15
Pamalos si Samson ma saga Bangsa Pilistin
1 Mbal atꞌggol, taꞌabut paꞌin musim pagani pai-tirigu, angāꞌ si Samson dakayuꞌ kambing abataꞌ boꞌ pehēꞌ patibaw ni hꞌndana. Yukna ni matoꞌana lꞌlla, “Pasōd giꞌ aku ni bilik hꞌndaku.” Saguwāꞌ mbal amarūl mmaꞌ dꞌnda heꞌ.
2 Yukna ni si Samson, “Pangannalku abꞌnsi ka ma iya, angkan tapamahꞌndaku ni bagaynu. Sagōꞌ aniyaꞌ siyalina alingkat giꞌ min iya. Ngāꞌun iya hꞌnda.”
3 Yuk si Samson ni sigām, “Na, aniyaꞌ na kapatutku amalos ma kaꞌam bangsa Pilistin. Tantu kam mulaku.” 4 Jari paluwas iya minnēꞌ anaggaw tꞌllu hatus heka eroꞌ talun. Niengkotan eꞌna togel sigām pinaglingkit duwa. Pagubus, aniyaꞌ saga suwariyan binatuk eꞌna pehēꞌ ni togel eroꞌ bay pinaglingkit eꞌ. 5 Sinūꞌan eꞌna saga suwariyan inān boꞌ yampa palꞌppana saga eroꞌ ni baꞌanan pai-tirigu ya ma kahumaꞌan saga Pilistin. Jari tatunuꞌ pꞌkkosan pai bahaꞌu bay niani maka pai halam giꞌ taꞌani. Tatunuꞌ saga pagtatanoman anggul maka kabbun kayu jaitun.
6 Atilaw saga bangsa Pilistin, yuk-i, “Sai bay magkahinangan itu?”
Kahakaꞌan sigām magtūy, yuk-i, “Si Samson ya ayuwan aꞌa Timna inān, ma sabab in hꞌndana waꞌi pamahꞌnda ni bagayna.” Angkan pehēꞌ saga Pilistin anunuꞌ sampay amapatay dꞌnda ya bay hꞌnda si Samson beyaꞌ maka mmaꞌna.
7 Jari ahꞌlling si Samson ni saga aꞌa bay anunuꞌ heꞌ, yukna, “Pagga buwattēꞌ hinangbi, mbal aku pahali satꞌggol kam mbal kabalosanku.” 8 Minnēꞌ magsabil si Samson boꞌ angalagut saga Pilistin inān ati aheka sigām amatay. Pagubus, palūd iya minnaꞌan boꞌ patꞌnnaꞌ ma deyom songab batu ya niōnan Etam.
9 Manjari itu, pehēꞌ saga aꞌa Pilistin magpustu ma lahat Yuda, boꞌ parugpak ni kauman Lehi. 10 Tinilaw sigām eꞌ saga aꞌa bangsa Yuda, yuk-i, “Angay kami bonoꞌbi?”
Ya sambung saga Pilistin, “Bay kami piꞌitu anaggaw si Samson supaya iya kabalosan ma bay hinangna ma kami.”
11 Manjari aniyaꞌ tꞌllungibu kalꞌllahan min bangsa Yuda pehēꞌ ni songab batu Etam boꞌ ahꞌlling ni si Samson, yuk-i, “Halam bahāꞌ kataꞌuwannu in kitam pinagbayaꞌan asal eꞌ bangsa Pilistin? Tantu kitam binalosan ma sabab kalaꞌatan ya tahinangnu heꞌ.”
Anambung si Samson, yukna, “Ya tahinangku ma sigām buwat bay hinang sigām ma aku.”
12 Yuk saga aꞌa Yuda, “Ya maksud kami piꞌitu, amaggotan kaꞌa boꞌ ka niꞌndeꞌan ni komkoman saga aꞌa Pilistin.”
“Ā,” yuk si Samson, “mikijanjiꞌ aku ma kaꞌam, bang paꞌin aku mbal papataybi.”
13 Yuk sambung sigām, “Na ahoꞌ. Hal ka saggaw kami ati niꞌndeꞌan ni komkoman bangsa Pilistin. Mbal ka papatay kami.” Jari niengkotan iya maka duwa lubid bahaꞌu boꞌ binowa patukad min songab batu. 14 Asekot paꞌin iya ni lahat Lehi, sinampang iya eꞌ bangsa Pilistin maka heꞌ sigām angolang. Sakali pahōp Rū Yawe ma si Samson amuwanan iya kosog. Ya lubid ma lꞌngngonna tahinang saliꞌ lanut bay pinasekot ni api, maka ya engkot ma tanganna magtūy apꞌkkalan di-na. 15 Pagubus, aniyaꞌ tapuwaꞌna bokog-langal min kuraꞌ bahaꞌu bay amatay, ati ginuna eꞌna pamonoꞌ saga aꞌa Pilistin dangibu hekana.
16 Jari angabtang si Samson, yukna,
“Tapaggunaku bokog-langal kuraꞌ
ati pabūd patay bantaku.
Tapaggunaku bokog-langal kuraꞌ
ati dangibu hekana bay papatayku.”
17 Aubus paꞌin pangabtangna, tinimanan eꞌna bokog-langal. Jari Ramat Lehia ya pangōn aꞌa ma lugal inān.
18 Na, pagka sidda atohoꞌ kꞌllong si Samson, pajunjung iya ni PANGHŪꞌ-Yawe, yukna, “Aheya daꞌugan bay pamuwannu ma sosohoꞌannu itu. Pasagarannu bahāꞌ aku patay boheꞌ, boꞌ taꞌāꞌ mayatku eꞌ bangsa kapil itu?” 19 Angkan aniyaꞌ boheꞌ pinatubud eꞌ Tuhan min lowang ma tanaꞌ Lehi inān. Makainum paꞌin si Samson, pabalik kosogna maka akuyas na iya. Angkan tuburan boheꞌ inān kaōnan En Hakkoreb. Inaꞌan masi sampay ni kabuwattituhan.
20 Duwampūꞌ tahun ya kapagnakuraꞌ si Samson ma bangsa Israꞌil, ma waktu kapagbayaꞌ saga bangsa Pilistin.