13
Kapagokat si Ibram maka si Lōt
1 Manjari alaꞌan na disi Ibram min lahat Misil boꞌ pabīng ni Negeb mahēꞌ ma lahat Kanaꞌan. Ameyaꞌ isab hꞌndana maka pangaltaꞌna kamemon sampay isab kamanakanna si Lōt. 2 Magkarayahan na toꞌongan si Ibram. Aheka toꞌongan baꞌanan kahayop-hayopanna maka aheka isab pamulawanna indaginis. 3 Manjari palintas sigām min Negeb boꞌ maglatun-latun tudju ni kauman Betel, ni bay pahantiꞌan sigām tagnaꞌ ma tongaꞌan Betel maka daꞌira Ayi. 4 Asal aniyaꞌ bay mainaꞌan pagtukbalan kulban bay tahinang eꞌ si Ibram ma waktu palabay. Mainaꞌan isab iya anabbut ma ōn Yawe.
5 Na si Lōt isab, ya seheꞌ si Ibram maglatun-latun, aniyaꞌ anak-hꞌndana maka saga sosohoꞌanna. Aheka isab kahayopanna, saga kambing, bili-bili maka sapiꞌ. 6 Jari aheka sidda kahayopan sigām karuwangan, angkan mbal sꞌddong ma kaparangan lahat inān bang masi na paꞌin sigām dambeyaꞌan. 7 Ya heꞌ sababna angkan magsasaw saga magiꞌipat hayop si Ibram maka saga aꞌa magipat hayop si Lōt. Masi isab aniyaꞌ saga aꞌa bangsa Kanaꞌan maka bangsa Peres maglahat mainaꞌan ma masa disi Ibram inān.
8 Sakali si Ibram bay amowa si Lōt maggaraꞌ, yukna, “Otōꞌ, dalahaꞌ du kita angkan aku mbal bilahi bang aniyaꞌ pagsasawan, ai na ka ma kita, atawa ma saga tendogta. 9 Gom kita magokat sabab aluha lahat itu. Kaꞌa ya ameneꞌ maingga-maingga kabayaꞌannu paglahatan. Bang kabayaꞌannu tanaꞌ tampal ni gibang, ma aku na tampal ni kowan. Bang kabayaꞌannu tanaꞌ tampal ni kowan, ma aku na tampal ni gibang.” 10 Na amantaw si Lōt ni kapantayan ma bihing sapaꞌ Jordan tobtob ni lahat Sowar. Pagꞌndaꞌna ma kapantayan inān, na, aheka boheꞌna, buwat lahat Eden ya bay pinaniyaꞌ eꞌ PANGHŪꞌ ma awal jaman. Dahāp isab maka lahat Misil. (Ma waktu ītu halam giꞌ bay minulkaꞌan eꞌ PANGHŪꞌ daꞌira Sodom maka Gomora.) 11 Manjari ya tapeneꞌ eꞌ si Lōt palsukuꞌanna tanaꞌ kapantayan kamemon ya ma bihing sapaꞌ Jordan. Pagubus, papinda na iya pehēꞌ tudju ni sobangan. Na buwattēꞌ ya kapagꞌbba si Ibram maka si Lōt. 12 Si Ibram ya patꞌnnaꞌ mainaꞌan ma kabūran lahat Kanaꞌan, boꞌ si Lōt ya patꞌnnaꞌ ma kapantayan asekot ni daꞌira Sodom. Mahēꞌ na iya amatꞌngge tolda paglumaꞌan sigām. 13 Na, saga aꞌa Sodom itu asal jahulakaꞌ maka lumanduꞌan dusa sigām ni si Yawe.
Kapaglain disi Ibram ni Kauman Hebron
14 Makalaꞌan paꞌin si Lōt, angallam PANGHŪꞌ-Yawe ma si Ibram, yukna, “Angꞌndaꞌ ka ni katilibutnu ilu. 15 Ya kaluhaꞌan lahat taꞌndaꞌnu ilu, pamuwanku du ma kaꞌa sampay ma saga panubuꞌnu salama-lama. 16 Buwananta ka tubuꞌ paheka, mbal taitung, sapantun heka gusung ma gintanaꞌan. 17 Na, pehēꞌ na ka, latagun kaluhaꞌan lahat ilu, sabab pamuwanku du ma kaꞌa ma sinosōng.”
18 Jari papinda si Ibram pehēꞌ ni Hebron, ati mahēꞌ iya maglahat ma tongod saga kakayuhan Mamre, ya pagduwaꞌahan aꞌa kaseheꞌan. Aniyaꞌ isab pagtunuꞌan kulban nihinang eꞌ si Ibram mainaꞌan panumbahanna ni PANGHŪꞌ.