5
Kapanubuꞌan si Mboꞌ Adam
1 Ya na itu salsila panugsugan si Adam. Ma waktu pamapanjari Tuhan ma manusiyaꞌ bay sigām pinaꞌanggil ma iya. 2 Pinapanjari sigām eꞌna dꞌnda maka lꞌlla. Binarakatan sigām eꞌna ati manusiyaꞌ ya pangōnna ma sigām. 3 Na, pagabut dahatus maka tꞌllumpūꞌ tahun umul si Adam, aniyaꞌ anakna lꞌlla anꞌppu iya, ōnna si Sēt. 4 Aubus paꞌin min bay panganak ma si Sēt, aniyaꞌ giꞌ waluꞌ hatus tahun umul si Adam, maka aniyaꞌ giꞌ anakna dꞌnda-lꞌlla. 5 Manjari pagabut siyam hatus maka tꞌllumpūꞌ tahun umul si Adam, awapata na iya.
6 Na si Sēt isab, dahatus paꞌin maka limantahun umulna, aniyaꞌ anakna lꞌlla, ōnna si Enos. 7 Aubus paꞌin min bay panganak ma si Enos eꞌ, aniyaꞌ giꞌ waluꞌ hatus maka pituntahun umul si Sēt, maka aniyaꞌ giꞌ anakna dꞌnda-lꞌlla. 8 Jari pagabut siyam hatus maka sangpūꞌ maka duwantahun umul si Sēt, amatay na iya.
9 Na, si Enos isab, pagabut siyampūꞌ tahun umulna, taga-anak iya lꞌlla, ōnna si Kenan. 10 Aubus paꞌin min bay panganak ma si Kenan, aniyaꞌ giꞌ waluꞌ hatus maka sangpūꞌ maka limantahun umul si Enos, maka aniyaꞌ lagiꞌ anakna dꞌnda-lꞌlla. 11 Na, pagabut siyam hatus maka limantahun umul si Enos, amatay na iya.
12 Si Kenan isab, pagabut umulna pitumpūꞌ tahun, aniyaꞌ anakna lꞌlla, ōnna si Mahalalel. 13 Aubus paꞌin min bay panganak ma si Mahalalel, aniyaꞌ giꞌ waluꞌ hatus maka mpatpūꞌ tahun umul si Kenan, maka aniyaꞌ lagiꞌ anakna dꞌnda-lꞌlla. 14 Jari pagabut siyam hatus maka sangpūꞌ tahun umul si Kenan, amatay na iya.
15 Si Mahalalel isab, pagabut nnompūꞌ maka limantahun umulna, taga-anak iya lꞌlla, ōnna si Jared. 16 Aubus paꞌin min bay panganak ma si Jared eꞌ, aniyaꞌ giꞌ waluꞌ hatus maka tꞌllumpūꞌ tahun umul si Mahalalel, maka aniyaꞌ lagiꞌ anakna dꞌnda-lꞌlla. 17 Jarina, pagabut waluꞌ hatus maka siyampūꞌ maka limantahun umul si Mahalalel, amatay na iya.
18 Na, si Jared isab, pagabut dahatus maka nnompūꞌ maka duwantahun umulna, aniyaꞌ anakna lꞌlla, ōnna si Idris. 19 Manjari aubus paꞌin min bay panganak ma si Idris, aniyaꞌ giꞌ waluꞌ hatus tahun umul si Jared, maka aniyaꞌ lagiꞌ anakna dꞌnda-lꞌlla. 20 Manjari pagabut siyam hatus maka nnompūꞌ maka duwantahun umul si Jared, amatay na iya.
21 Si Idris isab, pagabut umulna nnompūꞌ maka limantahun, taga-anak iya lꞌlla, ōnna si Mitusala. 22-24 Puwas eꞌ, ma deyom tꞌllu hatus tahun, magdaꞌatay si Idris maka Tuhan. Aniyaꞌ giꞌ isab saga anakna dꞌnda-lꞌlla. Sakali itu, taꞌabut paꞌin tꞌllu hatus maka nnompūꞌ maka limantahun umulna, palanyap sadja iya pagka niāꞌ eꞌ Tuhan.
25 Na si Mitusala isab, pagabut umulna dahatus maka walumpūꞌ maka pituntahun, taga-anak iya lꞌlla, ōnna si Lamek. 26 Aubus paꞌin min bay panganak ma si Lamek, aniyaꞌ giꞌ pituꞌ hatus maka walumpūꞌ maka duwantahun umul si Mitusala, maka taga-anak lagiꞌ iya dꞌnda-lꞌlla. 27 Jari taꞌabut paꞌin siyam hatus maka nnompūꞌ maka siyam tahun umul si Mitusala, amatay na iya.
28 Si Lamek isab, pagabut umulna dahatus maka walumpūꞌ maka duwantahun, taga-anak iya lꞌlla. 29 Ya pangōnna ma iya Nū ati aniyaꞌ pagkallam si Lamek ma pasalna. “Ondeꞌ itu,” yukna, “amowa kahāpan du luwas min tanaꞌ ya bay sinapdahan eꞌ PANGHŪꞌ,b jari kabuwanan kitam pahalian min hulas-sangsāꞌtam.” 30 Aubus paꞌin min bay panganak ma si Nū, aniyaꞌ giꞌ lima hatus maka siyampūꞌ maka limantahun umul si Lamek, maka aniyaꞌ giꞌ anakna dꞌnda-lꞌlla. 31 Manjari pagabut pituꞌ hatus maka pitumpūꞌ maka pituntahun umul si Lamek, amatay na iya.
32 Na, in si Nū itu, aniyaꞌ na lima hatus tahun umulna boꞌ yampa iya taga-anak. Manjari tꞌllu anakna lꞌlla, ya na si Sēm, si Hām maka si Japet.