2
Kapaganak ma si Musa
1 Na, aniyaꞌ dakayuꞌ lꞌlla bangsa Israꞌil panubuꞌ si Libi makahꞌnda ni pagkahina tubuꞌ si Libi. 2 Manjari, abꞌttong dꞌnda itu sampay anganak lꞌlla. Taꞌndaꞌna paꞌin ya kahāp luwa ondeꞌ-ondeꞌ bay nianakan eꞌna, na, tinapukan eꞌna ma deyom tꞌllumbulan boꞌ mbal tabāk eꞌ aꞌa Misil. 3 Sagōꞌ taꞌabut paꞌin mbal na katapukan, in dꞌnda itu bay angāꞌ ambung nihinang min batang parang. Bay pininta maka kitlan boꞌ mbal angꞌmman, ati pinalege ondeꞌ ma deyomna boꞌ yampa pinagūng ma deyom kaparangan alangkaw ya patomoꞌ ma bihing sapaꞌ Nīl. 4 Inaꞌan asal siyakana dꞌnda anꞌngge min kalawak-lawakan anganjagahan ondeꞌ-ondeꞌ inān bang ai tumꞌkka ni iya.
5 Sakali itu makapinaꞌan dayang-dayang anak Piraꞌun amandi ma sapaꞌ. Inaꞌan isab saga ipang-ipangnaa anusul-nusul min bihing sapaꞌ. Manjari taꞌndaꞌ eꞌ dayang-dayang ambung eꞌ pagūng ma bihing sapaꞌ, ma kaparangan. Pagꞌndaꞌna, magtūy sinohoꞌ eꞌna dakayuꞌ ipang-ipangna palūd pinaꞌan angāꞌ. 6 Taꞌāꞌ paꞌin ambung eꞌ, niukab magtūy eꞌ dayang-dayang ati taꞌndaꞌ eꞌna ondeꞌ-ondeꞌ lꞌlla ma deyomna anangis. Jari sinōd iya aseꞌ ma iya. “Ndūꞌ,” yukna, “anak Hibrani koꞌ itu.”
7 Manjari pinaꞌan dꞌnda-dꞌnda ya siyaka ondeꞌ boꞌ atilaw ma dayang-dayang ya anak sultan eꞌ. “Dayang-dayang,” yukna, “bilahi ka bahāꞌ bang aku amihaꞌan kaꞌa dꞌnda Hibrani amaruruꞌ ondeꞌ-ondeꞌ ilu?”
8 Ya sambung dayang-dayang, “Ahoꞌ, arung. Pehēꞌ ka amiha.” Magtūy iya pehēꞌ angāꞌ inaꞌna. 9 Pagtꞌkka inaꞌ ondeꞌ, yuk dayang-dayang ma iya, “Ā, ondeꞌ-ondeꞌ itu. Bowahun iya amoleꞌ ni lumaꞌbi boꞌ paruruꞌin aku. Tambahanta paꞌin ka angipat iya.” Manjari ondeꞌ-ondeꞌ inān binowa amoleꞌ eꞌ inaꞌna pinaruruꞌ maka niꞌipat pahāp.
10 Na, aheya-heya paꞌin ondeꞌ-ondeꞌ itu, niꞌndeꞌan na eꞌ inaꞌna pehēꞌ ni dayang-dayang ati tahinang saliꞌ anakna luggiyaꞌ. Ya ma pikilan dayang-dayang eꞌ, “Ōnanku iya Musa,b sabab bay iya paluwasku min deyom boheꞌ.”
Si Musa Alahi ni Lahat Midiyan
11 Asangpot paꞌin kasubul si Musa,c pehēꞌ na iya ni atag paghinangan saga pagkahina bangsa Hibrani. Taꞌndaꞌna sigām ma deyom kabinasahan pagka pinahinang abuhat eꞌ bangsa Misil. Aniyaꞌ isab dakayuꞌ aꞌa Misil taꞌndaꞌ eꞌ si Musa angandaplosan dakayuꞌ pagkahina bangsa Hibrani. 12 Na, maglingiꞌ-lingiꞌ si Musa. Pagꞌndaꞌna halam aniyaꞌ aꞌa saddī mainaꞌan, magtūy binonoꞌ eꞌna aꞌa Misil eꞌ boꞌ yampa lꞌbbonganna bangkayna ma deyom gusung.
