9
Paljanjiꞌan Tuhan maka si Nū
1 Manjari si Nū maka saga anakna lꞌlla binarakatan na eꞌ Tuhan. Magkallam iya ma sigām, yukna, “Anganak kam paheka supaya apꞌnnoꞌ eꞌbi kaluhaꞌan dunya ilu. 2 Kaꞌam ilu kinatāwan du eꞌ kamemon sattuwa maka hayop, manuk-manuk maka ai-ai maglelehan ma tanaꞌ, sampay saga daing. Buwananta kam kapatut magdūl-bayaꞌ ma sigām. 3 Manjari takakanbi na ai-ai taga-napas ilu. Ma waktu dahū inān, tinanom ya bay pamuwanku ma kaꞌam, sagōꞌ buwattitu pamuwanku na kamemon.
4 “Saguwāꞌ aniyaꞌ pangalānganku ma kaꞌam subay mbal kakanbi, ya na sumbaliꞌan halam tapaluwas lahaꞌna, sabab lahaꞌ ya pameyaꞌan nyawa. 5 Damikiyanna lahaꞌbi manusiyaꞌ, pameyaꞌan nyawa isab angkan subay tinungbasan toꞌongan. Sai-sai aꞌa amahuddud lahaꞌ pagkahina manusiyaꞌ sampay amatay, tungbasanku du. Minsan sattuwa, bang aniyaꞌ amapatay ma manusiyaꞌ, subay du papatayku.
6 Sabab aku ya bay amapanjari manusiyaꞌ pinaꞌanggil ni aku,
angkan na bang aniyaꞌ aꞌa amahuddud lahaꞌ pagkahina,
binalosan du aꞌa inān, pinahuddud isab lahaꞌna eꞌ pagkahina manusiyaꞌ.
7 Na, kaꞌam ilu subay anganak paheka supaya asaplag kaluhaꞌan dunya eꞌ saga panubuꞌbi magsuring-magsaingsing.”
8 Manjari itu magkallam isab Tuhan ma si Nū maka saga anakna lꞌlla, yukna, 9 “Itiyaꞌ aku amatꞌnnaꞌ paljanjiꞌanku ma kaꞌam sampay ma saga panubuꞌbi magpangkat-mamangkat. 10 Ya du ai-ai taga-napas kamemon ya bay tabeyaꞌ ma kaꞌam ma adjung eꞌ, talapay du isab pinatꞌnnaꞌan paljanjiꞌan, ai na ka manuk-manuk, ai na ka hayop, ai na ka sattuwa. 11 Ya na itu pagkallamku pasal paljanjiꞌanku ma kaꞌam: tinagnaꞌan minnitu in dunya itu mbal na taluwaꞌ latap pabalik, maka ai-ai taga-napas kamemon mbal du alaglag eꞌ latap. 12 Aniyaꞌ isab tandaꞌ palsaksiꞌan patꞌnnaꞌku ma kaꞌam magtubuꞌ-manubuꞌ sampay ma sasuku taga-napas kamemon. 13 Patꞌnnaꞌku biradalikua ma kagabunan, boꞌ aniyaꞌ paltandaꞌan pamaentom saga manusiyaꞌ ma pasal paljanjiꞌanku ma kamemon ya ma dunya. 14 Bang paꞌandomku lahat boꞌ aniyaꞌ biradali patuwaꞌ min deyom andom, 15 entomku du paljanjiꞌanku ma kaꞌam saga manusiyaꞌ sampay ma kamemon taga-napas mailu ma dunya. Janjiꞌanta kam, halam na aniyaꞌ latap makalaglag pabīng.” 16 Yuk Tuhan isab, “Bang patuwaꞌ biradali ma kagabunan sumiyan-sumiyan, ndaꞌku maka entomku paljanjiꞌanku ma ai-ai taga-napas ma babaw dunya, paljanjiꞌan anatas ni kasaumulan.”
17 Buwattēꞌ pagkallam Tuhan ma si Nū, yukna, “Ya na inaꞌan tandaꞌ sin paljanjiꞌan ya tahinangku ma sasuku taga-napas mailu ma dunya.”
Si Nabi Nū maka saga Anakna
18 Na, saga anak si Nū ya bay seheꞌna ma adjung eꞌ, ya na disi Sēm, si Hām maka si Japet. (Si Hām ya mmaꞌ si Kanaꞌan.) 19 In anak si Nū katꞌllungan itu, ya na pangꞌmboꞌan ma kamemon manusiyaꞌ ya pasaplag ma kaluhaꞌan dunya. 20 Na si Nū itu aꞌa maghuhuma asal, jari anagnaꞌ iya magtanom anggul.b 21 Manjari itu, aniyaꞌ inuman makalango nihinang eꞌ si Nū min boheꞌ anggul eꞌ. Paginumna, nilango iya ati ahurusan di-na saga sꞌmmekna. Ati pabahak iya anantang ma deyom tolda ya paglumaꞌanna. 22 Mahēꞌ paꞌin iya pabahak, makasōd pehēꞌ anakna si Hām, ya mmaꞌ si Kanaꞌan. Manjari tapandang eꞌna harapan mmaꞌna. Pagpandangna itu, magtūy iya paluwas anuli-nulihan saga danakanna 23 si Sēm maka si Japet. Sigā duwangan itu bay angāꞌ sꞌmmek magtūy. Pinasablay ma baha sigā boꞌ yampa pasōd dahū bukut anambunan mmaꞌ sigā. Halam sigā palingiꞌ boꞌ mbal taꞌndaꞌ kaiyaꞌanna. 24 Na, pagsayu si Nū min bay kalangona, boꞌ kataꞌuwanna bay hinang anakna kasiyalihan ma iya, 25 magtūy pabukaganna. Yukna,
“Si Kanaꞌan itu tꞌkkahan suknaꞌ.
Tahinang iya ata ma deyoꞌan saga danakanna.”
26 Ahꞌlling isab si Nū,
“Pudjiku PANGHŪꞌ ya pagtuhanan si Sēm!
Bang paꞌin paꞌata ni iya si Kanaꞌan sampay panubuꞌna.
27 Si Japet isab, bang paꞌin angaluha paglahatan saga panubuꞌna.
Bang paꞌin sigām palamud sangkahāpan ma saga panubuꞌ si Sēm.
Bang paꞌin isab paꞌata ni sigām si Kanaꞌan maka panubuꞌna.”