6
Nilatapan Katibuꞌukan Dunya
1 Manjari itu, saltaꞌ angaheka na bangsa manusiyaꞌ ma deyom dunya, aniyaꞌ isab anak sigām budjang. 2 Taꞌndaꞌ paꞌin saga budjang itu eꞌ kalꞌllahan ya nggaꞌi ka aꞌa dunya, na, kalingkatan sigām. Jari sasuku budjang kinabayaꞌan eꞌ saga lꞌlla inān, ningāꞌ hꞌnda eꞌ sigām.a 3 Manjari angallam PANGHŪꞌ-Yawe, yukna, “Mbal na pataptap Rū-ku ma saga manusiyaꞌ itu, subay sigām buwananku gantaꞌan. Mbal na pinalabi umul sigām min dahatus maka duwampūꞌ tahun.”
4 Na, ma waktu heꞌ-i sampay ma tahun damuli giꞌ minnēꞌ, aniyaꞌ maitu ma dunya saga aꞌa kosogan maka alanjang, ya niōnan bangsa Nipilim. Aesog sigām maka abantug ma kalahat-lahatan. Panubuꞌ asal sigām min saga lꞌlla nggaꞌi ka aꞌa dunya ya bay makahꞌnda budjang aꞌa dunya.
5 Na, in binangsa manusiyaꞌ ma dunya itu taꞌndaꞌ eꞌ PANGHŪꞌ apꞌnnoꞌ eꞌ dusa maka alaꞌat lullun honaꞌ-honaꞌ sigām. 6 Pagꞌndaꞌna, magkarukkaꞌan iya ati magsusun na ma pasal pamapanjarina manusiyaꞌ maitu ma dunya. 7 Angkan angallam PANGHŪꞌ, yukna, “Pahalamku na binangsa manusiyaꞌ ya bay papanjariku. Pahalamku sigām sampay baꞌanan sattuwa maka hayop, pahalamku isab ai-ai maglelehan maka manuk-manuk magleyangan. Sababna magsusun toꞌongan aku ma bay papanjariku.” 8 Daipara pagꞌndaꞌ PANGHŪꞌ ma si Nū, kasulutan iya.
Si Nabi Nū
9-10 Ya itu salsila panugsugan si Nū. Tꞌllu du anakna lꞌlla, ya si Sēm, si Hām maka si Japet. Luwal si Nū halam dusahan ma waktu heꞌ-i, magdaꞌatay isab iya maka Tuhan. 11 Malaingkan saga pagkahina manusiyaꞌ kumarukan kalaꞌatan sigām ma matahan Tuhan. Apꞌnnoꞌ deyom dunya eꞌ kajahulakaꞌan sigām. 12 Angkan taꞌndaꞌ eꞌ Tuhan in dunya itu alumuꞌ na ma sabab kasabulan ya nihinang eꞌ saga manusiyaꞌ kamemon.
13 Manjari magkallam Tuhan ma si Nū, yukna, “Pahalamku na saga manusiyaꞌ kamemon ma sabab kajahulakaꞌan sigām maingga-maingga ma dunya. Pagmulkaꞌanku na sigām kamemon, maka lubuku isab sampay baran dunya. 14 Na, angahinang na ka adjungb ma kaꞌam,” yukna ma si Nū. “Subay kayu apagon ya pangahinangnu. Hinangin saga bilik ma deyom, boꞌ kitlanun lullun deyom-luwasanna. 15 Ya sukuranna subay buwattitu: tahaꞌna pitumpūꞌ maka limandꞌppa, luhana sangpūꞌ maka duwandꞌppa maka tongaꞌ, maka langkawna subay pitundꞌppa maka tongaꞌ. 16 Hinangin olangan duwa hꞌkka langana ma llot diyataꞌ dinding maka bihing atop. Hinangin tꞌllu angkap, angkap deyoꞌ, angkap tꞌngngaꞌ maka angkap diyataꞌ. Hinangin isab dakayuꞌ lawang ma bihingna. 17 Hatiun pahāp,” yuk Tuhan. “Itiyaꞌ na aku song amaniyaꞌ latap ma kaluhaꞌan dunya itu pamahalamku kamemon indaginis, sasuku taga-napas. Manjari kamemon ai-ai ma dunya itu amatay du. 18 Malaingkan patꞌnnaꞌanta ka paljanjiꞌan, in kaꞌam magtaiꞌanak sampay ayuwannu dꞌnda pariyataꞌ du ni adjung ya hinangnu ilu. 19-20 Subay duwaꞌnu isab min baꞌanan ai-ai taga-napas boꞌ pinakallum sambeyaꞌ maka kaꞌam. Patimuk du ni kaꞌam kamemon ginisan manuk-manuk, kamemon ginisan sattuwa maka hayop, sampay ginisan ai-ai maglelehan ma tanaꞌ. Magbeyaꞌ du sigām duwa-ruwa maglimbang. 21 Bowahun isab takakan indaginis. Tauꞌun pagkakanbi maka pagkakan saga sattuwa maka hayop maka kamanuk-manukan.” 22 Manjari bineyaꞌ eꞌ si Nū kamemon bay panohoꞌan Tuhan ma iya.