RŪT
1
JŪD RŪT
Palbahagiꞌan Kitab Jabul
Si Naomi maka si Rūt
1 Ma waktu paꞌin aniyaꞌ maghuhukum analassay palkalaꞌ ma bangsa Israꞌil, bay ginotom lahat sigām. Manjari aniyaꞌ dakayuꞌ lꞌlla min kauman Betlehem magbeyaꞌ maka hꞌndana maka duwa anakna lꞌlla bay papinda ni lahat Mowab. 2 Ya ōn lꞌlla itu si Elemelek, hꞌndana si Naomi, ōn duwangan anakna inān si Mahalon maka si Kiliyon. Sigām itu tumpuk Eprat min kauman Betlehem ma lahat Yuda. Bay sigām papinda ni lahat Mowab boꞌ mahēꞌ maglahat.
3 Na, atꞌggol-tꞌggol paꞌin sigām mainaꞌan, amatay si Elemelek ya hꞌlla si Naomi, ati si Naomi laꞌa maka karuwangan anakna tabba. 4 Makahꞌnda duwangan anakna inān ni dꞌnda bangsa Mowab, ya ōn sigām si Orpa maka si Rūt. Palabay paꞌin sangpūꞌ tahun, 5 amatay isab disi Mahalon maka si Kiliyon, jari si Naomi laꞌa takapin pagka amatay na anak-hꞌllana.
6 Masi giꞌ sigām ma lahat Mowab, kahakaꞌan si Naomi pasal saga aꞌa ma lahatna porol, aheka konoꞌ pagkakan sigām ma sabab kaheya tabang PANGHŪꞌ. 7 Manjari, alaꞌan na sigām min lahat bay patꞌnnaꞌan sigām inān boꞌ pabīng ni Yuda ya lahatna.
8 Ma palꞌngnganan paꞌin, ahꞌlling si Naomi ni saga ayuwanna inān, yukna, “Saga dayang, amoleꞌ na kam pabalik ni saga mattoꞌabi. Mura-murahan bang paꞌin kam binuwanan kahāpan eꞌ PANGHŪꞌ buwat kahāpan bay tahinangbi ma aku maka saga kahꞌllaꞌanbi heꞌ. 9 Bang paꞌin kam isab nirūlan eꞌna makapaghꞌlla maka kaniyaꞌan kam kahāpan ma deyoman sigām.” Jari, siniyum eꞌ si Naomi saga ayuwanna ati anangis toꞌongan duwangan itu 10 maka heꞌ sigām ahꞌlling ni iya, yuk-i, “Ameyaꞌ na kami pabīng ma kaꞌa ni saga kampungnu.”
11 Saguwāꞌ anambung si Naomi, yukna, “Saga dayang, magpamoleꞌ na kam. Angay kam subay ameyaꞌ ma aku? Mbal na aku makabāk anak tapamahꞌllaku ma kaꞌam pabīng. 12 Pehēꞌ na kam,” yukna, “aku itu atoꞌa na. Mbal na aku makahꞌlla. Maka minsan isab aniyaꞌ hꞌllaku pahulid ni aku sangom ilu boꞌ aku makaꞌanak pabalik, 13 makalagad bahāꞌ kam sampay sigām taꞌabut asubul? Tantu mbal na. Gom giꞌ kaꞌam ilu saga dayang, daꞌa na buwat aku itu sabab ahunit landuꞌ ya bay pamatꞌkka eꞌ PANGHŪꞌ ma aku.”
14 Ma pasal pamissala si Naomi heꞌ, anangis sigām pabīng. Jari pasiyum maka amaꞌid na si Orpa, sagōꞌ si Rūt paunung ma matoꞌana.
15 Yuk si Naomi, “Oꞌo, ndaꞌun ba, bilasnu ilu amoleꞌ na ni saga mattoꞌana maka ni pagtuhananna. Na, pehēꞌ na ka ameyaꞌ ma iya.”
16 Sagōꞌ ya sambung si Rūt, “Daꞌa aku pogosun angꞌbba atawa anaikutan kaꞌa. Piꞌingga-piꞌingga ka ameyaꞌ aku. Maingga-maingga patꞌnnaꞌannu mahēꞌ isab aku. In bangsanu ya na bangsaku, jari in Tuhannu ya na pagtuhananku. 17 Bang ka maingga amatay, mahēꞌ du isab aku amatay maka kinubul. Bang paꞌin aku minulkaꞌan heꞌ PANGHŪꞌ bang aku paꞌbba min kaꞌa. Luwal laꞌa bang kamatay ya makapagbutas ma kita.” 18 Tasayu paꞌin eꞌ si Naomi lillaꞌ ameyaꞌ ma iya si Rūt, pahali na iya amogos.
19 Puwas paꞌin heꞌ-i, palanjal na sigām karuwangan sampay sigām makatꞌkka ni Betlehem. Pagꞌndaꞌ ma sigām, takuddat saga aꞌa ma kauman inān. Jari ahꞌlling saga karꞌndahan mainaꞌan, yuk-i, “Si Naomi na bahāꞌ ilu?”
20 Sagōꞌ yuk si Naomia ni sigām, “Daꞌa na aku ōninbi maka ōnku, sagōꞌ ōninbi na aku Marab sabab bay aku pinatꞌkkahan eꞌ PANGHŪꞌ kasukkalan mbal tapulaꞌ-pulaꞌ. 21 Waktu bay kalaꞌanku minnitu jukup-jukupan giꞌ aku, sagōꞌ bay aku pinabalik heꞌ PANGHŪꞌ piꞌitu ma halam na aniyaꞌ ai-aiku. Angkan daꞌa na aku ōninbi Naomi sabab bay aku pinatꞌkkahan kasukkalan maka kulang-kabus heꞌ PANGHŪꞌ Sangat Kawasa.”
22 Jari makabalik si Naomi maka ayuwanna si Rūt min Mowab. Atꞌkka sigām ni Betlehem ma timpu yampa anagnaꞌ pagani.