8
Pakōꞌ na Latap
1 Malaingkan nientom eꞌ Tuhan disi Nū sampay saga sattuwa maka hayop ya ma deyom adjung, ati aniyaꞌ baliyu akosog pinatiyup eꞌ Tuhan, manjari pakulang boheꞌ heꞌ. 2 Tinambol pabīng eꞌ Tuhan saga boheꞌ bay min deyom tanaꞌ maka boheꞌ min langit boꞌ pahondong na angulan. 3 In boheꞌ latap-i pakōꞌ-kōꞌ na paꞌin ma deyom dahatus maka limampūꞌ bahangi. 4 Sakali itu, taꞌabut paꞌin bulan kapituꞌna ma tahun eꞌ-i, sangpūꞌ maka pituꞌ kasobangan, yambohoꞌ sumanglada adjung eꞌ pehēꞌ ni dakayuꞌ būd ma jadjahan Ararat.b 5 Pakōꞌ-kōꞌ na paꞌin boheꞌ sampay ni panagnaꞌan bulan ma bulan sangpūꞌ heꞌ, jari taꞌndaꞌan di-na na saga pussuk kabūd-būran.
6 Na, palabay paꞌin mpatpūꞌ bahangi min bay katuwaꞌ pussuk būd eꞌ, niukab eꞌ si Nū tandawan bay tahinangna ma adjung 7 boꞌ paleyangna dakayuꞌ owak ni luwasan. Jari paleyang na paꞌin owak eꞌ piꞌingga-piꞌingga sampay aniyaꞌ katohoꞌan patꞌppakanna. 8 Mbal atꞌggol pinaleyang na isab eꞌ si Nū dakayuꞌ assang boꞌ kataꞌuwanna bang pakōꞌ na boheꞌ min kareyahan. 9 Sagōꞌ masi aletop eꞌ boheꞌ, maka assang eꞌ mbal makabāk patꞌppakanna. Manjari paleyang pabīng ni adjung. Na niabut eꞌ si Nū assang eꞌ labay min tandawan boꞌ pinasōd pabīng ni deyom adjung eꞌ. 10 Angagad lagiꞌ si Nū pitumbahangi boꞌ yampa paleyangna assang eꞌ pabīng. 11 Pagkohap paꞌin, na, ilu na assang pabalik ni iya, anangaꞌ dahun kayu jaitun bahaꞌu bay kꞌttuꞌna. Minnēꞌ kinataꞌuwan agtūy eꞌ si Nū ya boheꞌ latap pakōꞌ na. 12 Angagad giꞌ iya pitumbahangi boꞌ yampa paleyangna assang eꞌ pabīng. Jari ma lꞌngngan itu halam na makabīng ni adjung.
13 Taꞌabut paꞌin nnom hatus maka dantahun umul si Nū, boꞌ sahali bulan ma bulan dakayuꞌ ma tahun eꞌ-i, pakōꞌ na latap. Manjari nilaꞌanan eꞌ si Nū sapaw adjung eꞌ. Angꞌndaꞌ iya paluwas ati taꞌndaꞌna atohoꞌ-tohoꞌ na kuwit tanaꞌ. 14 Taꞌabut paꞌin ni tꞌllu kamatayan bulan ma bulan karuwana, atohoꞌ na toꞌongan.
15 Manjari magkallam Tuhan ma si Nū, yukna, 16 “Pareyoꞌ na kam magtaiꞌanak maka saga ayuwannu. 17 Pareyoꞌun isab ma kaꞌam saga kamanuk-manukan kamemon maka kahayop-hayopan, maka ai-ai maglelehan ma tanaꞌ, supaya anganak paheka ma kaluhaꞌan dunya itu.” 18 Manjari magdeyoꞌan na si Nū maka anak-hꞌndana sampay ayuwanna. 19 Pareyoꞌ du isab saga kahayop-hayopan maka saga kamanuk-manukan sampay ai-ai maglelehan ma tanaꞌ. Pareyoꞌ sigām daginis maka daginis.
20 Manjari amangkat batu si Nū nihinang pagkukulbanan ni PANGHŪꞌ-Yawe. Pagubus, angāꞌ iya hayop maka manuk-manuk halal daginis maka daginis. Sinumbaliꞌ eꞌna boꞌ yampa tinunuꞌ ma pagkukulbanan. 21 Kasulutan PANGHŪꞌ ma hamut kukulbanan inān, manjari yukna ma deyom atayna, “Mbal na pagmulkaꞌanku pabalik dunya itu ma sababan manusiyaꞌ, minsan alaꞌat asal honaꞌ-honaꞌ sigām sangay min kanahut sampay ni kaheya sigām. Mbal na pakaꞌatku pabīng kamemon ya sasuku taga-napas buwat bay hinangku itu.
22 Satꞌggol anatas dunya itu,
satꞌggol isab magsꞌlleꞌ-sꞌlleꞌ musim maka waktu,
musim pagtanom maka musim pagani,
waktu haggut maka waktu pasuꞌ,
pangꞌllaw maka pangulan,
llaw maka sangom.”