13 Pagsalung paꞌin, makabalik si Musa ni bay papehēꞌanna. Sakali aniyaꞌ taꞌndaꞌna mainaꞌan duwangan aꞌa Hibrani magbonoꞌ. Yuk si Musa ma aꞌa dangan ya taga-dusa, “Angay laꞌugannu pagkahinu Hibrani?”
14 Ya sambung aꞌa inān ma si Musa, “Ē, sai bay amuwanan kaꞌa kapatut magbayaꞌ maka angahukum ma kami! Papataynu isab aku buwat bay pamapataynu aꞌa Misil eꞌ?”
Magtūy tināw si Musa. Yukna ma deyom atayna, “Tantu tasayu bay hinangku ma aꞌa Misil eꞌ.”
15 Na kahakaꞌan paꞌin Piraꞌun pasal palkalaꞌ itu, anganiyat iya subay pinapatay si Musa. Daipara makalahi si Musa tudju ni lahat Midiyan boꞌ patꞌnnaꞌ mahēꞌ. Ma dakayuꞌ llaw, waꞌi iya aningkōꞌ ma bihing pagboheꞌan. 16 Jari aniyaꞌ atꞌkka pinaꞌan pituꞌ budjang anak si Jetro ya imam ma lahat Midiyan. Ya gawi sigām angāꞌ boheꞌ boꞌ tinumpahan ni paginuman saga kahayopan ya sukuꞌ mmaꞌ sigām. 17 Sagōꞌ saga budjang inān bay nilāng eꞌ saga aꞌa kaseheꞌ, ya magiꞌipat baꞌanan bili-bili sigām. Jari itu, pagka mbal pinasauk saga kabudjangan eꞌ, anꞌngge si Musa angandapitan sigām. Anauk iya boheꞌ isab pamainumna ma saga bili-bili sigām.
18 Manjari itu, pagpoleꞌ saga kabudjangan itu ni si Jetro ya mmaꞌ sigām, tinilaw sigām. Yukna, “Alꞌkkas pahāp kam atꞌkka llaw itu! Angay bahāꞌ?”
19 Ya sambung saga anakna, “Sabab kami bay tinabangan eꞌ dakayuꞌ aꞌa Misil pagka kami nilaꞌat eꞌ saga aꞌa magiꞌipat bili-bili. Lāgi, sinaukan kami boheꞌ eꞌna maka bay pinainum eꞌna saga kambing maka bili-bilitam.”
20 Ya lling mattoꞌa heꞌ, “Maingga na iya? Angay iya pasagaranbi mahēꞌ? Ngāꞌunbi iya pehēꞌ boꞌ magsalu maka kitam.”
21 Na, kasulutan si Musa maglahat mainaꞌan, ati pinapagāꞌ iya eꞌ si Jetro maka anakna si Sippura. 22 Atꞌggol-tꞌggol paꞌin, anganak lꞌlla si Sippura. Gersomd ya pangōn si Musa ma iya, sabab yukna, “Aku itu aꞌa liyu ma nggaꞌi ka lahatku.”
23 Palabay paꞌin daka pilantahun, amatay na sultan Misil eꞌ. Malaingkan bangsa Israꞌil masi du magaruhuy ma sabab pamanyagaꞌ bangsa Misil ma sigām. Angandahing na paꞌin sigām ni Tuhan bang paꞌin sigām tinabangan. 24 Jari takale eꞌ Tuhan pangandahing sigām. Nientom eꞌna bay paljanjiꞌanna ma disi Ibrahim, si Isaꞌak maka si Yakub, ya pagꞌmboꞌan sigām. 25 Taꞌndaꞌ isab eꞌ Tuhan kabinasahan sigām ati kinaꞌaseꞌan sigām eꞌna.