15
Paljanjiꞌan Tuhan ma si Ibram
1 Pagubus inaꞌan-i, takale eꞌ si Ibram suwala PANGHŪꞌ-Yawe magkallam ma iya hinabuna atuli, yuk-i,
“O Ibram, daꞌa ka tināw.
Aku ya anampanan kaꞌa, saliꞌ hantang taming.
Ahāp toꞌongan panungbasku ma kaꞌa.”
2 Anambung si Ibram, yukna, “O Yawe, kaꞌa Panghūꞌku, ai pūsna bang aku tungbasannu boꞌ halam aniyaꞌ anakku? Ya pinusakaꞌan altaꞌku ya na si Eleꞌeser, aꞌa Damaskus. 3 Halam aku bay buwanannu anak, angkan dakayuꞌ ipatanku itu ya pinasukuꞌan pusakaꞌ.”
4 Na, takalena suwala PANGHŪꞌ pabīng, yukna, “Nggaꞌi ka ipatannu ya pamusakaꞌannu, sagōꞌ anaknu lissi.” 5 Sakali binowa iya eꞌ Tuhan paluwas min lumaꞌna boꞌ ahꞌlling ma iya, yuk-i, “Pahangad ka ni diyataꞌ langit, sulayin niꞌitung saga bituꞌun ilu. Saheka-heka taitungnu ilu, ya isab heka panubuꞌnu.”
6 Na, amꞌnnal toꞌongan si Ibram ma pangallam PANGHŪꞌ eꞌ. Jari minnēꞌ, min pamꞌnnalna, kasulutan Tuhan ma iya ati niꞌitung iya aꞌa abontol.
7 Magkallam isab Tuhan ma si Ibram, yukna, “Aku si Yawe, ya Tuhan bay amowa kaꞌa piꞌitu min Uru lahat bangsa Kaldiya boꞌ supaya pamasukuꞌku lahat itu ma kaꞌa.”
8 Atilaw giꞌ si Ibram ma PANGHŪꞌ, yukna, “O Yawe, kaꞌa Tuhanku, buwattingga eꞌku makatantu in lahat itu ma aku du?”
9 Anambung PANGHŪꞌ, yukna, “Angāꞌ ka dakayuꞌ sapiꞌ dꞌnda, dakayuꞌ kambing dꞌnda maka dakayuꞌ bili-bili lꞌlla, tꞌllu-tꞌllun tahun pangumulanna. Angāꞌ ka isab dakayuꞌ manuk-manuk malapati maka dakayuꞌ anak assang ati bowahun piꞌitu ni aku.”
10 Jari binowa saga hayop itu ni Tuhan eꞌ si Ibram. Binilaꞌ duwa boꞌ yampa pinapagalop bilaꞌanna. Sagōꞌ halam binilaꞌ saga manuk-manuk, hal pinatꞌnnaꞌ sadja. 11 Sakali aniyaꞌ saga belleꞌ patꞌppak ma sumbaliꞌan inān arak amangan, daipara tinꞌggal eꞌ si Ibram.
12 Pagsꞌddop mata llaw tatuli si Ibram, ahaluk toꞌongan tulina. Kalꞌddoman iya sidda maka sinōd tāw aheya. 13 Manjari angallam PANGHŪꞌ ma iya, yukna, “Ma tahun sinōng in panubuꞌnu tahinang aꞌa liyu ma lahat nggaꞌi ka lahat sigām. Tahinang sigām banyagaꞌ ma lahat eꞌ ati pinissokoꞌ sigām toꞌongan ma deyom mpat hatus tahun. 14 Saguwāꞌ,” yuk Tuhan, “patꞌkkaku mulkaꞌ ma bangsa ya amanyagaꞌ sigām. Taꞌabut paꞌin waktu katulak sigām min lahat inān, makabowa du isab sigām altaꞌ lumanduꞌan hekana. 15 Sagōꞌ in pasalnu, Ibram, patahaꞌku du umulnu ati amatay du ka ma deyom kasannangan, maka takubul ka pahāp. 16 In pasal panubuꞌnu isab, subay palabay mpat masaa boꞌ yampa sigām pabīng ni lahat Kanaꞌan itu sabab in paldusahan bangsa Amor subay pinajukup dahū.”
17 Manjari, pasꞌddop paꞌin llaw boꞌ angalꞌddom na lahat, aniyaꞌ saliꞌ hantang lapohan maka suwariyan palabay ma tongaꞌan saga sumbaliꞌan bay pinagdambilaꞌ inān. Maghumbu asal lapohan maka arokot suwariyan. 18 Magtūy ma waktu inaꞌan, aniyaꞌ paljanjiꞌan pamatꞌnnaꞌ eꞌ PANGHŪꞌ ma si Ibram, yuk-i, “Pamuwanku du katibuꞌukan lahat itu ma saga panubuꞌnu, tobtob min sapaꞌ lahat Misil sampay ni sapaꞌ Alpurati ya sapaꞌ aheya. 19 Tabeyaꞌ isab tanaꞌ saga bangsa Kēn, Kenes, Kadmon, 20 Hīt, Pirissi, Repa, 21 Amor, Kanaꞌan, Gilgas maka Jibus.”