16
Si Samson maka si Delila
1 Dakayuꞌ llaw, pehēꞌ si Samson ni daꞌira Gasa. Aniyaꞌ dꞌnda pinagtambahan taꞌndaꞌna mainaꞌan, jari pahulid iya ni dꞌnda inān pagsangom. 2 Na, kahakaꞌan saga aꞌa Gasa in si Samson inaꞌan ma deyom daꞌira. Angkan sigām bay angalibutan lugal inān ati pajaga sigām ma lawang pagluwasan daꞌira sampay ni karaiꞌ-llawan. Ya yuk sigām, “Papataytam iya pagkꞌllat llaw.”
3 Saguwāꞌ si Samson itu halam bay atuli patꞌggol. Papunduk iya tongaꞌ bahangi boꞌ pehēꞌ ni lawang daꞌira. Binalutan eꞌna tambolna maka lusuk-lusukna maka batang-suladna, boꞌ nilarut eꞌna patighan. Pinatanggung ma bahana, ati binowa ni diyataꞌ būd ya maganggop maka Hebron.
4 Palabay paꞌin daka pilangꞌllaw, pahōp bayaꞌ si Samson ma dakayuꞌ dꞌnda ya patꞌnnaꞌ ma kapantayan Sorek, niōnan si Delila. 5 Pehēꞌ ni si Delila saga pagnakuraꞌan bangsa Pilistin, yuk-i, “Arung, bidjakin si Samson ilu boꞌ tahakana bang mꞌnningga pangāꞌanna kosogna landuꞌ aheya. Jari gaꞌos kami iya boꞌ supaya kaengkotan pahāp maka kapagbayaꞌan kami na. Bang tahinangnu, tinambahan ka dangibu maka dahatus sekela dī pilak eꞌ kami dangan-parangan.”
6 Angkan ahꞌlling si Delila ni si Samson, yukna, “Hakaꞌin konoꞌ aku mꞌnningga pangāꞌannu kosognu landuꞌ aheya ilu. Bang aniyaꞌ saupama bilahi magbabayaꞌan kaꞌa, buwattingga eꞌ sigām anaggaw kaꞌa boꞌ ka kaengkotan?”
7 Anambung si Samson, “Bang aku niengkotan maka pituꞌ engkot kuwit sapiꞌ ya masi abaseꞌ, in kosogku tahinang laꞌa buwat kosog-kosog kaseheꞌan kalꞌllahan.”
8 Jari saga nakuraꞌ bangsa Pilistin inān bay amowahan si Delila pituꞌ engkot kuwit sapiꞌ halam giꞌ bay pinaꞌllawan. Ginuna magtūy eꞌna pangengkotna ma si Samson, 9 saltaꞌ aniyaꞌ saga lꞌlla patapuk ma deyom bilik eꞌ. Nilinganan si Samson eꞌ si Delila, yukna, “O Samson! Itiyaꞌ na saga Pilistin anaggaw kaꞌa!” Sagōꞌ saruꞌun-duꞌun du abꞌkkat eꞌna saga engkot inān, saliꞌ kahantang bannang bay pinasekot ni api. Ya kaluwasanna, halam tataꞌu bang mꞌnningga kosog si Samson.
10 Ma waktu dakayuꞌ ahꞌlling na isab si Delila ni si Samson, yuk-i, “Hal aku parupangnu sabab putingannu aku. Ndūꞌ, hakaꞌin aku konoꞌ bang buwattingga ka kaengkotan.”
11 Anambung si Samson, “Bang aniyaꞌ makaengkotan aku maka lubid bahaꞌu halam bay tapangengkot, in kosogku pinasaliꞌ ni kosog-kosog kaseheꞌan kalꞌllahan.”
12 Angkan angāꞌ lubid bahaꞌu si Delila pangengkotna si Samson. Sakali itu, sabu aniyaꞌ saga aꞌa patapuk ma bilik, angalingan si Delila. “O Samson, itiyaꞌ na saga Pilistin anaggaw kaꞌa!” Sagōꞌ ya du, abꞌkkat eꞌna saga lubid ma lꞌngngonna saliꞌ salban. 13 Jari yuk si Delila ni si Samson, “Sampay buwattinaꞌan, masi aku parupangnu maka pagputingannu. Hakaꞌin aku sabꞌnnal-bꞌnnal bang buwattingga ka kaengkotan?”
Ya sambung si Samson, “Bang taꞌanyamnu pituꞌ sapiran buꞌunku ni kakanaꞌ masi ma papagan panganyaman, maka bang pahogotnu maka sisipit, in kosogku tahinang buwat kosog-kosog lꞌlla kaseheꞌan.” Jari itu, makatuli paꞌin si Samson, niāꞌ eꞌ si Delila pituꞌ sapiran buꞌunna boꞌ nianyam ni kakanaꞌ. 14 Pinahogot isab maka sisipit.
Angalingan pabalik si Delila, “O Samson!” yukna. “Itiyaꞌ na saga Pilistin anaggaw kaꞌa!” Magtūy pabungkal si Samson min pabahakanna ati nihellaꞌ eꞌna sisipit maka papagan panganyaman, sampay kakanaꞌ. 15 Allā, magmahi si Delila ma si Samson, yukna, “Yuknu in aku kalasahannu, saguwāꞌ mbal aku pangandolannu. Mintꞌllu na aku parupangnu, sabab halam aku pataꞌunu bang mꞌnningga ya pangāꞌannu kosognu aheya ilu.” 16 Llaw ni llaw, buwattēꞌ na paꞌin pamogos si Delila sampay mbal na kasabalan eꞌ si Samson.
