11
Lumaꞌ Landuꞌ Alanga ma Lahat Babilon
1 Na, ma masa awal eꞌ dakayuꞌ du bahasa pahꞌlling saga manusiyaꞌ kamemon ma sakalingkal dunya. 2 Maglatun-latun na paꞌin sigām ma lahat sobangan sampay taꞌabut eꞌ sigām karatagan aluha ma lahat Babilon. 3 Mainaꞌan paꞌin, magisun-isun sigām, yuk-i, “Sūng kitam angahinang tisaꞌa paheka, tinapa ma api boꞌ patuwas.” Nggaꞌi ka batu ya ginuna eꞌ sigām pangahinang lumaꞌ sagōꞌ tisaꞌ pinagpikit maka kitlan. 4 Yuk sigām isab, “Gom na kitam maghinang daꞌira taga-lumaꞌ pamantawan. Pamantawan itu subay alangkaw toꞌongan saꞌagon-agon makaꞌabut langit. Manjari abantug kitam, maka mbal tapulak-palik ni mpat pidju alam.”
5 Manjari pareyoꞌ PANGHŪꞌ-Yawe pinaꞌan angꞌndaꞌ daꞌira maka lumaꞌ pamantawan ya nihinang eꞌ saga aꞌa inān. 6 “Na,” yukna, “Dabangsa asal manusiyaꞌ itu kamemon, maka bahasa sigām dakayuꞌ du isab, ya angkan sigām makarapat angahinang daꞌira buwattitu. Tagnaꞌanna sadja koꞌ itu, gana-gana angahinang du sigām ai-ai kamaksuran sigām. 7 Gom giꞌ kita patulun pehēꞌ amapaglamud-lamugay bahasa sigām pakaniya-kaniya supaya sigām mbal maghati-hiyatihi danseheꞌan.” 8 Manjari kinanat-kanat eꞌ PANGHŪꞌ saga manusiyaꞌ kamemon ni mpat pidju alam ati pahali sigām maghinang daꞌira heꞌ. 9 Ya heꞌ sababna angkan lahat inān niōnan Babelb sabab ya inaꞌan lahat paglamud-lamugayan bahasa saga manusiyaꞌ, lahat isab pagkanat-kanatan sigām eꞌ PANGHŪꞌ ni kalahat-lahatan ma mpat pidju alam.
Kapanubuꞌan si Sēm
10 Na, balikta salsila panugsugan si Sēm. Duwantahun palabay min bay latap ma dunya, boꞌ dahatus tahun na umul si Sēm, aniyaꞌ anakna lꞌlla ōnna si Alpaksad. 11 Palabay paꞌin min bay kapaganak ma si Alpaksad aniyaꞌ giꞌ lima hatus tahun umul si Sēm, maka aniyaꞌ lagiꞌ anakna dꞌnda-lꞌlla boꞌ yampa iya amatay. 12 Na si Alpaksad isab, pagabut tꞌllumpūꞌ maka limantahun umulna, aniyaꞌ anakna lꞌlla ōnna si Sela. 13 Palabay paꞌin min kapaganak ma si Sela, aniyaꞌ giꞌ mpat hatus maka tꞌlluntahun umul si Alpaksad, maka aniyaꞌ lagiꞌ anakna dꞌnda-lꞌlla boꞌ yampa iya amatay. 14 Na si Sela isab, pagabut tꞌllumpūꞌ tahun umulna, aniyaꞌ anakna lꞌlla ōnna si Eber. 15 Puwas eꞌ, aniyaꞌ giꞌ mpat hatus maka tꞌlluntahun umul si Sela, maka aniyaꞌ lagiꞌ anakna dꞌnda-lꞌlla boꞌ yampa iya amatay. 16 Na si Eber isab, pagabut tꞌllumpūꞌ maka mpat tahun umulna, taga-anak iya lꞌlla ōnna si Peleg. 17 Palabay paꞌin min bay kapaganak ma si Peleg, aniyaꞌ giꞌ mpat hatus maka tꞌllumpūꞌ tahun umul si Eber maka aniyaꞌ lagiꞌ anakna dꞌnda-lꞌlla boꞌ yampa iya amatay. 18 Na si Peleg isab, pagabut tꞌllumpūꞌ tahun umulna, taga-anak iya lꞌlla ōnna si Riyu. 19 Palabay paꞌin min bay kapaganak ma si Riyu, aniyaꞌ giꞌ duwa hatus maka siyam tahun umul si Peleg, maka aniyaꞌ lagiꞌ anakna dꞌnda-lꞌlla boꞌ yampa iya amatay. 20 Na si Riyu isab, taꞌabut paꞌin umulna tꞌllumpūꞌ maka duwantahun, taga-anak iya lꞌlla ōnna si Serog. 21 Palabay paꞌin min bay kapaganak ma si Serog, aniyaꞌ giꞌ duwa hatus maka pituntahun umul si Riyu. Taga-anak lagiꞌ iya dꞌnda-lꞌlla boꞌ yampa iya amatay. 22 Na, taꞌabut paꞌin tꞌllumpūꞌ tahun umul si Serog, aniyaꞌ anakna lꞌlla ōnna si Nahor. 23 Palabay paꞌin min bay kapaganak ma si Nahor, aniyaꞌ giꞌ duwa hatus tahun umul si Serog. Taga-anak lagiꞌ iya dꞌnda-lꞌlla boꞌ yampa iya amatay. 24 Na si Nahor isab, taꞌabut paꞌin umulna duwampūꞌ maka siyam tahun, aniyaꞌ anakna lꞌlla ōnna si Tera. 25 Manjari min bay kapaganak ma si Tera, aniyaꞌ giꞌ dahatus maka sangpūꞌ maka siyam tahun umul si Nahor. Taga-anak giꞌ iya dꞌnda-lꞌlla boꞌ yampa iya amatay. 26 Na si Tera itu, pitumpūꞌ tahun umulna boꞌ yampa iya taga-anak. Si Ibram ya anakna siyaka, boꞌ pasunuꞌ si Nahor, boꞌ si Haran ya kasiyalihan.
Kapanubuꞌan si Tera
27 Na, ya na itu salsila pasal si Tera maka saga panubuꞌna. Si Tera itu mmaꞌ disi Ibram, si Nahor maka si Haran. Si Haran itu aniyaꞌ anakna ōnna si Lōt. 28 Saguwāꞌ ma allum lagiꞌ mmaꞌna si Tera, amatay na si Haran ma lahat Uru, ya lahat paglahatan bangsa Kaldiya, lahat bay kapanganakan iya asal. 29-30 Na si Ibram maka si Nahor taga-hꞌnda karuwangan. Si Saray ya hꞌnda si Ibram, sagōꞌ halam aniyaꞌ anak sigā sabab si Saray mbal toꞌongan makaꞌanak. Si Milka anak si Haran ya hꞌnda si Nahor. Aniyaꞌ danakan si Milka niōnan si Iska.
31 Manjari maglaꞌanan na disi Tera min Uru ya bay paglahatan bangsa Kaldiya. Tabeyaꞌ ma iya anakna si Ibram maka mpuna si Lōt anak si Haran. Tabeyaꞌ isab ayuwanna si Saray hꞌnda si Ibram. Ya tinudju eꞌ sigām lahat Kanaꞌan sagōꞌ atꞌkka paꞌin sigām ni daꞌira Haran, mahēꞌ sigām maglahat.
32 Na, katꞌddasan sigām ma Haran sampay amatay na si Tera, duwa hatus maka limantahun umulna.