PANAGNAꞌAN
1
JŪD PANAGNAꞌAN
Palbahagiꞌan Kitab Tawrat
Tagnaꞌan Dunya itu
1 Ma tagnaꞌanna toꞌongan, Tuhan ya bay amapanjari dunya maka langit. 2 Na, ma waktu kapamapanjari, in dunya halam giꞌ aniyaꞌ pangluwahanna maka halam giꞌ aniyaꞌ ai-aina. Aheya kalꞌddoman ma sakalibutna maka alimun eꞌ boheꞌ tegob-tegoban. Inaꞌan isab Rūa Tuhan magpehēꞌ-piꞌitu min diyataꞌ boheꞌ inān.
3 Na angallam Tuhan, yukna, “Subay aniyaꞌ sawa.” Magtūy paniyaꞌ sawa. 4 Pagꞌndaꞌ Tuhan ma sawa inān, kasulutan iya. Puwas eꞌ pinasaddī eꞌna sawa maka lꞌddom. 5 Ya pangōnna ma sawa ‘llaw’, ati ya pangōnna ma lꞌddom ‘sangom’. Puwas paꞌin sangom boꞌ llaw na, ya na tagnaꞌan llaw.
6-7 Puwas eꞌ angallam Tuhan pabīng, yukna, “Subay aniyaꞌ pagtongaꞌan ma llot boheꞌ min deyoꞌ maka boheꞌ min diyataꞌ.” Magtūy paniyaꞌ. 8 Na, ya pangōn Tuhan ma pagtongaꞌan eꞌ ‘langit’. Puwas paꞌin sangom boꞌ llaw, llaw karuwana na.
9 Angallam na isab Tuhan, yukna, “Ya boheꞌ ma deyoꞌan langit subay pinagtimuk ma dakayuꞌ patꞌnnaꞌan supaya aniyaꞌ tanaꞌ atohoꞌ.” Magtūy paniyaꞌ. 10 ‘Tanaꞌ’ ya pangōn Tuhan ma gintanaꞌan, ati ‘tahik’ ya pangōnna ma boheꞌ pinagtimuk eꞌ. Pagꞌndaꞌ Tuhan ma hinangna inān, kasulutan iya.
11 Manjari itu, angallam na Tuhan, yukna, “Subay patomoꞌ ai-ai ma tanaꞌ itu, kaginisan tinanom magbibinhiꞌb maka kaginisan kayu magbubuwaꞌ, ya taga-binhiꞌ isab.” Magtūy aniyaꞌ paltomoꞌ-tomoꞌan indaginis ma gintanaꞌan, 12 saga tinanom magbibinhiꞌ maka saga kakayuhan magbubuwaꞌ ma ginis-ginisanna. Pagꞌndaꞌ Tuhan, kasulutan iya. 13 Puwas paꞌin sangom boꞌ llaw, llaw katꞌlluna na.
14 Angallam isab Tuhan, yukna, “Subay aniyaꞌ saga sawa ma diyataꞌ langit pamasaddī llaw min sangom, manjari aniyaꞌ pamandogahan llaw maka tahun maka musimc. 15 Saga sawa heꞌ subay asinag ma diyataꞌ langit supaya amasawa dunya.” Magtūy paniyaꞌ sawa. 16 Aniyaꞌ tahinang eꞌ Tuhan duwa sawa aꞌaslag, ya na mata llaw maka bulan. Mata llaw ya akosog amuwan sawa ma waktu llaw, boꞌ bulan ya amuwan sawa ma waktu sangom. Tapaniyaꞌna isab saga bituꞌun. 17 Manjari saga sawa itu pinatꞌnnaꞌ eꞌ Tuhan ma diyataꞌ langit supaya pamasawa dunya 18 ma waktu llaw maka ma waktu sangom, boꞌ aniyaꞌ pagbiddaꞌan sawa maka lꞌddom. Na, pagꞌndaꞌ Tuhan ma bay hinangna itu, kasulutan iya. 19 Puwas paꞌin sangom boꞌ llaw, llaw kaꞌmpatna na.
20 Angallam isab Tuhan, yukna, “Ya tahik maka boheꞌ subay apꞌnnoꞌ eꞌ ginisan sattuwa anahut-aꞌaslag. Subay isab aheka ginisan manuk-manuk magleyangan ma tongaꞌan ayan.” 21 Manjari itu pinapanjari eꞌ Tuhan saga sattuwa aheya ya maglahat ma tahik, maka ai-ai maglangihan atawa maglelehan ma tahik maka ma boheꞌ. Pinapanjari isab eꞌna kamemon ginisan manuk-manuk magleyangan. Na, pagꞌndaꞌ Tuhan, kasulutan iya. 22 Manjari itu binarakatan eꞌ Tuhan bay pinapanjari eꞌna inān kamemon. Yukna ma ai-ai ma tahik, “Bang paꞌin kam paheka supaya apꞌnnoꞌ eꞌbi tahik ilu.” Yukna isab ma saga manuk-manuk, “Bang paꞌin kam paheka.” 23 Puwas paꞌin sangom boꞌ llaw, llaw kalimana na.
24 Angallam Tuhan, yukna, “Subay aniyaꞌ baꞌanan kaginisan ma deya, saga hayop niꞌipat maka saga sattuwa talun, maka ai-ai isab maglelehan ma tanaꞌ.” Magtūy paniyaꞌ na. 25 Hatina tahinang eꞌ Tuhan saga kasattuwahan talun maka kahayopan maka baꞌanan ai-ai ya maglelehan ma tanaꞌ. Pagꞌndaꞌ Tuhan ma bay tahinangna, kasulutan iya.
26 Manjari angallam isab Tuhan, yukna, “Papanjarita manusiyaꞌ pinasaliꞌ ni kita. Sigām ya pinapagbayaꞌ ma ai-ai kamemon ma kaluhaꞌan dunya itu, ma saga daing, ma saga ai-ai magleyangan, ma saga hayop maka sattuwa, maka ma sasuku isab maglelehan ma tanaꞌ.”
27 Manjari pinapanjari manusiyaꞌ eꞌ Tuhan ma buwat kajarihanna.
Pinasꞌppu sigām ni iya,
nihinang sigām lꞌlla maka dꞌnda.
28 Binarakatan sigām eꞌ Tuhan. Yukna ma sigām, “Anganak kam paheka boꞌ pasaplag panubuꞌbi ma kaluhaꞌan dunya ilu. Jari kaꞌam ya subay magbayaꞌ ma dunya. Pagbayaꞌinbi saga daing maka saga manuk-manuk, sampay ai-ai kamemon ya taga-napas ma kareya-reyahan.”
29 Angallam lagiꞌ Tuhan, yukna, “Na, buwananta kam takakanbi saga tinanom magbibinhiꞌ maka saga kayu magbubuwaꞌ, ya taga-binhiꞌ isab. 30 Pamuwanku isab kaparangan maka dahun kayu takakan eꞌ saga sattuwa talun maka saga manuk-manuk sampay sasuku maglelehan ma tanaꞌ.” Magtūy tahinang buwat bay panohoꞌan Tuhan eꞌ. 31 Manjari pagꞌndaꞌ Tuhan ma kamemon bay pinapanjari eꞌna, kasulutan toꞌongan iya. Puwas paꞌin sangom boꞌ llaw, llaw kaꞌnnomna na.