10
1 Ya na itu salsila panugsugan si Sēm, si Hām maka si Japet, ya anak si Nū. Aniyaꞌ na anak sigām puwas bay min latap.
Kapanubuꞌan si Japet
2 Na, ya na itu saga anak si Japet lꞌlla, maka ōn bangsa isab ya patubuꞌ min sigām: si Gomer, si Magog, si Maday, si Jaban, si Tubal, si Mesek maka si Tiras. 3 Tubuꞌan si Gomer ya na saga aꞌa Askenas, aꞌa Ripat maka aꞌa Togarma. 4 Tubuꞌan si Jaban ya na saga aꞌa Elisa, Tarsis, Kīt, maka Rodan. 5 Manjari tubuꞌan si Jaban tahinang saga bangsa ya maglahat ma bihing tahik maka ma kapūꞌ-pūꞌan. Kaniya-kaniya sigām magsaddī-saddī lahat maka bahasa sigām.
Kapanubuꞌan si Hām
6 Na, ya na itu saga anak si Hām lꞌlla, maka ōn bangsa isab ya patubuꞌ min sigām: si Kūs, si Misil, si Pūt maka si Kanaꞌan. 7 Tubuꞌan si Kūs, ya na saga aꞌa Seba, Habila, Sabta, Raꞌama maka Sabteka. Tubuꞌan si Raꞌama isab ya na saga aꞌa Seba maka Dedan. 8 Aniyaꞌ isab anak si Kūs dakayuꞌ, ōnna si Nimrud. In si Nimrud itu dahū min aꞌa kamemon akosog angagaw lahat maitu ma dunya. 9 Abantug isab iya ma sabab kosogna magpanaꞌ sattuwa. Angkan na pinagbahasa hꞌlling itu, “Bang paꞌin ka pasaliꞌ ni si Nimrud ya akosog magpapanaꞌ ma sabab tabang min PANGHŪꞌ-Yawe.” 10 Na, ya tagnaꞌan daꞌiraa pinagbayaꞌan eꞌ si Nimrud itu, ya na Babilon, Erek, Akkad maka Kalne, ya bay mahēꞌ ma lahat Babilon. 11 Pinaluha isab pagnakuraꞌna sampay ni lahat Assiriya ati mahēꞌ iya amahinang daꞌira Niniba maka Rehobot-Ēl maka Kala. 12 Bay pahinangna isab daꞌira Resen ma tongaꞌan Niniba maka Kala, ya daꞌira aheya ōnna.
13 Manjari panubuꞌ si Misil isab, ya na saga aꞌa Lūd, Anam, Lehab, Naptu, 14 Patrus, Kaslu maka Kiriti. Aꞌa Kiritib itu ya na paluwasan bangsa Pilistin.
15 Si Kanaꞌan taga-anak lꞌlla, si Sidun ya siyaka, boꞌ pasunuꞌ si Hīt. 16 Si Kanaꞌan isab ya pangꞌmboꞌan saga aꞌa Jibus, Amor, Gilgas, 17 Hīb, Arka, Sīn, 18 Arbad, Semar maka Hamat. Pasaplag asal saga bangsa paltubuꞌan si Kanaꞌan itu, 19 min lahat Sidun sampay taꞌabut lahat Gerar ya ma kasekotan lahat Gasa. Pasampay isab sigām tudju ni lahat Sodom, Gomora, Adma maka Seboyim, ya ma kasekotan lahat Lasa. 20 Na, ya du ilu saga panubuꞌ si Hām ya tahinang palbangsa-bangsahan. Kaniya-kaniya sigām magsaddī-saddī lahat maka bahasa.
Kapanubuꞌan si Sēm
21 Na, si Sēm isab, siyaka si Japet, ya na pangꞌmboꞌan si Eber sampay panubuꞌna kamemon. 22 Saga anak si Sēm lꞌlla ya na si Elam, si Assur, si Alpaksad, si Lūd maka si Aram. 23 Saga panubuꞌ si Aram ya na saga aꞌa Ūs, Hūl, Geter maka Mesek. 24 Manjari si Alpaksad ya mmaꞌ si Sela, boꞌ si Sela ya mmaꞌ si Eber. 25 Si Eber itu duwa anakna lꞌlla. Ya pangōn ma anakna dangan inān si Pelegc sabab binangsa manusiyaꞌ bay abahagiꞌ ma deyom masana. Si Joktan ya danakan si Peleg. 26 Manjari ya panubuꞌ si Joktan ya na saga aꞌa Almodad, Selep, Hasamabet, Jera, 27 Hadoram, Usal, Dikla, 28 Obal, Abimail, Seba, 29 Opir, Habila, maka Jobab. Panubuꞌ si Joktan asal sigām kamemon itu. 30 Ya paglahatan sigām ma lahat Mesa sampay taꞌabut lahat Separ, ya lahat kabūd-būran tampal ni sobangan.
31 Ya na inaꞌan saga panubuꞌ si Sēm. Kaniya-kaniya sigām magsaddī-saddī lahat maka bahasa.
32 Na, panubuꞌ si Nū saga aꞌa kamemon ya tasabbut inān, kaniya-kaniya sigām magsaddī-saddī panugsugan. Lāgi, damuli paꞌin min latap, pasaplag ma dunya saga kabangsa-bangsahan kamemon, luwas min panganak si Nū.