Paglappas i

PAGLAPPAS

Pahati pasal Jūd itu

‘Exodus’ ya ōn jūd itu ma bahasa Ingglis maka Girīk, hatina ‘Paglaꞌan’ sabab sinalsila maitu pasal kalaꞌan bangsa Israꞌil min lahat Misil, ya bay pamanyagaꞌan sigām. ‘Paglappas’ ōnna ma bahasa Sinama sabab aheya paglappas Tuhan ma saga panubuꞌ si Ibrahim ya tapeneꞌna nihinang bangsana sussi.

Aniyaꞌ mpat bahagiꞌ ma jūd itu. Kaissana, pasal kaluwas bangsa Israꞌil (ya panubuꞌ si Ibrahim labay min si Yakub) min komkoman Piraꞌun. Karuwana, pasal kahantiꞌ sigām ma lahat paslangan mpatpūꞌ tahun tꞌggolna. Katꞌlluna, pasal paljanjiꞌan ya pamuwan Tuhan ma bangsana waktu kamainaꞌan sigām ma tapeꞌan būd Turusina. Kaꞌmpatna, pasal pangahinang lumaꞌ pangarapan ni Tuhan maka pamakay imam.

Muna-muna, tasalsila ma jūd itu pasal bay tahinang eꞌ Tuhan ma saga aꞌa sukuꞌna waktu kapangalappasna sigām min kasigpitan boꞌ tahinang bangsana arakayuꞌ. Nabi Musa ya bay magmundaꞌan sigām paluwas min Misil. Tasulat isab ma jūd itu Sangpūꞌ Saraꞌ-Panohoꞌan ya pamuwan Tuhan ma manusiyaꞌ supaya ahāp kahālan maka kajarihan sigām (ma Bāb 20).