Panagnaꞌan 17

Pagislam ya Tandaꞌ sin Paljanjiꞌan Tuhan

¹ Manjari pagabut siyampūꞌ maka siyam tahun umul si Ibram, magpaꞌndaꞌ PANGHŪꞌ-Yawe ma iya. “Aku ya Tuhan Sangat Kawasa,” yukna. “Beyaꞌun panohoꞌanku, maka pabontolun isab hinangnu kamemon, ² ati tumanku paljanjiꞌanku ma kaꞌa. Pahekaku toꞌongan isab paltubuꞌannu.” ³ Na, pasujud magtūy si Ibram. Ya palman Tuhan ma iya, ⁴ “Buwattitu ya paljanjiꞌanku ma kaꞌa, hinangta ka pagmattoꞌahan ma kabangsa-bangsahan. ⁵ Maka pindahanku isab ōnnu. Puwas itu nggaꞌi ka na si Ibram ya pangōn kaꞌa, sagōꞌ si Ibrahim na, sabab hinangta ka pagmattoꞌahan saga bangsa kaginisan. ⁶ Ahoꞌ, pahekaku toꞌongan saga panubuꞌnu ati tahinang sigām kabangsa-bangsahan. Ma sinosōng isab aniyaꞌ saga sultan patubuꞌ min kaꞌa. ⁷ Pahogotku toꞌongan paljanjiꞌanku itu ma kaꞌa sampay ma saga panubuꞌnu magpangkat-mamangkat. Janjiꞌ itu mbal magbaluba ni kasaumulan. Aku ya Tuhannu, maka pagtuhanan saga panubuꞌnu. ⁸ In katibuꞌukan lahat Kanaꞌan itu, ya paghantiꞌannu ma buwattinaꞌan, pamuwanku du ma kaꞌa sampay ma saga panubuꞌnu saumul-umul. Aku ya pagtuhanan sigām.”

⁹ Magkallam isab Tuhan ma si Ibrahim, yukna, “Na kaꞌa isab, subay bogbogannu paljanjiꞌanta itu, damikiyanna isab saga panubuꞌnu magpangkat-mamangkat salama-lama. ¹⁰ Buwattitu ya pamogbogbi ma janjiꞌ pagsulutanta itu, kamemon kalꞌllahan ma deyomanbi subay niꞌislam. ¹¹ Ya du ilu tandaꞌ ma paljanjiꞌan ya pagsulutanta itu, in kaꞌam kalꞌllahan subay niꞌislam. ^12-13 Puwas min waktu itu sampay ma waktu sinōng, in lꞌlla kamemon ya nianakan ma deyomanbi tahun ni tahun, ai na ka anakbi, ai na ka isab anak ata, subay niꞌislam bang taꞌabut walungꞌllaw ma luwasan.Ya du isab saga ata bay bꞌllinu min aꞌa liyu subay niꞌislam isab. Ahoꞌ,” yuk Tuhan, “kamemon kalꞌllahanbi ilu subay niꞌislam, manjari aniyaꞌ pangilāhan ma baranbi in janjiꞌ pagsulutanta itu kakkal saumul-umul. ¹⁴ Saguwāꞌ sai-sai lꞌlla halam taislam, mbal iya taitung sukuꞌku sabab halam bogboganna paljanjiꞌanku itu.”

¹⁵ Magkallam lagiꞌ Tuhan ma si Ibrahim, yukna, “Na, ya pasal hꞌndanu si Saray, nggaꞌi na ka si Saray ya pangōnnu iya puwas itu, sagōꞌ si Sara na. ¹⁶ Buwananku iya kahāpan boꞌ aniyaꞌ anaknu lꞌlla min iya. Ahoꞌ, tantu iya buwananku kahāpan manjari tahinang iya inaꞌ ma kabangsa-bangsahan. Aniyaꞌ isab saga sultan luwas min panubuꞌna.”

¹⁷ Na, pasujud magtūy si Ibrahim maka eꞌna anittowa. Yukna ma baranna, “Arī! Makabuwan tubuꞌ giꞌ bahāꞌ bang aꞌa dahatus tahun umulna? Makaꞌanak bahāꞌ si Sara minsan siyampūꞌ tahun umulna!” ¹⁸ Yukna isab ma Tuhan, “O Tuhan, bang paꞌin mura-murahan pagkaꞌinagonannu anakku si Ismaꞌil!”

¹⁹ Anambung Tuhan ma si Ibrahim, “Ahoꞌ, makajari. Sagōꞌ aniyaꞌ du anaknu lꞌlla min hꞌndanu si Sara. Si Isaꞌak ya pangōnnu iya. Pahogotku paljanjiꞌanku ma iya sampay ma paltubuꞌanna salama-lama. ²⁰ Na, ya pasal si Ismaꞌil, takaleku isab bay pangamuꞌnu-i. Buwananku iya kahāpan, pahekaku panganakna boꞌ aheka toꞌongan saga panubuꞌna. Manjari aniyaꞌ sangpūꞌ aꞌa min panubuꞌna makapagdatuꞌ ma sinosōng. Saga panubuꞌna isab nihinang eꞌku bangsa gaꞌosan. ²¹ Saguwāꞌ anaknu si Isaꞌak ya pahogotanku janjiꞌku. Nianakan du iya eꞌ si Sara ma tahun balik saliꞌ bulan itu.” ²² Aubus paꞌin eꞌ Tuhan amalman ma si Ibrahim, magtūy iya alaꞌan.

²³ Na ma llaw inaꞌan-i, bineyaꞌ eꞌ si Ibrahim panohoꞌan Tuhan ma iya. Taislam eꞌna anakna si Ismaꞌil sampay kalꞌllahan kamemon ma deyomanna. Ya du isab saga ata bay nianakan ma deyomanna sampay saga ata bay tabꞌllina. ²⁴ Ya umul si Ibrahim ma waktu pagislam ma iya maka si Ismaꞌil, siyampūꞌ maka siyam tahun. ²⁵ Ya umul si Ismaꞌil sangpūꞌ maka tꞌlluntahun. ²⁶ Jari magdongan si Ibrahim maka anakna si Ismaꞌil niꞌislam ma dangꞌllaw du. ²⁷ Tabeyaꞌ isab niꞌislam ma llaw inaꞌan-i saga atana kamemon, aꞌa bay nianakan ma deyomanna sampay ata bay tabꞌllina.