14
Si Lōt Nilappas eꞌ si Ibram
1-2 Na, ma masa heꞌ, aniyaꞌ mpat sultan magbonoꞌ maka lima pagkahi sigām sultan. Ya itu ōn mpat sultan maka lahat bay pagnakuraꞌan sigām: si Amdapel sultan min lahat Babilon, si Areyok sultan min daꞌira Ellasal, si Kedollomer sultan min Elam, maka si Tidal sultan min Goyem. Aniyaꞌ isab lima sultan saddī ya kuntara sigām: si Bera sultan min daꞌira Sodom, si Bilsa sultan min daꞌira Gomora, si Sinab sultan min Adma maka si Semeber sultan min Seboyim. Kalimana sultan min kauman Bela (hatina Sowar). 3 Na, lima sultan itu bay amatimuk kasundaluhan sigām ma Kapantayan-Siddim, ya niōnan isab Tahik Maꞌasin. 4 Sangpūꞌ maka duwantahun ya tꞌggol sigām ma pangꞌntanan sultan Kedollomer, sagōꞌ taꞌabut paꞌin sangpūꞌ ka tꞌlluntahun, anawakkal sigām angatu ma iya.
5 Na, taꞌabut paꞌin sangpūꞌ maka mpat tahun, atꞌkka pinaꞌan si Kedollomel maka saga sultan ya gapiꞌna. Jari taraꞌug eꞌ sigām bangsa Repa ma lahat Asterot Karnaim, taraꞌug bangsa Sūs ma lahat Hām, maka bangsa Ēm ma Kapantayan Kiriyataim. 6 Taraꞌug isab bangsa Hōr ma kabūd-būran lahat Seꞌer ati taturul sigām sampay taꞌabut jadjahan Elparan ya ma bihing lahat paslangan. 7 Puwas eꞌ, pabīng isab saga sundalu disi Kedollomel inān pehēꞌ ni lahat Kades, ya bay pinagōnan En-Mispat ma waktu tagnaꞌ. Taraꞌug isab eꞌ sigām bangsa Amalek, ati taꞌagaw kaluhaꞌan lahat sigām. Ya du bangsa Amor ya maglahat ma daꞌira Hasason-Tamar, kaꞌagawan isab.
8 Na, balikta sultan lima hekana, hatina sultan min daꞌira Sodom, min Gomora, min Adma, min Seboyim maka min Bela. Bay sigām magtimuk ma Kapantayan-Siddim magbonoꞌ 9 maka si Kedollomel sultan Elam maka saga sultan ya gapiꞌna. Ya na si Tidal sultan Goyem, si Amdapel sultan ma lahat Babilon, maka si Areyok sultan Ellasal. Hatina lima sultan min dambilaꞌ, mpat isab min dambilaꞌ. 10 Aheka asal lowang ma Kapantayan-Siddim eꞌ, apꞌnnoꞌ eꞌ kitlan. Na, maglahian paꞌin sultan Sodom maka sultan Gomora min pagbonoꞌan, aniyaꞌ saga tendog sigām bay ahūg ni deyom lowang eꞌ, maka aniyaꞌ isab bay makalahi pehēꞌ ni kabūd-būran. 11 Manjari itu, angandaꞌug paꞌin saga sultan mpat hekana heꞌ, taꞌagaw eꞌ sigām kamemon pangaltaꞌ maka balanjaꞌ bay ma deyom daꞌira Sodom maka daꞌira Gomora. Pagubus, maglaꞌanan sigām minnēꞌ. 12 Tabowa isab eꞌ sigām si Lōt kamanakan si Ibram, iya baranna sampay altaꞌna kamemon, pagka daꞌira Sodom ya paglahatanna.
