4
Si Kabil maka si Habil
1 Na, maghulid na si Adam maka hꞌndana si Hawa, jari abꞌttong iya ati anganak lꞌlla, ōnna si Kabil.a Ya lling si Hawa, “Min tabang-tulung PANGHŪꞌ-Yawe kabuwanan aku anak lꞌlla.” 2 Puwas eꞌ abꞌttong si Hawa pabīng ati anganak isab lꞌlla, ōnna si Habil.b Na, asangpot paꞌin sigām, si Habil tahinang aꞌa magiꞌipat bili-bili, boꞌ si Kabil ya tahinang aꞌa maghuhuma. 3 Na, taꞌabut paꞌin ajatu tanoman si Kabil, aniyaꞌ saga buwaꞌ binowa eꞌna panukbalna ni PANGHŪꞌ.c 4 Ya tinukbal eꞌ si Habil dakayuꞌ bili-bili ya bay dahū nianakan ma baꞌanan bili-bilina. Sinumbaliꞌ eꞌna boꞌ yampa tukbalanna ni PANGHŪꞌ isina ya ahāp toꞌongan. Na, kasulutan PANGHŪꞌ ma hinang si Habil buwattēꞌ ati tinaimaꞌ tutukbalanna. 5 Malaingkan si Kabil maka saga buwaꞌ ya tutukbalanna halam tinaimaꞌ eꞌ Tuhan. Jari akagit magtūy atay si Kabil, alaꞌat isab sꞌmmuna. 6 Manjari ahꞌlling PANGHŪꞌ ma si Kabil, yukna, “Otōꞌ, angay akagit ataynu? Angay angkan alaꞌat sꞌmmunu? 7 Bang taluwaꞌ hinangnu tantu du aku kasulutan ma kaꞌa. Damikiyanna bang mbal taluwaꞌ, na, ilu mailu dusa angagad anasat ma kaꞌa. Ya kabayaꞌanna subay angꞌntanan kaꞌa, sagōꞌ subay atuhannu.”
8 Manjari itu ahꞌlling si Kabil ma siyalina si Habil, yukna, “Otōꞌ, sūng kita pehēꞌ ni huma.” Ma huma paꞌin, binonoꞌ si Habil eꞌ si Kabil pinapatay.
9 Atilaw PANGHŪꞌ ma si Kabil, yukna, “Maingga siyalinu?”
Ya sambung si Kabil, “Sittaꞌa. Angay? Hinangku bahāꞌ anganjagahan danakanku?”
10 Manjari ahꞌlling PANGHŪꞌ, yukna, “Angay angkan tahinangnu ilu-i! Sumbang koꞌ ilu! Oꞌō, ilu lahaꞌ siyalinu sapantun aꞌa mikibalos ma aku min deyom tanaꞌ. 11 Na, taluwaꞌ sapda du ka. Mbal na ka makabāk kalluman min tanaꞌ ilu sabab kasobsoban na eꞌ lahaꞌ siyalinu. 12 Minsan buwattingga pagtuyuꞌnu maghinang ma tanaꞌ, mbal ajatu tinanomnu. Maglunsulan sadja ka piꞌingga-piꞌingga ma dunya itu, sagōꞌ mbal ka makabāk lahat patꞌttogannu.”
13 Ahꞌlling si Kabil ma PANGHŪꞌ, “Arōy! Abuhat makalanduꞌ ya paniksaꞌnu ma aku! 14 Itiyaꞌ aku palaꞌannu min tanaꞌ bay paghumaꞌanku, maka palawaknu aku min matahannu. Halam du aniyaꞌ lahat patꞌttoganku ma dunya itu, tahinang aku aꞌa magsampig-manampig sadja. Bang aku gantaꞌ talanggal eꞌ sai-sai, binonoꞌ du aku pinapatay.”
15 Sagōꞌ ya sambung PANGHŪꞌ ma iya, “Mbal du. Bang aniyaꞌ amonoꞌ kaꞌa subay iya binalosan min pituꞌ.” Magtūy aniyaꞌ gindan pinatꞌnnaꞌ eꞌ PANGHŪꞌ ma si Kabil supaya iya takilā eꞌ sai-sai makalanggal ma iya. Hatina mbal iya makajari binonoꞌ. 16 Manjari itu alaꞌan na si Kabil min alopan PANGHŪꞌ pehēꞌ ni lahat Nōdd ma dambilaꞌ Eden tampal ni sobangan, ati mahēꞌ iya patꞌnnaꞌ.
Saga Panubuꞌ si Kabil
17 Na, magdakayuꞌ si Kabil maka hꞌndana ati angiram iya. Makaꞌanak iya lꞌlla ōnna si Idris. Manjari si Kabil ya bay makahinang kauman, niōnan eꞌna Idris buwat ōn anakna heꞌ. 18 Si Idris itu taga-anak lꞌlla, ōnna si Irad ya mmaꞌ si Mihujaꞌil. Si Mihujaꞌil taga-anak isab lꞌlla, ōnna si Mitusail ya mmaꞌ si Lamek. 19 Si Lamek itu duwa hꞌndana, si Ada maka si Silla. 20 Manjari anganak si Ada lꞌlla, ōnna si Jabal. Si Jabal itu panagnaꞌan saga manusiyaꞌ magiꞌipat hayop maka maglumaꞌ tolda ma masa awal eꞌ. 21 Aniyaꞌ isab siyali si Jabal ōnna si Jubal. Si Jubal ya panagnaꞌan manusiyaꞌ apanday magsuling maka maggitara.e 22 Na, si Silla isab anganak lꞌlla, ōnna si Tubal-Kabil. Apanday iya magsasal tumbaga maka basiꞌ nihinang kapanyapan kaginisan. Aniyaꞌ isab siyali si Tubal-Kabil dꞌnda, ōnna si Naꞌama.
23 Manjari amissala si Lamek ma saga hꞌndana, yukna,
“O Ada, O Silla, kaꞌam hꞌndaku, kalehunbi kabtanganku.
Bay aku makapatay subul
ma sabab kapangalagutna ma aku.
24 Na, bang bineyaꞌ bissala Tuhan ma si Kabil
in iya subay binalosan min pituꞌ,
ya lagiꞌna bang aniyaꞌ amonoꞌ aku,
aꞌa inān subay binalosan min pitumpūꞌ maka pituꞌ.”
Si Sēt maka anakna si Enos
25 Jari maghulid isab si Adam maka hꞌndana, ati kabuwanan na isab sigā anak lꞌlla. Yuk si Hawa, “Itiyaꞌ aku pinasukuꞌan anak lꞌlla eꞌ Tuhan, panganggantiꞌ ma si Habil ya bay binonoꞌ eꞌ si Kabil.” Sakali niōnan eꞌna Sēt.f 26 Na, si Sēt taga-anak lꞌlla ōnna si Enos. Masa si Enos eꞌ, ya na masa panagnaꞌan manusiyaꞌ anabbut ōn Yaweg pagtuhanan sigām.