7
1 Na, aubus paꞌin nihinang adjung eꞌ, magsuwala PANGHŪꞌ-Yawe ma si Nū, yukna, “Pariyataꞌ na kam magtaiꞌanak, sabab hal kaꞌa ya taꞌndaꞌku halam dusahan ma kaluhaꞌan dunya. 2 Pasambeyaꞌun ma kaꞌam kamemon ginisan hayop halal, pituꞌ lꞌlla pituꞌ dꞌnda ma ginis-ginisanna. Bang sattuwa ya mbal tahalal, duwa-ruwa sadja ya niruwaꞌ, dakayuꞌ lꞌlla dakayuꞌ dꞌnda maglimbang. 3 Damikiyanna du isab ginisan manuk-manuk, pituꞌ lꞌlla pituꞌ dꞌnda ma ginis-ginisanna. Hinangun buwattilu supaya aniyaꞌ anatas allum min ginisan binangsa ai-ai kamemon boꞌ angaheka du paꞌin pabalik ma kaluhaꞌan dunya. 4 Pitungꞌllaw minnitu patumbukku ulan alandos ma deyom mpatpūꞌ ngꞌllaw, mpatpūꞌ bahangi. Jari pahalamku na kamemon taga-napas ya bay papanjariku.” 5 Na, bineyaꞌ eꞌ si Nū kamemon bay panohoꞌan PANGHŪꞌ ma iya.
6 Taꞌabut paꞌin kapangalatap dunya, aniyaꞌ na nnom hatus tahun umul si Nū. 7 In iya maka anak-hꞌndana sampay ayuwanna dꞌnda bay pariyataꞌ ni adjung boꞌ mbal taꞌabut eꞌ latap. 8-9 Manjari patimuk ni si Nū kamemon ginisan hayop maka sattuwa, halal maka nggaꞌi ka halal, sampay saga manuk-manuk maka kamemon maglelehan ma kuwit tanaꞌ, duwa-ruwa maglimbang. Pariyataꞌ na kamemon ni deyom adjung eꞌ buwat bay panohoꞌan Tuhan ma si Nū. 10 Sakali itu, taꞌabut paꞌin pitungꞌllaw minnēꞌ, yampa patumbuk ulan.
11 Pagabut paꞌin nnom hatus tahun si Nū, bulan karuwana, sangpūꞌ maka pituꞌ kasobangan ma tahun inaꞌan, abustak kamemon tuburan boheꞌ ya asal ma deyom tanaꞌ. Taukab isab taplok langit boꞌ patumbuk ulan alandos. 12 Halam aniyaꞌ hondonganna ma deyom mpatpūꞌ bahangi. 13 Ma llaw katagnaꞌ ulan inān, inaꞌan asal disi Nū ma deyom adjung, iya maka hꞌndana sampay saga anakna tꞌllungan si Sēm, si Hām maka si Japet sampay hꞌnda sigām. 14 Tabeyaꞌ isab ma sigām kamemon ginisan sattuwa maka hayop aheya-arikiꞌ, sattuwa talun maka hayop niꞌipat, sampay saga maglelehan ma tanaꞌ. Tabeyaꞌ isab kamemon ginisan manuk-manuk maka ai-ai magleyangan. 15 Manjari aniyaꞌ patipun ni si Nū lꞌlla maka dꞌnda maglimbang min binangsa kaginisan kamemon sasuku taga-napas, pinariyataꞌ ni adjung. 16 Ya na inaꞌan panohoꞌan Tuhan asal ma si Nū inān. Na, mahēꞌ paꞌin sigām kamemon ma deyom adjung, magtūy sigām tinambolan lawang eꞌ PANGHŪꞌ-Yawe.
17 Ma deyom mpatpūꞌ bahangi pasōng na paꞌin latap eꞌ, pasōng palalom boheꞌ, sampay pagūng na adjung eꞌ. 18 Pasōng palalom boheꞌ sampay talaran na adjung. 19 Palalom na paꞌin boꞌ palalom boheꞌ, sampay aletop na kamemon saga kabūd-būran. 20 Palalom na paꞌin boheꞌ sampay paꞌabut saga mpat dꞌppa lalomna min diyataꞌ saga pussuk būd. 21 Manjari maglembohan toꞌongan sasuku bay taga-napas ma dunya, baꞌanan kamanuk-manukan, kasattuwahan talun, kahayop-hayopan maka ai-ai maglelehan ma tanaꞌ. Magpatayan kamemon sampay binangsa manusiyaꞌ. 22 Kamemon ai-ai bay taga-napas ma gintanaꞌan waꞌi magpatayan lullun. 23 Alaglag sasuku taga-napas kamemon, saga manusiyaꞌ, kasattuwahan, kamanuk-manukan maka saga ai-ai maglelehan ma kuwit tanaꞌ. Ya du takapin allum si Nū maka saga kamemon bay ameyaꞌ ma iya ma deyom adjung. 24 Na, in latap inān halam bay pakōꞌ ma deyom dahatus maka limampūꞌ bahangi.