PANAGNAꞌAN
Pahati pasal Jūd itu
In Jūd Panagnaꞌan itu palbahagiꞌan Kitab Tawrat, ‘Genesis’ ōnna ma bahasa Ingglis. Tasalsila ma jūd itu pasal kapamapanjari dunya maka langit maka bangsa manusiyaꞌ. Tasalsila isab maitu pasal panagnaꞌan dusa maka baꞌanan kasusahan ya kalabayan manusiyaꞌ ma babaw dunya itu. Pinahati isab kita pasal kajarihan Tuhan maka bowahanna bang takdil ni manusiyaꞌ.
Itiyaꞌ maitu saga salsila pasal si Mboꞌ Adam maka Sitti Hawa, si Kabil maka si Habil, nabi Nū maka Latap Aheya, Lumaꞌ Alanga ma lahat Babilon. Itiyaꞌ isab sugsugan ma baꞌanan palbangsa-bangsahan ya patubuꞌ min nabi Ibrahim, buwat bangsa Arab, bangsa Kanaꞌan maka bangsa Israꞌil. Abantug nabi Ibrahim itu ma sabab pangandolna maka pameyaꞌna ma Tuhan. Pasunuꞌ, aniyaꞌ salsila pasal anak-mpu si Ibrahim, tinagnaꞌan min nabi Isaꞌak, boꞌ nabi Yakub ya anak si Isaꞌak, boꞌ anak si Yakub lꞌlla kasangpūꞌ maka duwa. Anakna si Yusup ya landuꞌ abantug ma jūd itu ma sabab katꞌnnaꞌna ma lahat Misil. Ma katapusanna, palain si Yakub magtaliꞌanak boꞌ maglahat mainaꞌan.
Aheka bissala pasal manusiyaꞌ ma Jūd Panagnaꞌan itu, saguwāꞌ Tuhan maka kahinanganna ya pinagmuna-muna. Tataꞌuta min jūd itu pasal Tuhan ya tag-kapatut angahukum maka aminasa ma manusiyaꞌ, maka iya ya magkaꞌinagon ma sasuku angandol ma iya.