18
Paljanjiꞌan Tuhan ma si Ibrahim maka si Sara
1 Manjari aniyaꞌ llaw magpaꞌndaꞌ PANGHŪꞌ-Yawe ma si Ibrahim ma tongod kakayuhan pagduwaꞌahan, inaꞌan ma tanaꞌ si Mamre. Alanga na llaw, maka inaꞌan si Ibrahim aningkōꞌ-ningkōꞌ ma bowaꞌ lawang lumaꞌna tolda. 2 Na, taꞌndaꞌ eꞌna tꞌllungan aꞌa anꞌngge-nꞌngge ma dahuanna. Pagꞌndaꞌna itu, magtūy iya magdaiꞌ-daiꞌ anampang sigām, maka eꞌna pasujud.
3 Yukna ma sigām, “Saga tuwan, pahapit giꞌ kam ni lumaꞌ kami minsan mbal na apatut. 4 Pabowahanta kam boheꞌ pangoseꞌ tapeꞌbi boꞌ kam pahali-hali ma sindungan kayu itu. 5 Bowahanta paꞌin kam saga pagkakan isab minsan mbal na apatut. Subay na ahāp palasahanbi pabīng boꞌ yampa kam palanjal ni palꞌngngananbi.”
Ya sambung sigām ma si Ibrahim, “Ahoꞌ, magsukul.”
6 Na, magdaiꞌ-daiꞌ si Ibrahim pasōd ni deyom lumaꞌ tolda angalinganan si Sara. “Dāng,” yukna, “angāꞌ ka tirigu ahāp, tꞌllu tꞌppongna, boꞌ ka angahinang tinapay. Daiꞌ-daiꞌun paꞌin.” 7 Pagubus, magdaiꞌ-daiꞌ si Ibrahim pehēꞌ ni buluyan hayopna ameneꞌ dakayuꞌ anak sapiꞌ ahāp isina. Sinohoꞌ sinumbaliꞌ ma sosohoꞌanna boꞌ niadjal saruꞌun-duꞌun. 8 Jari asakap paꞌin kamemon, binowa eꞌ si Ibrahim gatas maka sapiꞌ pangalabotna ma saga aꞌa-i. Hinabu sigām amangan, si Ibrahim magbaran amuhatan sigām ma lindung kayu.
9 Na, tinilaw eꞌ sigām si Ibrahim, “Maꞌai hꞌndanu si Sara?”
Ya sambung si Ibrahim, “Inaꞌan ma deyom.”
10 Manjari angallam PANGHŪꞌ-Yawe, “Ma tahun sinōng ilu, buwat bulan itu, pabalik du aku piꞌitu. Hꞌndanu si Sara anganak du, lꞌlla ya anakna.”
Na mainaꞌan asal si Sara pakale-kale ma bukut lawang. 11 Atoꞌa iya, mbal na pinaglahaꞌ. Maka si Ibrahim isab, atoꞌa na asal. 12 Angkanna, pagkale si Sara ma bissala inān, tatittowa iya ati yukna ma deyom atayna, “Ē, buwattingga lagiꞌ pagkōg kami maglakibini pagka atoꞌa na kami saliꞌ-saliꞌ?”
13 Sakali angallam PANGHŪꞌ ma si Ibrahim, yukna “Angay si Sara tatittowa? Angay buwattēꞌ llingna, ya yukna, ‘Buwattingga eꞌku anganak pagka aku atoꞌa na?’ 14 Aniyaꞌ bahāꞌ ahunit ma si Yawe? Pahati ka, pagabut bulan bay pangahakaku ma kaꞌa pabalik du aku piꞌitu, boꞌ hꞌndanu si Sara anganak lꞌlla.”
15 Na, tināw si Sara angkan iya maglimbung, yukna, “Halam aku bay atittowa.”
Sagōꞌ anambung Tuhan, yukna, “Allā! Bay ka anittowa.”
Pasal Lahat Sodom
16 Sakali itu palanjal na aꞌa tꞌllungan eꞌ. Tinūran eꞌ si Ibrahim sampay taromol eꞌ sigām lahat Sodom. 17 Manjari ahꞌlling PANGHŪꞌ, yukna, “Mbal limbunganku min si Ibrahim ya song hinangku ma lahat Sodom. 18 Sababna in iya poꞌonan bangsa aheya maka abantug. Buwananku isab kahāpan saga bangsa manusiyaꞌ kamemon labay min iya. 19 Tapeneꞌku iya supaya iya amanduꞌan saga anak-mpuna ameyaꞌ ma kabayaꞌanku. Subay sigām angahinang ni kahāpan maka ni kabontolan, manjari tumanku toꞌongan paljanjiꞌanku ma iya.” 20 Manjari amissala PANGHŪꞌ ma si Ibrahim, yukna, “Aniyaꞌ takaleku sumbungan pasal saga aꞌa ma daꞌira Sodom maka Gomora, lumanduꞌan konoꞌ laꞌat dusa sigām. 21 Subay aku pehēꞌ angꞌndaꞌ bang bꞌnnal saga sumbungan eꞌ. Jari kataꞌuwanku bang bꞌnnal ka atawa mbal.”
