PAGLAPPAS
1
JŪD PAGLAPPAS
Palbahagiꞌan Kitab Tawrat
Kabinasahan Bangsa Israꞌil
1 Na, ya na itu saga anak nabi Israꞌil lꞌlla ya bay ameyaꞌ ma iya papinda ni lahat Misil maka anak-hꞌnda sigām. 2 Ōn sigām si Rubin, si Simiyun, si Libi maka si Yuda, 3 si Issakar, si Sibulun maka si Benjamin, 4 si Dān, si Naptali, si Gād maka si Aser. 5 Pitumpūꞌ ya heka saga panubuꞌ si Israꞌil kamemon ma waktu inaꞌan-i, sagōꞌ anakna si Yusup halam bay taitung sabab waꞌi asal ma Misil.
6 Manjari palabay paꞌin patahunan, amatay na disi Yusup magdauranakan sampay anak-mpu sigām. 7 Malaingkan saga tubuꞌ sigām anganak paheka sampay asaplag na ma lahat Misil. Makalanduꞌ na heka sigām.
8 Manjari itu, ma masa damuli giꞌ, aniyaꞌ sultan saddī aningkōꞌ magsultan ma lahat Misil, sultan aꞌawam ma pasal bay kahālan si Yusup. 9 Yuk sultan itu ma saga aꞌana, “Ndaꞌunbi na saga aꞌa Israꞌil ilu, makalanduꞌ toꞌongan heka sigām, mbal na kaꞌatuhantam. 10 Jari in kitam itu subay maggaraꞌ pahāp. Bang pasagaranta sigām paheka, boꞌ aniyaꞌ bantatam gantaꞌ parugpak piꞌitu, piligdu. Pagapiꞌ araiꞌ bangsa Israꞌil itu ma saga bantatam. Magdakayuꞌ sigām amonoꞌ kitam ati makaluwas sigām min lahat Misil itu.”
11 Ya heꞌ sababna angkan aniyaꞌ saga aꞌa Misil bay ginꞌllal amanyagaꞌ ma saga aꞌa Israꞌil. Abuhat makalanduꞌ ya hinang pamahinang eꞌ saga bagꞌllal itu ma saga aꞌa Israꞌil angkan sigām mbal na aholat nilappasan. Aniyaꞌ duwa daꞌira nihinang eꞌ sigām pagtauꞌan baꞌanan anihan tinanom ya sukuꞌ Piraꞌun.a Pitum maka Ramisis ya pagōn saga daꞌira heꞌ. 12 Sagōꞌ minsan buwattingga eꞌ saga aꞌa Misil amanyagaꞌ ma bangsa Israꞌil, luhūy pasōng heka sigām sampay pasaplag na ma kaluhaꞌan lahat. Angkan sigām kinagawahan eꞌ saga bangsa Misil, 13 manjari gom paꞌin pinabuhatan saga hinang ya pamahinang eꞌ saga aꞌa Misil ma bangsa Israꞌil eꞌ. 14 Pinahunitan sidda kahālan sigām, mbal agon kasandalan. Sinōꞌ sigām angahinang saga lumaꞌ tisaꞌb maka sinōꞌ maghinang abuhat ma kahuma-humaꞌan. Jari abꞌngngis saga aꞌa Misil, mbal toꞌongan maꞌaseꞌ.
15 Manjari itu ma dakayuꞌ llaw paꞌin, aniyaꞌ panohoꞌan sultan Misil ma si Sipra maka si Puwa, duwangan panday ya magpaꞌanak ma saga dꞌnda Hibranic. 16 Ya panohoꞌan sultan ma sigām, “Kaꞌam ilu,” yukna, “bang kam amaꞌanak ma saga karꞌndahan Hibrani boꞌ taꞌndaꞌbi lꞌlla ya anakna, papatayhunbi saruꞌun-duꞌun. Bang dꞌnda, pasagarinbi allum.” 17 Sagōꞌ saga panday inān magmatāw asal ma Tuhan angkan halam bineyaꞌ eꞌ sigām bay panohoꞌan sultan eꞌ. Halam pinapatay saga ondeꞌ-ondeꞌ lꞌlla bay nianakan. 18 Na, pagka buwattēꞌ, pinalinganan pabalik saga panday itu eꞌ sultan boꞌ tinilaw eꞌna. “Angay,” yukna, “halam beyaꞌbi panohoꞌanku? Angay pakallumbi saga ondeꞌ-ondeꞌ lꞌlla bay nianakan?”
19 Anambung sigām ma Piraꞌun, yuk-i, “Tuwan sultan, ya bꞌnnalna, in dꞌnda Hibrani kaluhayan sidda bang maganak, nggaꞌi ka buwat saga dꞌnda Misil. Pagtꞌkka panday ni lumaꞌ, inaꞌan na asal ma luwasan ondeꞌ-ondeꞌ.”
20-21 Manjari nihāp duwangan panday inān eꞌ Tuhan ma sabab pagaddat sigām ma iya, ati kabuwanan sigām tubuꞌ. Maka baꞌanan bangsa Israꞌil isab gom paꞌin paheka. 22 Ya katobtobanna aniyaꞌ panohoꞌan Piraꞌun ma saga aꞌana kamemon. Yukna, “Bang aniyaꞌ ondeꞌ-ondeꞌ lꞌlla bahaꞌu nianakan ma bangsa Hibrani, timaninbi ni sapaꞌ Nīl supaya amatay kamemon. Sagōꞌ bang ondeꞌ-ondeꞌ dꞌnda, daꞌa inayunbi.”