13 Sakali itu aniyaꞌ aꞌa makalꞌppa min pangꞌntanan disi Kedollomel amowa lapal ni si Ibram, ya bangsa Hibrania. Inaꞌan iya maglahat ma tongod kakayuhan pagduwaꞌahan, ya ma si Mamre aꞌa bangsa Amor. Aniyaꞌ isab danakan si Mamre, si Eskol maka si Aner. Pagapiꞌ asal sigām magdanakan itu ma si Ibram. 14 Na, pagtaꞌu si Ibram waꞌi tasaggaw kamanakanna si Lōt, magtūy iya amatipun saga tendogna ya bay asal ma deyomanna, aꞌa ataꞌu magbonoꞌ. Tꞌllu hatus maka sangpūꞌ maka waluꞌ puhuꞌ ya heka sigām. Atimuk paꞌin, magtūy sigām paturul ni mpat sultan inān sampay taꞌabut lahat Dān. 15 Sangom paꞌin, pinagbahagiꞌ eꞌ si Ibram saga tendogna boꞌ parugpak ni kuntara sigām. Agaꞌos disi Ibram inān ati anurul saga kuntara sigām sampay ni kauman Hoba, ya ma dambilaꞌ daꞌira Damaskus tampal ni uttalaꞌ. 16 Taꞌabut paꞌin kauman Hoba, magtūy taꞌāꞌ pabalik saga pangaltaꞌ kamemon bay tataban eꞌ mpat sultan eꞌ. Taꞌāꞌ isab pabīng eꞌ si Ibram kamanakanna si Lōt maka altaꞌna, sampay saga karꞌndahan maka aꞌa kaseheꞌan ya bay tasaggaw inān. 17 Sakali taraꞌug eꞌ si Ibram sultan Kedollomel maka saga sultan gapiꞌna. Ma labayan paꞌin iya tudju amoleꞌ, boꞌ taꞌabut Lꞌbbak Sabe, ya pinagōnan isab Lꞌbbak sin Kasultanan, sinampang iya eꞌ sultan min daꞌira Sodom.
Si Ibram Niamuꞌ-amuꞌan Kahāpan eꞌ si Malkisadik
18 Sinampang isab iya eꞌ si Malkisadik, sultan ma lahat Salem maka imam maghinang ni Tuhan Mahatinggi. Aniyaꞌ tinapay maka binu-anggul binowa eꞌna pangalabotna ma si Ibram, 19 boꞌ yampa angamuꞌ-amuꞌan iya kahāpan, yukna,
“Bang paꞌin si Ibram kabuwanan kahāpan
eꞌ Tuhan Mahatinggi,
ya magpapanjari dunya maka langit!
20 Pudjiku Tuhan Mahatinggi,
ya bay anukbal saga bantanu
ni deyom pangꞌntanannu!”
Manjari saga altaꞌ bay taꞌagaw pabīng eꞌ si Ibram, binahagiꞌ eꞌna pasangpūꞌ, ati dabahagiꞌ heꞌ pangahulmatna ma si Malkisadik.
21 Ahꞌlling isab sultan min daꞌira Sodom ma si Ibram, yukna, “Ma kaꞌa na kamemon pangaltaꞌku ilu. Sagōꞌ amuꞌku poleꞌin sadja ni aku saga tendogku ya bay tabowanu palꞌppa ilu.”
22 Ya sambung si Ibram, “Saksiꞌku si Yawe, ya Tuhan Mahatinggi bay magpapanjari dunya maka langit. Bay aku makasapa ma iya, 23 mbal aku anaimaꞌ ai-ai palsukuꞌannu, minsan laꞌa dalamba salbannu atawa engkot taumpaꞌnu boꞌ mbal ka makapahꞌlling kaꞌa ya bay makaparaya ma aku. 24 Mbal aku anambut ai-ai min kaꞌa, luwal ya bay panganggastu saga aꞌaku. Sagōꞌ aniyaꞌ aꞌa bay makarapit ma aku amonoꞌ, ya na disi Aner, si Eskol maka si Mamre. Patut sigām pinahampitan.”