16
Si Hajara maka si Ismaꞌil
1 Na, si Saray hꞌnda si Ibram halam anakan. Sagōꞌ aniyaꞌ ipatanna dꞌnda Misil, ōnna si Hajara. 2-3 Manjari itu, taꞌabut paꞌin sangpūꞌ tahun kapaglahat si Ibram ma Kanaꞌan, ahꞌlling ma iya si Saray, yukna, “Kahandak min PANGHŪꞌ ya angkan aku mbal makaꞌanak. Bang bahāꞌ hulidnu ipatanku itu. Kalu aniyaꞌ anakku labay min iya.”
Kasulutan isab si Ibram ma hꞌlling si Saray. Jari binowa eꞌ si Saray ipatanna si Hajara pamahꞌndana ma hꞌllana. 4 Manjari maghulid si Ibram maka si Hajara ati angiram na iya. Makananam paꞌin si Hajara in iya angiram na, magtūy pareyoꞌ-deyoꞌna si Saray.
5 Anumbung magtūy si Saray ma si Ibram, yukna, “Dusanu ya angkan aku pinareyoꞌ-deyoꞌ eꞌ si Hajara itu. Ya bꞌnnalna, aku ya bay amuwan iya ma kaꞌa. Sagōꞌ pagtaꞌuna abꞌttong na iya, mbal na iya magaddat ma aku. Na, bayaꞌ-bayaꞌ si Yawe angahukum ma kita duwangan.”
6 Anambung si Ibram, yukna, “Ipatannu koꞌ ilu, bayaꞌ-bayaꞌnu na minsan ai hinangnu ma iya.” Manjari alahi si Hajara pagka kinabigsiꞌan eꞌ si Saray.
7 Sakali itu, hinabu si Hajara ma lahat paslangan, tabāk iya eꞌ malaꞌikat PANGHŪꞌ ma atag dakayuꞌ tuburan boheꞌ, inaꞌan ma labayan tudju ni lahat Sūr. 8 Ya lling malaꞌikat ma iya, “O Hajara, kaꞌa ipatan si Saray, bay ka minningga? Maka piꞌingga isab ka?”
Ya sambung si Hajara, “Itiyaꞌ aku alahi min si Saray ya bay pagipatanku.”
9 Yuk malaꞌikat-i, “Subay ka amoleꞌ pehēꞌ ni nakuraꞌnu magpaꞌata ma iya pabīng.” 10 Ahꞌlling isab malaꞌikat ma si Hajara, yukna, “Buwananta ka tubuꞌ paheka, mbal taitung hekana. 11 Ilu ka abꞌttong, jari anganak du ka lꞌlla. Si Ismaꞌila ya pangōnnu iya sabab takale eꞌ PANGHŪꞌ kasusahannu. 12 Malaingkan anaknu ilu tahinang saliꞌ kuraꞌ talun mbal tasohoꞌ. Pinagsaggaꞌ eꞌna saga pagkahina manusiyaꞌ, maka anaggaꞌ isab saga aꞌa kamemon ma iya. Jari mbal iya makapagdakayuꞌ lahat maka saga kakampunganna.”
13 Yuk si Hajara ma deyom atayna, “Arī! Masi bahāꞌ aku allum minsan taꞌndaꞌku Tuhan?” Manjari ya pangōnna ma PANGHŪꞌ ya bay ahꞌlling ma iya, “Tuhan ya Makaꞌndaꞌ ma aku.” 14 Angkan na tuburan boheꞌ inān pinagōnan Beꞌer-Lahai-Ruwi, hatina ‘Boheꞌ Tuhan ya Makaꞌndaꞌ ma aku.’ Boheꞌ itu, inaꞌan ma tongaꞌan lahat Kades maka kauman Bered.