17 Angkan nihaka eꞌna bang mꞌnningga kosogna. Yukna, “Halam toꞌongan bay kaguntingan buꞌunku, sabab aku itu Nasiri, aꞌa bay tapanukbal ni Tuhan min waktu bay kapaganak ma aku. Bang kaguntingan buꞌunku, tantu pahalam kosogku, ati tahinang laꞌa aku buwat kosog saga kaseheꞌan lꞌlla.”
18 Na, tananam paꞌin eꞌ si Delila in pangahaka si Samson inān bꞌnnal, aniyaꞌ lapal pabeyaꞌna ni pagnakuraꞌan bangsa Pilistin, yuk-i, “Pabalik kam piꞌitu min tꞌdda laꞌa, sabab tapangahakana kamemon ma aku.” Jari pabalik pehēꞌ saga nakuraꞌ Pilistin maka eꞌ sigām amowa pilak buwat bay janjiꞌ sigām. 19 Tapatuli paꞌin si Samson eꞌ si Delila ma paꞌana, aniyaꞌ aꞌa sohoꞌna angangguntingan kapituꞌ sapiran buꞌun si Samson. Pagka buwattēꞌ, yampa tagaga eꞌna si Samson sabab pahalam na kosogna. 20 Jari angolang si Delila, “O Samson, itiyaꞌ na saga Pilistin anaggaw kaꞌa!” Makabatiꞌ paꞌin iya, pagbāꞌna daiꞌ-daiꞌ du iya makakuyas buwat bay tagnaꞌ. Saguwāꞌ halam tataꞌuna in PANGHŪꞌ bay na alaꞌan min iya.
21 Sakali tasaggaw iya eꞌ bangsa Pilistin ati nilugit matana boꞌ iya binowa ni Gasa. Niengkotan iya maka kili-kili tumbaga, ati pinagiling iya tirigu ma deyom kalabusu. 22 Samantalaꞌ mahēꞌ paꞌin iya, inut-inut na patahaꞌ buꞌunna pabalik.
Kawapat si Samson
23 Jari magtimuk na saga pagnakuraꞌan bangsa Pilistin boꞌ angungsud tutukbalan ni tuhan-tuhan sigām si Dagon. Maglami-lami sigām maka eꞌ sigām magsibahat, yuk-i, “Pinaraꞌug kitam eꞌ tuhantam, tinugutan bantatam ni komkomantam.”
24 Pagꞌndaꞌ paꞌin saga aꞌa Gasa inān ma si Samson, magtūy pinudji tuhan-tuhan sigām, yuk-i,
“Pinaraꞌug kitam eꞌ tuhantam,
tinugutan ni gaꞌosantam
ya aꞌa bay amakaꞌat lahattam,
ya bay amapatay saga aꞌatam lipat-manglipat.”
25 Jari itu, hinabu sigām maglami-lami maka maglangohan, angolang sigām, yuk-i, “Paluwasunbi piꞌitu si Samson amalasig kitam.” Jari pinaluwas iya min deyom kalabusu ati nihinang paglasig-lasigan.
Pagubus pinatꞌngge iya ma atag saga hāg lumaꞌ. 26 Pasaltaꞌ, ahꞌlling si Samson ni sosohoꞌan ya anondaꞌ iya, yukna, “Pasekotun lagiꞌ aku ni hāg ya panuku lumaꞌ pagtataꞌatan itu boꞌ aku makasandig.” 27 Na, aragsok asal lumaꞌ inān eꞌ saga aꞌa lꞌlla-dꞌnda maka kamemon saga pagnakuraꞌan bangsa Pilistin. Aniyaꞌ sigām saga tꞌllu ngibu puhuꞌ ma karatagan atop inān angꞌndaꞌ-ngꞌndaꞌ ma kahinangan si Samson.
28 Jari angamuꞌ-ngamuꞌ iya ni PANGHŪꞌ, yukna, “O Yawe, Tuhan Sangat Kawasa, entomun aku. O Tuhan, pabalikun giꞌ kosogku minsan hal mintꞌdda. Bang paꞌin aku makabalos saruꞌun-duꞌun ma saga Pilistin ma bay pangalugit sigām ma duwa mataku.” 29 Magtūy niꞌntanan eꞌ si Samson duwa hāg aꞌaslag ya panuku lumaꞌ pagtataꞌatan ni Dagon inān. Binalutan eꞌna karuwa, tanganna kowan ma dakayuꞌ hāg, maka tanganna gibang isab ma dakayuꞌ. 30 Pagubus, anibahat si Samson, yukna, “Bang paꞌin aku magunung amatay maka saga Pilistin itu!” Magtūy iya amuspusan kosogna boꞌ tinulak duwa hāg inān. Jari alubu lumaꞌ pagtataꞌatan eꞌ. Talapay isāb baꞌanan pagnakuraꞌan Pilistin maka saga aꞌa bay mainaꞌan. Minnēꞌ aheka lagiꞌ tapapatay eꞌ si Samson ma kamatayna min bay tapapatayna ma waktu giꞌ kallumna.
31 Jari palūd pinaꞌan saga danakan si Samson lꞌlla maka saga kakampunganna min mmaꞌ, boꞌ angāꞌ mayatna. Binowa iya amoleꞌ ni lahatna boꞌ kinubul ma bay pangubulan mmaꞌna si Manowa, ya ma llot Sora maka Estaꞌol. Duwampūꞌ tahun ya tꞌggol kapagnakuraꞌ si Samson ma bangsa Israꞌil.