꞌ iya makajari paturul min buliꞌan saga magaꞌani amuwaꞌ kapin bay paganihan heꞌ. Min abay subu lagiꞌ kapaghinangna ilu. Ya du halianna ilu pasindung daiꞌ-daiꞌ.”

⁸ Jari ahꞌlling si Bowas ni si Rūt yukna, “ Arung, akale ka pahāp. Daꞌa na ka paliyu amuwaꞌ ni huma saddī. Maitu na sadja ka magbeyaꞌ maka saga sosohoꞌanku karꞌndahan itu. ⁹ Ndaꞌun bang maingga paganihan saga aꞌaku ati pasambeyaꞌ ka ma saga karꞌndahan ilu. Bay na bandaꞌanku saga kalꞌllahan maitu sohoꞌku ka daꞌa niꞌinay ma sigām. Bang ka patay-boheꞌ, pehēꞌ paꞌin ka angāꞌ min kibut bay niꞌisihan eꞌ saga kalꞌllahan eꞌ.”

¹⁰ Pagka buwattēꞌ ya bissala si Bowas, magtūy pasujud si Rūt ni tanaꞌ ati ahꞌlling, yukna, “Tuwan, angay aku pahalgaꞌnu? Aku itu dakayuꞌ sadja aꞌa liyu.”

¹¹ Sagōꞌ anambung si Bowas yukna, “Bay aku kahakaꞌan ma pasal kahāpan bay tahinangnu ma matoꞌanu min bay giꞌ kamatay hꞌllanu. Bay konoꞌ bbahannu inaꞌ-mmaꞌnu sampay lahatnu ati itu ka ameyaꞌ patꞌnnaꞌ ma lahat halam bay kataꞌuwannu. ¹² Bang paꞌin ka nilidjikiꞌan heꞌ PANGHŪꞌ Sangat Kawasa ma bay tahinangnu ilu. Bang paꞌin ka tinungbasan manglabi-labihan heꞌ PANGHŪꞌ bangsa Israꞌil, ya sapantun pikpik manuk pasindungannu.”

¹³ Yuk sambung si Rūt, “Bang paꞌin aku taptap makasulut pangatayannu, tuwan. Bay aluknu pangatayanku sabab kahāp sin saga bissalanu ilu minsan aku mbal makasibuꞌ ni dꞌnda sosohoꞌannu.”

¹⁴ Taꞌabut paꞌin waktu pagkakan, nilinganan si Rūt heꞌ si Bowas, “Piꞌitu ka,” yukna, “pasalu ka ma kami amangan tinapay boꞌ bahugun ni sukaꞌ binu-anggul itu.”

Mainaꞌan paꞌin ma pagkakanan, nilabot si Rūt eꞌ si Bowas maka pai sinanglag. Jari amangan iya pahāp sampay asso maka aniyaꞌ giꞌ takapin. ¹⁵ Bay paꞌin heꞌ-i, anꞌngge na iya boꞌ pabalik ni paghinanganna. Ahꞌlling si Bowas ni saga sosohoꞌanna yukna, “Amay-amay, daꞌa iya lāngunbi minsan iya amuwaꞌ ma tongod saga pꞌkkosan. ¹⁶ Gom paꞌin ngāꞌinbi iya min pꞌkkosan heꞌ boꞌ patꞌnnaꞌunbi ma pamuwaꞌanna. Dūlinbi sadja iya.”

¹⁷ Angkan mahēꞌ na paꞌin si Rūt ma huma sampay ni kasangoman. Pagtꞌppana saga buwaꞌ pai-tirigu bay tapuwaꞌna heꞌ, magbuhat saga sangpūꞌ gantang. ¹⁸ Manjari binowa eꞌna amoleꞌ ati taꞌndaꞌ eꞌ matoꞌana bang pila heka bay tatimukna. Sinōngan isab eꞌna ni matoꞌana ya labi min bay pamangananna heꞌ.

¹⁹ Sakali tinilaw iya eꞌ matoꞌana, yuk-i, “ Maingga ka bay amuwaꞌ llaw ilu? Sai tag-dapu huma bay paghinangannu? Bang paꞌin aheya kahāpan ma aꞌa bay amaidda kaꞌa ilu.”

Jari nihaka eꞌ si Rūt ma si Naomi pasalan ya tag-dapu lugal bay paghinanganna heꞌ. “Si Bowas,” yukna, “ya ōn aꞌa bay paghinanganku llaw itu.”

²⁰ “PANGHŪꞌ magbarakat ma si Bowas,” yuk si Naomi. “Halam pahali kahāpanna ma saga allum maka ma saga waꞌi na magpatayan.” Ahꞌlling giꞌ si Naomi, yukna, “Ya lꞌlla ōnannu ilu kampungtam du. Ya ilu taga-kapatut anabangan kita.”

²¹ Ahꞌlling giꞌ si Rūt, “Bay isab iya ahꞌlling ma aku sinohoꞌ giꞌ aku ameyaꞌ ma saga sosohoꞌanna sampay sigām aubus magani.”

²² Yuk si Naomi ni si Rūt, “Ahāp koꞌ heꞌ bang ka mahēꞌ ma humana magbeyaꞌ maka saga sosohoꞌanna karꞌndahan. Sabab bang aꞌa saddī ya pameyaꞌannu, aniyaꞌ araiꞌ angalaꞌat kaꞌa.”

²³ Jari mahēꞌ na si Rūt maka saga sosohoꞌan si Bowas karꞌndahan sampay aubus musim pagani. Sagōꞌ masi iya patꞌnnaꞌ ma matoꞌana.