2
1 Buwattēꞌ bay pamapanjari dunya maka langit maka kamemon ai-aina.
2 Taꞌabut llaw kapituꞌna, aubus na Tuhan ma kamemon hinangna ati pahali na iya. 3 Binarakatan eꞌ Tuhan llaw kapituꞌ heꞌ, minulliya eꞌna, sabab ya heꞌ llaw bay kahalina min hinangna amapanjari ma kamemon ai-ai.
Si Mboꞌ Adam maka si Sitti Hawa
4 Na, buwattēꞌ ya pamapanjari langit maka dunya.
Tagnaꞌ bay kapamapanjari PANGHŪꞌ Tuhana ma langit maka dunya, 5 halam giꞌ aniyaꞌ tinanom patomoꞌ, halam giꞌ aniyaꞌ pasahaꞌ, sabab halam giꞌ aniyaꞌ ulan bay pinabeyaꞌ eꞌ PANGHŪꞌ Tuhan ni dunya. Halam giꞌ aniyaꞌ manusiyaꞌ isab angisbat ma tanaꞌ pagtanoman, 6 sagōꞌ abaseꞌ tanaꞌ eꞌ boheꞌ ya patubud min deyoꞌ.
7 Manjari itu aniyaꞌ tanaꞌ niāꞌ eꞌ PANGHŪꞌ Tuhan, kinompol eꞌna nihinang baran aꞌa. Ninapasan eꞌna napas kallum ni ūng aꞌa inān ati tahinang iya manusiyaꞌ taga-napas na.
8 Na aniyaꞌ kabbun bay pinatomoꞌ eꞌ PANGHŪꞌ Tuhan ma lahat Eden, tampal ni sobangan. Manjari in manusiyaꞌ bay hinangna inān tapatꞌnnaꞌ eꞌna mainaꞌan ma kabbun. 9 Aniyaꞌ isab pinatomoꞌ eꞌ Tuhan ma kabbun inān kamemon ginisan kayu ya ahāp niꞌndaꞌ maka ahāp kinakan buwaꞌna. Inaꞌan isab ma tꞌngngaꞌ kabbun dampoꞌon kayu ya makabuwan kallum, maka inaꞌan isab dampoꞌon kayu makabuwan pangitaꞌu pasal kahāpan maka kalaꞌatan.
10 Aniyaꞌ sapaꞌ anasahan min lahat Eden amoheꞌan kakayuhan ma kabbun. Paluwas paꞌin min Eden, in sapaꞌ inān magsanga mpat. 11 Dakayuꞌ sangana inān, ya na sapaꞌ Peson, anasahan pehēꞌ tudju ni kaluhaꞌan lahat Habila. Aniyaꞌ dī bulawan ma lahat inaꞌan-i 12 maka aniyaꞌ du isab mainaꞌan saga palmata maka bulitik kayu pahamut. 13 Ya sanga karuwana, ya na sapaꞌ Gehon, anasahan pehēꞌ ni kaluhaꞌan lahat Kūs. 14 Sanga katꞌlluna, ya na sapaꞌ Tigris, anasahan pehēꞌ tudju ni lahat Assiriya min bihingna tampal ni sobangan. Maka sanga kaꞌmpatna inān, ya na sapaꞌ Alpurati.
15 Sakali in manusiyaꞌ binowa eꞌ PANGHŪꞌ Tuhan boꞌ pinatꞌnnaꞌ ma lahat Eden. Sinōꞌ iya maghuma maka angisbat kabbunna. 16 Magpanohoꞌan PANGHŪꞌ Tuhan ma iya, yukna, “Makajari ka amangan buwaꞌ kayu ai-ai kabayaꞌannu mailu. 17 Ya sadja mbal takakannu buwaꞌ kayu ya makabuwan pangitaꞌu pasal kahāpan maka kalaꞌatan. Ebot-ebot toꞌongan, daꞌa ka amangan. Ya llaw kapamangannu, ya na llaw kamataynu.”
18 Manjari ahꞌlling PANGHŪꞌ Tuhan, yukna, “Mbal ahāp bang lꞌlla itu karangan-danganan. Hinanganku iya limbang makatōp ma iya boꞌ aniyaꞌ seheꞌna makatabang.” 19 Jari binowa eꞌ PANGHŪꞌ Tuhan kamemon saga hayop maka sattuwa maka kamemon saga manuk-manuk ya bay hinangna min tanaꞌ. Binowa eꞌna pehēꞌ ni lꞌlla inān supaya kinataꞌuwan bang ai pangōnna ma baꞌanan sattuwa, hayop maka manuk-manuk eꞌ. Manjari ai-ai pangōnna ma sasuku taga-napas inān, ya na heꞌ ōnna. 20 Sakali kaōnan eꞌ lꞌlla inān kamemon saga sattuwa maka hayop maka saga manuk-manuk, malaingkan halam aniyaꞌ minsan dakayuꞌ makatōp ma iya.
21 Angkan pinatuli aꞌa itu eꞌ PANGHŪꞌ Tuhan. Ahaluk paꞌin tulina, niāꞌ eꞌ Tuhan dakayuꞌ gusukna, ati tinaplok pabīng maka isi ya bay pangāꞌan gusuk. 22 Jari aniyaꞌ dꞌnda nihinang eꞌ PANGHŪꞌ Tuhan min gusuk lꞌlla, ati binowa eꞌna pehēꞌ ni lꞌlla.
23 Angabtang magtūy lꞌlla, yukna,
“Ndūꞌ, itiyaꞌ na saliꞌku.
Bokogb sin bokogku,
isi sin isiku.
Ōnanku iya ‘dꞌnda’
sabab bay iya ningāꞌ min lꞌlla.”c
24 Ya ilu sababanna angkan lꞌlla pabutas min okoman inaꞌ-mmaꞌna boꞌ parakayuꞌ ni hꞌndana. Manjari tahinang sigām dabaran.
25 Na, in lꞌlla maka dꞌnda itu anantang saliꞌ-saliꞌ, sagōꞌ halam sigām aiyaꞌ.