22 Sakali palanjal na duwangan min sigām-i pehēꞌ ni lahat Sodom, sagōꞌ paꞌbba giꞌ Tuhan mainaꞌan ma si Ibrahim. 23 Na pasekot si Ibrahim pehēꞌ ni PANGHŪꞌ, yukna, “O Panghūꞌku, palamudnu bahāꞌ aꞌa halam aniyaꞌ dusana pinagmulkaꞌan saliꞌ-saliꞌ maka aꞌa taga-dusa? 24 Bang saupama,” yukna, “aniyaꞌ limampūꞌ aꞌa abontol ma lahat eꞌ, pagmulkaꞌannu bahāꞌ kamemon? Mbal bahāꞌ ka maꞌaseꞌ ma lahat inān ma sabab limampūꞌ aꞌa abontol mainaꞌan? 25 Bang paꞌin du mbal pagsaliꞌnu aꞌa halam aniyaꞌ dusana maka aꞌa taga-dusa, bang paꞌin sigām mbal pagmulkaꞌannu. Kaꞌa ya maghuhukum ma saga manusiyaꞌ kamemon ma deyom dunya, maka hukumannu subay abontol sadja.”
26 Manjari ya sambung PANGHŪꞌ ma si Ibrahim, “Ahoꞌ, bang aniyaꞌ tabākku ma lahat Sodom ilu limampūꞌ aꞌa halam aniyaꞌ dusana, mbal du pagmulkaꞌanku lahat ilu ma sababan sigām.”
27 Manjari angallam si Ibrahim pabīng, yukna, “O Panghūꞌku, manusiyaꞌ du aku, halam aniyaꞌ kawasaku, sagōꞌ anawakkal aku angamuꞌ ma kaꞌa pabīng. 28 Bang saupama aniyaꞌ mpatpūꞌ maka lima aꞌa abontol ma lahat inān, pagmulkaꞌannu lagiꞌ bahāꞌ ma saukat kulang lima min heka aꞌa bay amuꞌku-i?”
Anambung isab PANGHŪꞌ, “Bang aniyaꞌ tabākku mpatpūꞌ maka lima aꞌa abontol, mbal pagmulkaꞌanku lahat ilu.”
29 Na, ahꞌlling si Ibrahim pabalik, yukna, “O Panghūꞌku, bang saupama aniyaꞌ mpatpūꞌ du?”
Ya sambung PANGHŪꞌ, “Ahoꞌ, ma sabab mpatpūꞌ aꞌa abontol, mbal pagmulkaꞌanku lahat ilu.”
30 Angamuꞌ lagiꞌ si Ibrahim, “Ndūꞌ Panghūꞌku, daꞌa akagit ataynu, dūlin aku angamuꞌ pabīng. Bang saupama aniyaꞌ du tꞌllumpūꞌ aꞌa tabāknu abontol, pagmulkaꞌannu bahāꞌ?”
Ya sambung Tuhan, “Bang aniyaꞌ tabākku tꞌllumpūꞌ aꞌa abontol, na, mbal pagmulkaꞌanku lahat ilu.”
31 Manjari angamuꞌ na paꞌin si Ibrahim, “Ampunun lagiꞌ aku, O Panghūꞌku, anawakkal giꞌ aku angamuꞌ ma kaꞌa pabīng. Bang saupama aniyaꞌ tabāknu duwampūꞌ du aꞌa halam magdusa, pagmulkaꞌannu lagiꞌ bahāꞌ?”
Ya sambung Tuhan, “Ma sabab duwampūꞌ aꞌa abontol ilu, mbal du pagmulkaꞌanku lahat ilu.”
32 Manjari ya katapusan niamuꞌ eꞌ si Ibrahim, yukna, “O Panghūꞌku, ndūꞌ, daꞌa akagit ataynu, ya sadja itu amuꞌku ma kaꞌa. Bang saupama aniyaꞌ sangpūꞌ sadja tabāknu mailu halam magdusa?”