12
Panohoꞌan Tuhan ma si Ibram
1 Na aniyaꞌ palman PANGHŪꞌ-Yawe ma si Ibram, yukna, “Alaꞌan ka min lahatnu luggiyaꞌ ilu. Alaꞌan ka min saga lūng-kampungnu maka min okoman mmaꞌnu boꞌ ka pehēꞌ ni lahat dakayuꞌ ya paꞌndaꞌanku ni kaꞌa ma sinosōng.
2 Hinangta ka poꞌonan bangsa aheya maka abantug.
Buwananta ka kahāpan maka pabantugku ōnnu.
Saga pagkahinu manusiyaꞌ isab kabuwanan kahāpan ma sababnu.
3 Sasuku anabbut ōnnu ni kahāpan buwananku isab kahāpan.
Sasuku anabbut ōnnu ni kalaꞌatan pagmulkaꞌanku du.
Manjari saga kabangsa-bangsahan kamemon maitu ma dunya pinasukuꞌan kahāpan ma sababnu.”
4 Sakali taꞌabut paꞌin pitumpūꞌ maka limantahun umul si Ibram, alaꞌan iya min lahatna Haran tudju ni lahat Kanaꞌan, buwat bay panohoꞌan PANGHŪꞌ ma iya. Ameyaꞌ isab si Lōt. 5 Manjari ya binowa eꞌ si Ibram hꞌndana si Saray, kamanakanna si Lōt, sampay saga ata bay bꞌllina ma lahat Haran. Binowa isab pangaltaꞌna kamemon bay tausahana mahēꞌ.
6 Na pagtꞌkka sigām ni lahat Kanaꞌan, nilanjalan na paꞌin lꞌngngan sigām sampay taꞌabut kayu pagduwaꞌahan ma More, ma tongod lahat Sekem. (Kabangsa-bangsahan Kanaꞌan ya tag-lahat ma masa inān.) 7 Manjari magpaꞌndaꞌ PANGHŪꞌ ma si Ibram boꞌ magkallam ma iya, yukna, “Ma sinosōng pamuwanku lahat Kanaꞌan itu ma saga panubuꞌnu.” Magtūy si Ibram angahinang tambak batu panukbalanna kulban tudju ni PANGHŪꞌ, ya bay magpaꞌndaꞌ ma iya. 8 Puwas eꞌ palanjal iya tudju ni kabūran ma jadjahan Betel tampal ni sobangan. Mahēꞌ iya pahantiꞌ ma tongaꞌan kauman Betel maka kauman Ayi. Aniyaꞌ isab panukbalan kulban tahinangna mainaꞌan pagsumbahanna ni PANGHŪꞌ. 9 Puwas eꞌ pauntas na si Ibram tudju ni lahat Negeb.
Si Ibram maka si Saray ma Lahat Misil
10 Na aniyaꞌ gotom mainaꞌan ma lahat Kanaꞌan, asigpit toꞌongan, angkan palūd disi Ibram ni lahat Misil boꞌ pahantiꞌ mahēꞌ. 11 Manjari itu, song paꞌin sigām atꞌkka ni lahat Misil, ahꞌlling si Ibram ma hꞌndana si Saray, yukna, “Saray, kaꞌa ilu ahāp dꞌnda. 12 Bang ka gantaꞌ taꞌndaꞌ eꞌ saga aꞌa Misil, kinataꞌuwan eꞌ sigām in kaꞌa hꞌndaku. Jari pinapatay aku eꞌ sigām boꞌ kaꞌa ya pinakallum. 13 Gom na yuknu ma sigām magdanakan kita, supaya aku kinahāpan eꞌ sigām ma sababnu. Manjari aku itu mbal niꞌinay.” 14 Na, pagtꞌkka sigām ni lahat Misil, boꞌ pagꞌndaꞌ saga aꞌa mainaꞌan ma si Saray, bꞌnnal alingkat. 15 Taꞌndaꞌ paꞌin iya eꞌ saga aꞌa pangandolan Piraꞌun,a magtūy sigām angahaka pehēꞌ ni Piraꞌun-i pasal kalingkatna. Sakali binowa si Saray pehēꞌ ni deyom astanaꞌ. 16 Boꞌ si Ibram ya kinahāpan eꞌ Piraꞌun ma sabab si Saray. Binuwanan iya baꞌanan bili-bili, kambing, sapiꞌ, kuraꞌ maka untaꞌ, sampay isab saga ata dꞌnda-lꞌlla.
17 Sagōꞌ in Piraꞌun pinatꞌkkahan saki aheya eꞌ PANGHŪꞌ ma sabab pangāꞌna ma si Saray. Talapay isab saga aꞌa kamemon ma deyomanna. 18 Angkanna pinalinganan si Ibram eꞌ Piraꞌun boꞌ tilawna bang ai sababna. “Angay aku putingannu?” yuk Piraꞌun. “Angay aku halam pataꞌunu in iya hꞌndanu? 19 Yuknu ma aku in si Saray ilu danakannu, angkan iya arak taꞌāꞌku hꞌnda. Oꞌo, hꞌndanu itu, ā! Ngāꞌun iya pabalik boꞌ kam alaꞌan minnitu!” 20 Manjari magpanohoꞌan Piraꞌun ma saga tendogna ma pasal disi Ibram. Sinōꞌ iya pinalaꞌan ma sigām min lahat Misil, iya baranna maka hꞌndana sampay ai-aina kamemon.