3
Tagnaꞌ Manusiyaꞌ Magdusa ni Tuhan
1 Na, ma kamemon sattuwa bay pinapanjari eꞌ PANGHŪꞌ Tuhan, sowa ya atahaꞌ akkalna. Manjari atilaw sowa inān ma dꞌnda, yukna, “Bꞌnnal bahāꞌ? Bay kam nilāng eꞌ Tuhan, sinōꞌ daꞌa amangan buwaꞌ kayu ai-ai ma kabbun ilu?”
2 Ya sambung dꞌnda, “Makajari kami amangan min saga buwaꞌ kayu ma kabbun itu, 3 sagōꞌ aniyaꞌ pangalāngan kami eꞌ Tuhan. Sinōꞌ kami daꞌa amangan buwaꞌ kayu ya ma tꞌngngaꞌ kabbun itu. Minsan hal niꞌntanan buwaꞌ inān, na amatay kami.”
4 Yuk sowa, “Ā! Mbal du kam amatay. 5 Angkan buwattēꞌ pamissala Tuhan, sabab kataꞌuwanna asal bang kam gantaꞌ makakakan, makataꞌu kam kahāpan maka kalaꞌatan, hatina tahinang kam saliꞌ Tuhan.”
6 Sakali itu, pagꞌndaꞌ dꞌnda ni buwaꞌ kayu-i, kalingkatan iya. Buwaꞌna inān ahāp kinakan, ahāp isab pangāꞌan pangitaꞌu. Jari angꞌttuꞌ iya buwaꞌ min kayu inān boꞌ kinakan eꞌna. Binuwanan isab eꞌna hꞌllana, ati kinakan eꞌna. 7 Aubus paꞌin sigām amangan, magtūy aniyaꞌ panayu sigām in sigām anantang saliꞌ-saliꞌ. Manjari angāꞌ sigām dahun kayu igiraa tinuhug-tuhug eꞌ sigām nihinang panambun.
8 Na, akohap-kohap paꞌin lahat, takale eꞌ sigām bahonos PANGHŪꞌ Tuhan palꞌngngan min deyom kakabbunan eꞌ. Magtūy sigām patapuk karuwangan ma deyom kakayu-kayuhan supaya mbal taꞌndaꞌ eꞌ Tuhan. 9 Sagōꞌ angalingan PANGHŪꞌ Tuhan ma lꞌlla, yukna, “Maingga na ka?”
10 Ya sambung lꞌlla, “Takaleku bahonosnu mailu ma kabbun ati tināw aku ma sabab anantang aku. Angkan aku patapuk.”
11 Atilaw Tuhan, yukna, “Sai bay amataꞌu kaꞌa ya kaꞌa ilu anantang? Bay ka makakakan bahāꞌ min buwaꞌ kayu, ya bay pangalānganku ma kaꞌa?”
12 Yuk sambung lꞌlla, “Oꞌo, ya dꞌnda bay pamalimbangnu aku, iya ya bay amuwanan aku, angkan aku bay makakakan.”
13 Tinilaw dꞌnda isab eꞌ PANGHŪꞌ Tuhan, yukna, “Angay ka makahinang buwattilu?”
Ya sambung dꞌnda, “Oꞌo, ya sowa eꞌ. Pinarupang aku eꞌna, ya angkan aku makakakan.”
14 Manjari amissala PANGHŪꞌ Tuhan ma sowa heꞌ, yukna,
“Pagka tahinangnu inaꞌan-i, kaꞌa ya taluwaꞌ mulkaꞌ
labi lagiꞌ min kamemon sattuwa maka hayop.
Satꞌggolnu allum
palele du ka maka bꞌttongnu,
bagunbun isab ya pagkakannu.
15 Pagbantata ka maka dꞌnda itu.
Panubuꞌnu maka panubuꞌna
magbanta du saumul-umul.
Kōknu ya giniꞌikan eꞌ panubuꞌna,
maka buliꞌ tapeꞌna ya tanghabnu.”
16 Amissala isab Tuhan ma dꞌnda, yukna,
“Na, buwattitu panganggantaꞌku ma kaꞌa,
ganapanku toꞌongan kasusahannu bang ka abꞌttong,
kapꞌddiꞌan toꞌongan ka bang ka anganak.
Daipara minsan buwattēꞌ,
hꞌllanu ya kabilahiannu na paꞌin,
maka iya ya makapagbayaꞌ ma kaꞌa.”
17 Ya pamissala Tuhan ma lꞌlla, “Kaꞌa isab, ma sabab kapameyaꞌnu ma lling hꞌndanu, ati kakannu buwaꞌ kayu ya bay pangalānganku kaꞌa,
Na, sapdahanku tanaꞌ ma sababannu.
Subay ka kahunitan toꞌongan amiha kalluman min tanaꞌ
satꞌggolnu allum.
18-19 Patomoꞌ kasagmotan indaginis ma tanaꞌnu,
kasagmotan aheka itingna.
Jari maghulas-sangsāꞌ du ka
supaya aniyaꞌ takakannu
sampay ni llaw pamoleꞌnu ni deyom tanaꞌ.
Tanaꞌ asal bay pamapanjarihan kaꞌa,
maka tanaꞌ ya pamoleꞌannu.”
20 Manjari ya pangōn si Adamb ma hꞌndana ‘Hawa’c.
21 Na, aniyaꞌ kuwit hayop nihinang sꞌmmek eꞌ PANGHŪꞌ Tuhan panambun baran si Adam maka hꞌndana.
22 Manjari angallam PANGHŪꞌ Tuhan, yukna, “In manusiyaꞌ itu saliꞌ kita na, pagka makataꞌu na ahāp-alaꞌat. Mbal iya makajari amaꞌabut tanganna angꞌttuꞌ buwaꞌ kayu ya makabuwan kallum. Mbal iya subay pinarūl allum salama-lama.” 23 Angkan na disi Adam pinaluwas eꞌ PANGHŪꞌ Tuhan min kabbun Eden. Sinōꞌ iya maghuma ma tanaꞌ bay pangahinangan iya. 24 Tapaluwas paꞌin, aniyaꞌ malaꞌikat taga-pikpik pinatꞌnnaꞌ eꞌ Tuhan ma bihing kabbun Eden inān tampal ni sobangan. Aniyaꞌ isab pinatꞌnnaꞌ mainaꞌan dakayuꞌ kalis magsuleyab keyatna. Maglabad sadja, supaya halam aniyaꞌ palabayan tudju ni poꞌon kayu ya makabuwan kallum salama-lama.